HAGARAHENGA 27
27
Na ramata renigi na votovoto tanga na Araha
1Na Araha ki vatea o Moise 2renigi na ramata igê tangara na Isiraelita. Manga vi igo ma ko suru vigo hagapunaria ta na enoni tanga na Araha, igo ko girara go hagamonaria na suruha iamu, manga vigo kasia na haga urusia na enoni ngekana. 3-7Na haga go kasia ki arâ suria nga na ramata i manga ikê:
- manga vi na mane i 30 tanga na 60 na harisi iana, ko kasigi na 50 na maani na siliva
- manga vi na gete, ko kasigi na 30 na maani na siliva
- manga vi na kere mane i 5 tanga na 20 na harisi iana, ko kasigi na 20 na maani na siliva
- manga vi na kere gete, ko kasigi na 10 na maani na siliva.
- Manga vi na kere mane sisite i mangênga vige gi rima na harisi iana, ko kasigi na 5 na maani na siliva
- manga vi na kere gete sisite, ko kasigi na 3 na maani na siliva
- manga vi na mane ma ki teharenia na 60 na harisi iana, ko kasigi na 15 na maani na siliva
- manga vi na gete ma ki teharenia na 60 na harisi iana, ko kasigi na 10 na maani na siliva.
8Manga vi na mane ma ki surusuru vikana ma ki bara tanga vige kasigi na haga vigana, suria i matareha, ngaia ki merâ nga na enoni ngekana tanga na mane ni vogasiha ma na mane ni vogasiha ki gurua vato na mena ngekana ki araria hanana i kasia. 9Manga vi na mane ma ki surua na ganiana i araria na vogasiha tanga na Araha, hoi, na ganiana ngekana ki apuna, suria ngaia ka na anina na Araha. 10Na mane i surusuru vikana, ki apu tanga vige urusia renia na ani getea na ganiana. Manga i katokato vikana, ngairerua ka na anina na Araha. 11Ma ki manga na ganiana i pe matarotaro ma ki pe araria na vogasiha tanga na Araha, na mane ngekana ki urua râ nga na ganiana ngekana tanga na mane ni vogasiha. 12Na mane ni vogasiha ki hahariria ma ki naka na mena i araria manga vi i koro se i pe koro. Na mena ngekana ki tâtâ nga vikana. 13Manga vi na mane ma ki obania vi vuria aporo, ngaia ki vuria nga renia na mena ngekana henigi tani kê nikâ na haga.
14Manga vi ta na enoni ma ki hagapunaria na ruma iana tanga na Araha, na mane ni vogasiha ki hahariria nga ma ki kahu naka na mena i araria vi i koro se i pe koro. Na mena ngekana ki tâtâ nga vikana. 15Manga vi na mane i hagapunaria na ruma iana ma ki obania vi vuria aporo, ngaia ki vuria nga renia na mena ngekana ma tani kê nikâ na haga.
16Manga vi na mane ma ki hagapunaria tagua na mako iana tanga na Araha, na mena ki arâ surigi nga vi gi hita na kilo na maani na koni kaniga araria viga hasia na mako hagenani ngekana renigi: na 50 maani na siliva tanga na ara ni 300 kilo na koni. 17Manga vi ngaia ma ki hagapunaria na mako i na murina nga na tangahuruta gi rima na harisi, ngaia ki vuria nga renia na mena hagenani. 18Manga vi ngaia ma ki hagapunaria na mako i ta na matena i hemuri, na mane ni vogasiha ki naka nga na mena surigi na harisi ga mêngagi mataro me na tangahuruta gi rima na harisi ma ki gurua vato na mena. 19Manga vi na mane i hagapunaria na mako ngekana ma ki obania vi vuria aporo, ngaia ki vuria renia na mena ngekana ma tani kê nikâ na haga. 20Manga vi ngaia ma ki hagavuringenia na mako ngekana tanga ta na enoni ma ki pe vuria hagenago tenia na Araha, ngaia ki pe tâ tanga vige vuria aporo. 21Igê na tangahuruta gi rima na harisi, na Araha ki page nahunia hagahu nga na mako. Ngaia ka na nahuninga iata na mane ni vogasiha.
22Manga vi na mane ma ki hagapunaria tanga na Araha na mako i bani vuria, 23na mane ni vogasiha ki hahariria nga ma ki kahu naka na mena surigi na harisi ga mamêngagi mataro me na tangahuruta gi rima na harisi, ma na mane ngekana ki vuria igê na tangiana ngekana nga. Na haga ka na anina na Araha. 24Igê na tangahuruta gi rima na harisi na mako ki aporo nga tanga na bani avanuna se tangara na raraha iana. 25Na ara ni meni hato ka arâ suria nga na ramata.
26Na Araha ki nahunia na ara ni kareta hagâkani na togoha. Tahema siana ta na enoni ki hagapunarira tanga na Araha manga na vogasiha i obania marena vi tagarenia. Na kareta hagâkani na puruka, na sipi se na goti ka na anina na Araha. 27Ma na karena hagâkani na ganiana i pe matarotaro, ki araria viga vuria aporo renia na mena i arâ suria na ramata ma tani kê nikâ na haga. Manga viga pe vuria aporo, ki araria ma viga hagavuringenia tanga ta na enoni renia na mena i arâ suria na ramata. 28I asa ta na enoni vige hagavuringenia se vige vuria aporo na enoni se na togoha se na mako i bani hagapunaria ki tâtâ tare tanga na Araha. Ngaia ka na anina na Araha tare ki bê ki arâ. 29Henaka vi na enoni ga bani hagapunaria ki tâtâ tare tanga na Araha, ki bara vige vuria aporo ma ka nahuia nga ki meme hete.
30Na tangahuruta na ara ni ngêra ni mako, naka ma vi na koni se na guana na apinige, ki na anina na Araha. 31Manga vi na mane ma ki obania vi vuria aporo, ngaia ki vuria nga renia na mena i arâ suria na ramata ma tani kê na haga. 32Na tangahuruta na togoha ki na anina na Araha. Matena go tomanira, na ara ni tangahuruta ka na anina na Araha. 33Na avanuta na togoha ki apu tanga vige naka na ani i pe koro na togoha ke tangahuruta se vige urusia na tangahuruta renia na ani getea. Manga vi ngaia ma ki urusia, ngairerua ka na anina na Araha ma ki bara vige vurirerua aporo.
34Ngaigi nga ka na ramata na Araha i vatea o Moise renigi i hungana i Sinai tangara na Isiraelita.
Currently Selected:
HAGARAHENGA 27: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific