HAGARAHENGA 16
16
Na tangiana raha ni bonoteniha ni tasi
1I murina na Araha ki bani nahuirerua o karena gi rua o Aroni renia na gi, suria garu tagarenia na gi i pe apuna tanga, ngaia ki tamasi tanga o Moise. 2Ngaia ki vi: “Gu hagarongoa nga o veogamu o Aroni, hanana i bêbanu igê na ruma na gahu iaku tanga na kiboru apuna ngavê igê nga na matena gê bani naka tanga. I rarona nga i ngekana inê kê voravora igê i rarona na vaha i avorana na bokesi ni suruheri. Manga vi ngaia ma ki haritohe, ngaia ki page meme. 3Manga vi ngaia ma ki torea me hagenago na bêhâgana na puruka mane tanga na vogasiha ni bonoteniha ni tasi, se na sipi mane tanga ga susu renia, hoi, ngaia ki kahu bêbanu igê na kiboru apuna ngavê.”
4Na Araha ki vi nikâ: “I tuguhia o Aroni, vi mamanu ma ki tuguni renigi na tuguni iata na mane ni vogasiha: na kâhisi, na tuguni borahu siki, na hogosina ma na esara na gahu, ma ki kahu bêbanu igê na kiboru apuna ngavê.
5“Na Isiraelita ki tuguhira, viga vatea o Aroni na goti mane gi rua tanga na vogasiha ni bonoteniha ni tasi ma na sipi mane tanga i susu renia. 6Ngaia ki tuguhia, vi vogasi renia na puruka mane: na vogasiha ni bonoteniha ni tasi, na tasi iana marena ma na anita na ahemata iana. 7Ngaia ki kahu torererua nga na goti gi rua ngegana tanga na maani ruma na ruma na gahu iana na Araha. 8I ngekana ngaia ki taurerua nga igê na hê gi rua. Tani ka sege igê ‘tanga na Araha’, ma tani ka sege igê ‘tanga Asasele.’ Ngaia ki ngarangaranirerua, hanana vi girara, vi na ani ta na hitangiterua na goti kani tanga na ta. 9Na ani tanga na Araha o Aroni ki vogasi renia nga manga na vogasiha ni bonoteniha ni tasi. 10Na ani tanga Asasele o Aroni ki tagarenia hemêri tangê inê na Araha, ma ki tarigenia râ igê na bagamasusu raha tanga Asasele, tanga na bonoteniha ni tasi iata na enoni.
11Matena o Aroni ki vogasi renia na puruka mane manga na vogasiha ni bonoteniha ni tasi iana marena ma na anita na ahemata iana, 12ngaia ki tuguhia, vi taua na apira ni hagatanga gi, i vunuvunu renia garaputa ma nikâ na marâ i sigini koro, i vunuvunu hagerua na rimana, ma ki torea banu igê na agua apuna ngavê. 13Ma i ngekana i maaku inê na Araha, ngaia ki karangigi nga igê na gi na marâ i sigini koro. Na robona na gi ki aruhea na bubuhina na bokesi na suruheri, hanana siana ngaia ki bâsia, i era ma ki me. 14Ngaia ki anumia nga na kakêna igê na gapuna na puruka mane ma ki kamusia renia na bogona na bubuhina i maa me tanga, ma hemuri ki kamusia hagepi na agua i matome igê na bokesi na suruheri.
15“Ma hemuri ngaia ki nanahuia nga na goti mane tanga na vogasiha ni bonoteniha ni tasi iata na enoni. Ngaia ki mebanu nga na gapuna igê na kiboru apuna ngavê ma ki kamusia renia na bubuhina ma hemuri na agua i mato me igê na bokesi na suruheri, manga i nago i bani kato vikana renia na gapuna na puruka mane. 16Igê na tarana ngekana ngaia ki hagamatarotaroa na kiboru apuna ngavê tenigi na ara ni makoraganiha ma na tasi hato iata na Isiraelita. Ngaia ki katokato vikana nga tanga na ruma na gahu iaku inê na Araha, suria na ruma na gahu iaku ki ura i gupuna na tênga, i pe matarotaro suria na tauha igê na rotu. 17Haganega tenia na matena i bêbanu o Aroni igê na kiboru apuna ngavê tanga na hagamatarotaroha, mataro me ki huhura me, ki apu hagetage ta na enoni, vige oga nikâ i ruma na gahu iaku, inê na Araha. Matena i hatohato na hagamatarotaroha tanga marena, tanga na ahemata iana ma tangara na enoni hato, 18ngaia ki tuguhia, vi huhura me tanga na bea ni vogasiha ga susu igê, ma ki hagamatarotaroa. Ngaia ki tuguhia, vi kamusigi na sukuniheri na bea ni vogasiha renia na gapu, tagua na gapuna na puruka mane ma tagua na gapuna na goti mane. 19Ngaia ki anumia nga na kakêna igê na gapu ma ki kamusia hagepi na gerina na bea ni vogasiha. Ngaia ki tuguhia, vi hagamatarotaroa nga vikana tenigi na tasi iata na Isiraelita, hanana i hagapunaria.
20“Matena i hatohato na hagamatarotaroha tanga na kiboru apuna ngavê, tanga na ruma na gahu iaku ma tanga bea ni vogasiha, o Aroni ki tuguhia, vi tagarenia na goti mane hemêri tangê inê na Araha. Ngaia ki na ani tanga Asasele. 21O Aroni ki tuguhia, vi têtêbuhia na bêna na goti mane renirerua na rimana gi rua, ma ki tamasigi na bagatauhata, na tasi ma na guguruganiha hato iata na Isiraelita, ma ki hagatarêngenigi tenira na enoni tanga na bêna na goti mane. Ma hemuri na mane, ga bani atea, ki tatarigenia râ nga na goti mane igê na bagamasusu raha. 22Na goti mane ki page migirâ su na tasi hato iata tanga na agua i hihiruga.
23“Ma hemuri o Aroni ki tuguhia, vi bêbanu igê na ruma na gahu iaku, ki tasigi râ ma ki panigi so na tuguni iata na mane ni vogasiha, i tuguni renigi, matena i banu igê na kiboru apuna ngavê. 24Igê ta na agua apuna ngaia ki tuguhia vi mamanu igê, ma ki tuguni aporo renigi na anina marena. Hemuri ki tuguhia, vi huhura ma ki sungia na vogasiha tanga na bonoteniha ni tasi iana ma na anita na enoni. 25Ki tuguhia, vi sungia na êbena na ganiana igê na bea ni vogasiha tanga na bonoteniha ni tasi. 26Na mane i tarigenia râ na goti mane tanga Asasele igê na bagamasusu raha, ki tuguhia, vi tananigi na gahu iana ma ki mamanu, ma ki kahu aporo me igê na tênga. 27Matena ga bani nanahuirerua hato na puruka mane ma na goti mane tanga na vogasiha ni bonoteniha ni tasi ma o Aroni ki bani totora banu na gaputerua igê na kiboru apuna ngavê ma ki kamusia hato na bokesi na suruheri renigi na gapu tanga na bonoteniha ni tasi, ka totora hura nga na megaterua i metara na tênga ma ka sungirerua hagenani: na gavoterua, na hasigoterua ma na aunâbaterua. 28Na mane i sungirerua ki tuguhia, vi tananigi na gahu iana ma ki mamanu ma ki kahu bêbanu aporo igê na tênga.
Na marupeana na tangiana ni bonoteniha ni tasi
29Mu marupegi nga na ramata ngegê tare ki bê ki arâ. Igê na tangahuruta na tangiana igê na pita na hageha igamu na Isiraelita ma nikâ na mamahuara ga oga i berarogami, ki tuguhigamu, vigamu harihari nga ma siana hagetage kamu tagara igê. 30Igê na tangiana ngekana mu katoa nga na hagarahenga tanga na bonoteniha ni tasi hato iami, hanana mu matarotaro. 31Na tangiana ngekana nga ki na tangiana i apuna ngavê. Mu harihari nga igê ma siana hagetage kamu tagara igê. Mu marupegi nga na ramata ngegê tare, ki bê ki arâ. 32Na maneraha ni vogasiha, na ani ga hagapunaria maninga ma ka atea ki urusia o vaemana, ngaia nga ki tuguhia, vi katoa na vogasiha ni bonoteniha ni tasi. Ngaia ki tuguhia, vi tuguni renigi na tuguni iata na mane ni vogasiha. 33Ki tuguhia, vi katoa na vogasiha ni hagamatarotaroha tanga na kiboru apuna ngavê, tanga na ruma na gahu iaku inê na Araha, tanga na bea ni vogasiha, tangara na mane ni vogasiha ma tangara na enoni hato. 34Mu marupegi nga na ramata ngegê tare, ki bê ki arâ. Mu katoa na vogasiha ngekê hagetage igê na ara ni harisi, hanana mu hagamatarotarora na Isiraelita tenigi na tasi hato iata.”
O Moise ki râ surigi na tamasinga iana na Araha tanga.
Currently Selected:
HAGARAHENGA 16: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
