JEREMIA 8
8
1“I na matena ngekana ka page arahigi na surita na enoni, na surita na maneraha ma na enoni raha i Juta, na surita na mane ni hagarahenga ma na poropete, ma na surita nikâ na enoni getera hato, ga bani oga i Jerusaleme. 2Ga page tokorenigi na surita na enoni ngegana tangagi na arito, na hageha ma na higu, suria ngaira ka hagarapegi, rahesigi, ka matu tangagi ma ka vogasigi. I asa vige page ruguni aporo na surita, hanana vige ahunigi aporo. Ngaigi ki tâtâ so ma mangagi na ae, ga hagakorogi renigi na mu. 3Na hitangita na enoni era ngegana, ga hita so igê na agua, gê tokorenira igê, ngaira ka page obania viga meme, hanana vi siana ka mauri. Ngaia kani gê visia, inê na Araha raramohaga huniê.”
Na tasi ma na hagaitangiha
4Na Araha ki vi tangê, ki vi:
“Jeremia, go tamasi tangara na kariaku, ko vivi:
Manga ta na enoni, ma ki votavota,
ki hega, ngaia ki page aharaga aporo vari?
Manga ta na enoni, ma ki hagatasia na tara,
ki hega, i asa vari vige aporo?
5Kariaku, tanu hega kamu murisigeê,
ma kamu pe ahariê?
Igamu kamu tênganira na harasimi,
ma kamu usi, vigamu toto suriê.
6Inê kê kakaringagamu maninga,
ma kê tarahua, vi igamu kamu hagahagaparu ma.
I mareha na hitangimi,
vige tangahuria renia na bagatauhana,
se vige vi, ‘E, inê kê tasi.’
Igamu hato kamu râ suri barisumi maremi.
Igamu kamu mangara na hosi ni me,
ga tangotango tanga na hearihatana.
7Nakara mavê, na amaka ma na parenga,
ngaira ka girara na matena, ga arâ me igê,
ma na matena, ga aporo igê.
Ngaira ka râ surigi na ramata iaku tangara.
Ma igamu, na kariaku, igamu kamu tugupu,
vi na ta ki tuguhigamu.
8Tanu hega igamu kamu vi,
vi igamu kamu tako mataha
ma kamu giraragi na ramata iaku?
Bâ, na mane segesege iami ka hagahagaparu
ma ka bani urusigi ma ka bani horohorogi na ramata.
9Na mane tako mataha iami ka maki,
ka tako tugupu ma ki bara tangara.
Ngaira ka bani usitenigi na tamasinga iaku.
I manga i he kani ga girara,
vi ngaira ka tako mataha?
10Tahema inê be haganahunira na enoni getera
renigi na mako iata
ma na gete iata tangara na mane getera.
Ngaira hato, na enoni raha ma na enoni purua,
ka hagahagaparu, suria ga vanasigi bâraha na haga.
Na poropete ma na mane ni vogasiha nikâ
ngaira ka hagahagaparura na enoni nogata.
11Ngaira ka pe gagêmaga renigi na tagaraha iata.
Ngaira ka vi, vi na maara iata na kariaku
ki na kere garoha purua ma.
Ngaira ka vi ma, ‘Na ara ni marâ ka koro ma.’
Ma hete mareha ngavê!
12Kariaku, igamu kamu maki surigi vari ka na bagatarihami?
Mareha vê! Igamu kamu pe girara, vigamu maki!
Hoita, igamu kamu page vota, na ara ni hitangimi.
Inê be hagaitangigamu nga! Mu page hato!
Ngaia kani gê visia, inê na Araha.
13“Inê na Araha, inê kê obania,
vigê hagahakura na kariaku
manga na enoni i opaopa kiru na harisi.
Ma ngaira ka manga na vaini, i robo re varona,
manga na apinige na fiki mane, i mêgu na ahani.
Tahema inê kê nakara na merongata,
ka parênia tenira na apanena iata.”
14Na kariana God ka hehagateri, ka vi:
“Na ta ka migioga ikê?
Nika, ge tabegi na hinua nganganihaga,
hanana ge me igê.
Na Araha God iaka ki bani surigia,
hanana viga meme.
15Ngaia ki kuasigia renia na ve, i vategia,
suria igia ka pe tê viteana.
16Na merongaka ka tariha me noga igê na hinua i Tane.
Igia ka rongora noga na hosi iata, ga nagia kuruhi.
Na agua hagenani ki angingi,
matena ga angiangi na hosi mane.
Na merongaka ka râ me, hanana viga hagaerasigi
na apanena iaka ma na ara ni marâ hato igê.”
17Na Araha ki vi:
“Bâ, inê kê hagaguhira na ma tangagamu,
na ma na gara hunu, i asa vige hagamanatara.
Ngaira ka page garegamu.”
O Jeremia ki mesira na ai ni Juta
18Na hetakiha iaku ki asa, vige page hato.
Na aitangihaku ki hata era ngavê.
19Rongo! Suria na agua hagenani
na kariaku ka avaravara, ka vi:
“Na Araha ki mênga vari i Sione?
Na maneraha i Sione ki gâga mênga i ngekana vari?”
Na Araha, i marungira, ki arami, ki vi:
“Renia ta kamu hagamangariê?
Tanu hega mu vogasira na nunuta na ataro
ma kamu hagarapera na harasita na enoni getera,
i asa vige tamanigamu?”
20Na enoni ka ngere, ka vi:
“Igami kami bani opaopa na harisi.
Na matena na arito ru ki bani hato.
Ma igami ki mamênga, vigami tahitahi.”
21Na aitangihaku ki mamasiaga ngavê,
suria ga mamasiaga ngavê na kariaku.
Inê kê gegege ma kê anumanuma ngavê.
22I hato vari na meresini i Gileata?
Na mane mangata ki pe goga vari i ngekana?
Tanu hega na kariaku kani ga pe komaga aporo?
Currently Selected:
JEREMIA 8: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
