JUTITI 9
9
Na avarasiha iana ka Jutiti
1Ka Jutiti ki kuhuia na bêna renigi na rahu, ki tasia râ na tuguni iana, nga noga ma na gahu kakaga iana, ma ki susure ki tubê so i ano. Ngaia ki na matena tanga na vogasiha i manurahi igê na ruma ni rotu i Jerusaleme, ma ka Jutiti ki avaravara raha, ki vi: 2“Araha God iana o Simeone na êvariku, takusia na matena go hagatangarua igê o Simeone renia na tatapa borahu, hanana i barua na siva tangara na me na mahuara ngegana ga ranguia ka Tina na kare viru, ka tasigi râ na tuguni iana ma ka erasia. Ngaira ka tasia ki rupaturi, hanana ga paronga era henia. Ngaira ka tatagarahia bera ma ka hagamakia. Henaka igo ko manimania na tarana ngekana ma ngaira ka katoa. 3Tahema igo ko tagarenira na enoni raha iata tanga na mera. Ga nahuira ka me igê nga na bea ga tatagarahia bera igê na kere gete. Na gaputa ka gahuia na bea. Igo ko mutera hato ngavê: na kare vurivuri henira na avanuta ma na ani ga marungira. 4Na Isiraelita na kariamu go bani atera ma ka agana ngavê ka râ suria na obaniha iamu, ngaira ka henahuraura vê na gete iata henira ka kareta ma ka rurugugi na nahuninga iata. O goana ka Tina ka mangariaga ngavê, suria ga hagamakia vikana na ruma iata. Vikê ngaira ka avarasigo. God iaku, gu aganaria na avarasiha iaku, inê na nâ. 5Igo ko bêngenigi na ara ni marâ hato igê na matena ngekana ma na ara ni marâ hato i nago râ ma i hemuri me. Na marâ hato ga akê me i ngekê ma na marâ ga page akê me, ngaigi ka bani oga me igê na katoha iamu. Na katoha iamu ka moramora me tare. 6Na ani mavê na marâ go obanigi ka akê me noga, ka vivi: “Igami ikê.” Na ara ni marâ go page tanugi ma na ara ni marâ go page katogi, igo ko bani giraragi. 7Bâ, na me ni Asiria ka raramohaga teha ngavê. Ngaira ka paroparo renira na mane ni me igê na hosi ma na mane ni me ga tavo uga. Ngaira ka hagêgurigi ma na tangaruha: na bêata, na ora, na epage ma na hêsigogo. Ma ngaira ka pe girara, vi igo ka na Araha go teha igê na ara ni hearihatana. Na atamu ka na Araha. 8Hoi, na raramohamu ke menamenarira na mane ni me iata ma na mangariaganiha iamu ke hatungia na raramohata. Ngaira ka kato viga hagaerasia na ruma ni rotu iamu, i apuna suria go oga igê, ma ka kato viga tahuru barugigi na sukuni na honi na bea ni vogasiha iamu renigi na tatapa borahu iata. 9Bâ, ngaira ka paroparo ngavê ma ki akê na ageageta. Na mangariaganiha raha iamu ke hitarira. Inê na nâ ma. Gu hagaramoniê, hanana gê akê me bâkoro igê na katoha iaku. 10Gu mutera ngaira hato, na kare rakuraku henira na avanuta, renigi na tamasinga ni hagabekaniha iaku. Na raramohana na gete ke hatungia na paroparoha iata. 11Na raramohamu ki mareha vige hagêgurira na mane ni me gahu ma ramo, suria igo ka na God iata na ani ga nakara so mareta ma ko tamanira na ani na enoni getera ga hagamamasiagara. Igo ko hagaramonira na ani ga pe nahuni ramoha. Igo ko anumasira na ani i bara tangara. Igo ko hagatahira na ani ga hagahagêguri. 12Gu aganaria na avarasiha iaku, igo God iana o Simeone na êvariku, igo God na hagêguringa iata na Isiraelita. Igo ko marungirerua na vavearo ma na ano. Igo ko hagavoregi na ve ma na asi. Igo na Araha ni hagavoraha, gu aganaria na avarasiha iaku. 13Na tamasinga ni hagabekaniha iaku ke hagamamarira ma ke mutera na ani ga harikato bera renirerua na suruheri ma na ruma ni rotu apuna iamu ma renirerua na hungana i Sione ma na agua go bani haganahunira na kariamu renia. 14Na kariamu hato na Isiraelita ma na apaparaha hato iata ke tahetara vi igo ka na God go raramohaga hunigo, na Araha go ramo teha ngavê, ma igo getego ma kanigo anumasira na Isiraelita.”
Currently Selected:
JUTITI 9: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific