JUTITI 7
7
Na ai ni Asiria ka oga rihia i Betulia
1Na tangiana i muri o Holoperenesi ki bonasira na mane hato ni me iana henira na mane ni me ga pane henia, hanana ga tavo uga tanga i Betulia, ka ogasigi na teha ma ka meraheariha na Isiraelita. 2Vikê igê na tangiana ngekana na mane hato ni me iana ka tavo uga. Ngaira ka na 170.000 na me ga tavo uga ma na 12.000 na me igê na hosi ma ka pe tomanira banu me na mane ni me ga bâsurigi na tangaruha ma na toraha. Ngaira ka gahu ngavê. 3Ngaira ka tênga igê na ve banga igê na maruguna hagarangia i Betulia. Na tênga ki raha, haganega tenia i Totane ki tariha i Balabaimi, ma tenia i Betulia ki tariha i Kiamone i maatia na maruguna i Jeserele.
4Matena na Isiraelita ka bâsira na merongata ga rako teha ngavê, ngaira ka magu ngavê ma ka hetamatamasi, ka vi: “E, na mane ni me ngegana ka page sinogi na ara ni marâ hato. Ngaira ka gahu teha ngavê ma na higahigata ka koromenigi na ara ni marâ, na barani na hungani ma na maruguni.” 5Henaka vikana, ma na ara ni Isiraelita hato ka taugi na tangaruha iata. Ngaira ka tangagi na gi surigi na bebetehe ma ka bâbâ nanê suria na bungiana hagenani. 6Na tangiana me nikâ o Holoperenesi ki bêngenira hura na mane ni me hato iana igê na hosi, hanana vi na Isiraelita i Betulia ke bâsira. 7Ngaia ki garigi na tara akê tanga na hinua ma na ve banga tanga na hinua. Ngaia ki têgi na ve banga ma ki nakara na me ka oga hagabarasigi. Hemuri ngaia ki aporo igê na tênga.
8Ngaira hato ga bêngenira na mane ni me ni Etome, ni Moaba ma tenia na tarasini i kereso ka râ i pasina o Holoperenesi ma ka vi: 9“Manga igo go bêngenigami ma ko aganaria na hagaotonga iamami, na mane ni me iamu ki asa vige me. 10Na Isiraelita ngegana ka pe hagêgurigi na tangaruha ma ka hagêgurigi hete na tarihugani na boteni na hungani ga ogasigi, suria na hungani ngegana ka pe mataku vige tagere igê. 11Vikana o Holoperenesi go bêngenira na mane ni me, manga go pe taharira râ nga, na mane ni me iamu ki asa vige me. 12Go gâga nga igê na tênga iamu ma ko bonasira na mane ni me iamu, siana ka huhura tenia na tênga, ma ko bonasira hete ka gâga hagabarasigi na ve banga igê na hariguni na hungani, 13suria na ai ni Betulia ka titi ve i ngegana. Hemuri, matena ga meme suria i marehasira na ve, ngaira ka page tagarenia na hinua iata tangago. Ma igami ma na mane ni me iamami igami kami page tagere igê na boteni na barani rihia na hinua. Igami kami page tênga i ngekana, hanana siana tani ka gavagava tenia na hinua. 14Ngaira hato ka page mesi magêha na mane, na gete ma na kare. Na gahuata ka page manasigi na tara ni hinua ma igia ka kahu taharia. 15Vikana igo ko girara go hagaitangira, suria ga usitenigo ma ka usi vige tagarenira mareta tangago igê na koroha.”
16O Holoperenesi ma ngaira hato na mane ga bêngenira na mane ni me iana ka vi, vi na hagaotonga iata ki koro ma ka aganaria. Vikê ngaia ki haribona vige arâ suria. 17Na me ni Moaba henira na 5000 na me ni Asiria ka râ ka tênga haoru igê na maruguna, hanana ga oga hagabarasigi na ve tangara na Isiraelita i hinua. 18Na me ni Etome me Amone ka tagere igê na hungani ma ka tênga mehetanga na hinua i Totane. Ngaira ka hagatorangenira akê tani na mane ni me iata tanga i Akaraba hagarangia i Gusi i na akerena na ve i Mogomure. Na mane ni me ni Asiria ka oga so ka tênga igê na maruguna. Na tênga iata ki buhia na bena hagenani, suria na ruma na gahu ma na toraha iata ka rako teha ngavê, suria na mane ni me ka gahu teha ngavê.
19Hoi, na Isiraelita ka avarasia raha na Araha God iata. Ngaira ka rumakaka noga, suria i bara tangara vige gava, renia na merongata ka oga rihira. 20Na mane ni me hato ni Asiria, na ani ga tavo uga, na ani igê na kati ni me ma ma na ani igê na hosi ka oga rihia i Betulia surigi na tangiani tangahuru gi oru matare he, mataro me ki hato na ve tenia na hinua. 21Na ara ni agua ga nonganonga igê na ve ka mamata. I asa hagetage vige tono ke tungira. Suria na ve ki abubu, ngaira ka apegi ma na kere agua tangara. 22Na kere kare ka haganega ka arutaveo. Suria na hinua hagenani na gete ma na enoni haoru ka votavota i tara ma igê na mahera, suria i marehasira na ve. I mareha rârâ vi na kere ramoha i pasita.
23Na enoni hato i hinua, na mane ma na gete ma na kare, ka râ i pasita o Usia ma na enoni raha ni hinua ma ka ngere ka vi: 24“God ke hagaitangigamu renia na tarana mu katoa tangagami. Igamu kamu hagamamasiagagami, suria mu pe râ suria na obaniha iata na ai ni Asiria. 25I ngekê ki mareha rârâ vi tani nikâ ge tamanigia. God ki bani nakagia i rimata. Igami ki usi na apemami ma kami mesi tonoha. 26Unira me na ai ni Asiria ma kamu tagarenia na hinua tangara, hanana o Holoperenesi ma na mane ni me iana ke têa na hinua ma ke rurugu igê. 27Manga ga henahuraugia vê ki teharia na ogaha iaka i ngekê. Henaka igia ka vora re na kare rakuraku iata, ki koro ma. Ngaia hete kaniga tahitahi ma ka pe bâsira na gete iaka ma na kareka ge meme i maaka. 28Igami kami tohe renirerua na vavearo ma na ano, renia na Araha iaka, God iata na êvarika i hagaitangigia renigi na bagatauhaka ma na bagatauhata na êvarika, kami nungigamu nga, vigamu katoa i ngekê nga i rikini na marâ mi nungia tenigamu.”
29Na enoni hato i ngekana ka haganega ka angiangi raha ma ka avarasia na Araha God iata. 30Hemuri o Usia ki vi tangara, ki vi: “Goaku, mu piringiape. Ge nanê surigi nikâ na tangiani gi rima, ke bâsia, manga vi na Araha God iaka ki takigia. I asa iana vige kasigia ngavê. 31Manga i pe akê me na hetamaniha i murini na tangiani gi rima, hoi, inê kê page aganaria na tamasinga iami.” 32Vikê o Usia ki vi tangara na enoni ka râ. Na mane hato ka aporo tangagi na atohata igê na para ni hinua ma igê na bebetehe ma na gete ma na kare ka aporo i pasita. Na enoni i hinua ka haga ni rumakaka ngavê.
Currently Selected:
JUTITI 7: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific