ISAIA 66
66
Na Araha ki suria na enoni hato i maveta
1Na Araha ki vi:
“Na vavearo ki na âgâga iaku,
ma na maveta ki na êguga iaku.
Na ruma ta nikâ kani vi mu kahu torea tangê?
Na agua i he nikâ kani vi mu kahu hagarêa tangê,
vigê kahu gâga igê?
2Inê mareku kê hagavorara
na ara ni marâ ka bani goga.
Inê kê marupera na enoni,
ga pe hagarahasira mareta
ma ka angitenigi maninga na tasi iata,
ka hagahigasiê ma ka tê viteaku.
3“Na enoni ka râ suri barisuta.
Tangara ngaira na ara ni marâ ka tagenani ma.
Ngaira ka vogasi renira na puruka
ma renira nikâ na enoni.
Ngaira ka vogasi renira na sipi
ma renira nikâ na o, ga tahuru ngurira.
Ngaira ka vogasi renigi na ngêra
ma renigi nikâ na gaputa na bo.
Ngaira ka susu tangê inê
ma ka rahesira nikâ na ataro.
Ngaira ka râ surigi ma na obaniha iata mareta
ma ka vagevagesigi na tarani na vogasiha,
ga erataga ngavê.
4Tahema inê be hagaitangira.
Na tarani, ga magutenigi bâraha,
ngaigi ka page tarahura,
suria na matena gê unira,
ngaira ka pe aramiê.
Ma na matena gê tamasi,
ngaira ka pe rongoê.
Ngaira ka pe tê viteaku,
ma ka katogi ma na tarani,
gê manimanigi tenira.”
5Mu rongo, igamu na enoni
mu hagahigasia na Araha ma kamu tê viteana.
Na Araha ki tamasi, ki vi:
“Suria igamu kamu toto suriê inê,
tahema kani ga kitegamu na goami
ma ka masesi tenigamu.
Ngaira ka hagaru renigamu, ka vivi,
‘I he nga na raramohana na Araha, i hagatahigamu,
hanana vigami bâsigamu, mu vagevage?’
Ma ngaira hete ka page maki ngavê.
6Rongo! Na ta ki rongo raha i hinua?
Na ta ki rongo raha i Ruma ni Rotu?
Ngaia ki na ringena na Araha,
i hagaitangira na merongana.
7“Sione, na hinua apuna iaku,
ki manga na gete i gasuga ni apara kare
ma ki pe hara renia.
Ngaia ki pe riki hagenago na gerina
ma ki apara me na kare mane.
8Ti ki rigia na tarana ngekana?
Ti ki rongoa?
I hega, igê na agua hagenani ki girara vari
i voravora me igê na tangiana gi tage togo?
Sione ki riki râ na gerina
ma ki aparara na karena.
9Siana kamu takusia,
vi inê kê nakara na gete ka harate kare
ma kê pe nakara ke aparara.
Mu takusia vari,
vi inê kê nakara na gete ka obara
tanga vi ga pe apara kare?
Ngaia kani gê visia inê na Araha.”
10Manga mu makuania Jerusaleme,
hoi, mu vagevage henia i ngekê
ma kamu ageagesia.
Manga mu bani angi maramara renia,
hoi, mu vagevagesia i ngekê.
11Na ramana igê ki page tungigamu ngavê,
manga na kare i susu masu i pasina kenana.
Mu page vagevagesia na ramana, i page aharêsigamu.
12Na Araha ki vi:
“Inê be katoa na ramana ke aharêsigamu
manga na ve oto, i gogogo tare.
Na ruruguha ma na nahuninga iata na enoni,
ga oga igê na agua getigi i maveta,
ka page uguni me tangagamu manga na ve oto,
i asa vige page mamata.
Igamu kamu page manga na kare,
i susu i pasina kenana.
Kenana ki puma ma ki hagabarea.
13Inê be hagarekogamu i Jerusaleme,
manga na kena ni kare i hagarekoa na karena.
14Igamu kamu page obakoro,
matena mu bâsia igê na tarana ngekana,
ma kamu page apeape hahaoruga aporo,
manga na go i baogo haoru.
Ma igamu kamu page aitangisiê,
vi inê na Araha kani gê tamanira na kariaku
ma kê hagagirarara na merongaku
renia na mangariaganiha iaku tangara.”
15Na Araha ki page arâ me manga na anguruna na gi.
Na kati, i tagiria, ki manga na roga raha,
hanana i hagaitangira na ani, i mangariaga tangara.
Na mangariaganiha iana ki page manga na gi.
16Ngaia ki page surira na enoni hato i maveta.
Na ani ga eratage, ngaia ki page hagaitangira
renigi na gi ma na tatapa borahu.
Ma ka page rako na ani ga meme.
17Na Araha ki vi:
“Sugia ma vige mutemute
na ani ga hagamatarotarora mareta,
hanana viga vogasira na ataro,
na ani ga bêbê hesurisuri tangagi na mu,
hanana viga susu igê tangara na ataro,
na ani ga ngaura na bo, na kiki,
ma na ganiani getegi, gê manimani tenira.
18Inê kê bani giraragi na aitangihata ma na tauhata.
Inê kê râ me, hanana gê hagahakura na enoni,
ga oga igê na agua hato getigi i maveta.
Matena ga hakuhaku me,
ngaira ka page bâbâ menana na raramohaku.
19Ngaira ka page tahetare reniê,
vi inê nga kani gê hagaitangira.
“Inê kê page hagahitara tani na hitangita,
hanana gê hagatorangenira tangagi na agua hagatê,
tangara na enoni ga hiteniê,
ga pe rongo kuruhaku,
se vige pe rigigi na bâbâhaku ma na raramohaku.
Inê be hagatorangenira i Sipeni, i Libia, ma i Litia,
ga oga igê na mane, ga manisingenigi na epage ma na mage,
ma i Tubala ma i Agaia.
Ma i ngegana ngaira ka page taroheniê igê,
vi inê kê raramohaga huniê.
20Ngaira ka page mera aporo me na goami hato
tenigi na agua, ga bani henahuraura tange.
Ngaira ka page torera aporo me
manga na votovoto tangê
igê na hungana apuna iaku i Jerusaleme.
Ngaira ka page torera aporo me
igê na hosi, igê na tonki, igê na kamelo,
igê na kati ma igê na kati ni me.
I tagenana ma mangara na Isiraelita
ga toregi me igê na marâ matarotaro
na ngêra, na votovoto tanga na rotu.
21Tani na hitangita inê kê page kasira
ka voravora re na mane ni vogasiha
ma tani ka voravora re na mane ni hagarahenga.
Ngaia kani gê visia, inê na Araha.”
22Na Araha ki vi:
“Na maveta haoru ma na vavearo haoru,
gê page hagavorarerua,
ngairerua ki asa hagetage, vigaru page hato.
I tagenana ma na raraha iami ma na atami
ngaira ki asa hagetage nikâ, vige page hato.
23Igê na ara ni matena i rikiriki me na hageha
ma igê na ara ni Tangiani ni Mamaroha
na enoni hato i maveta ka page rahesiê,
ikê i Jerusaleme.
Ngaia kani gê visia, inê na Araha.
24Matena ga aporo,
ngaira ka page bâsigi na gahuata na enoni,
ga guguruga bâraha tangê.
Na mamagata ki asa vige page me.
Na gi, i ngaugi, ki asa vige page hunuia.
Na enoni hato i maveta ka page kakahuru renigi.”
Currently Selected:
ISAIA 66: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific