HOSEA 7
7
1“I na ara ni matena
inê kê obania be hagakomagara na Isiraelita
ma be vatera aporo na ramana,
ma kê tarahugi ma na bagaparongata ma na erahata.
Ngaira ka hogegi na ruma ma ka hanago.
Ngaira ka nahuira na enoni i tara ma ka hanago tenira.
2I asa hagetage, vige takusia,
vi inê kê nakagi i obaku na bagaparongata hato ngegana.
Ngaira ka tu igê na eraha.
Inê kê bâsigi tare na bagaparongata.”
Na enoni ka hagaparua na maneraha
3Na Araha ki vi:
“Na enoni ka hagakoro obana na maneraha,
matena ga harikato renia.
Ngaira ka nakanaka bêta tangara na enoni raha,
matena ga katokato pinihi renira.
Ngaira hatohato ka hagahagaparu tare.
I asa hagetage, vige tongesurira.
4Ngaira ka manga na gi, i tangatanga igê na êmu.
Na enoni, i hagamako ngêra, ki surungia,
matena i suhisuhi hato na ngêra.
5Matena ga hagahigasia
na tangiana iana na maneraha, i rârâhira igê,
ngaira ka hagatonomira na maneraha ma na enoni raha
renia na vaini, ki ruguhira ka bekabekaga.
6Na kiteniha igê na aitangihata
ki manga na gi igê na êmu.
Igê na bungiana hagenani na mangariaganiha iata
ki manga na gi, i tangatanga,
ma igê na mahogotana ki vatavata.
7Suria ga mangariaga ngavê,
ngaira ka nahuira ka me na maneraha iata.
Ngaira hato na maneraha iata ka me hagetage,
ma ki asa na hitangita, vige avarasiê.”
Na Isiraelita ka tako togo renira na enoni ga pe Siu
8Na Araha ki vi:
“Na Isiraelita ka hetorariga
henira na enoni, ga pe Siu.
Ngaira ka manga na ngêra, i mako okaga.
9Ngaira ka tako togo renira na ai mahuara,
ma ka pe girara, vi na tarana ngekana
ki bani hatungia hete na raramohata.
Ngaira ka mangara na gemêa ma ka gohogohoraga.
Ma ngaira ka pe girara nga.
10Na paroparoha iata ki ranganira.
Naka ma ga bani tarahura na bagabevoani,
ngaira ka pe urisi parongata,
ma ka pe aporo me tangê,
inê na Araha God iata.
11Na Isiraelita ka manga na kuvê,
i tugupu ma ki pe takotako.
Tani na mateni ngaira ka avarasira na ai ni Esipito,
ma tani na mateni ka avarasira na ai ni Asiria.
12Ma inê be naka na basu iaku
ma be basuira mangara na manu.
Inê be hanasira mangara na manu,
ma be hagaitangira renigi na bagatarihata.
13“I page era ngavê tangara,
suria ga bani kasi reniê.
I page era ngavê tangara, suria ga bani usiteniê.
Inê kê obania, vigê hagatahira,
ma ngaira ka rahesiê hagaparu ma.
14Ngaira ka pe avarasiê maninga
i mêrihata hagenani.
Ngaira ka hagata ma ka marumaru
mangara na enoni ahuroto.
Ngaira ka nungigi na ngêra ma na vaini,
ma ka tapitapira mareta
mangara na enoni ahuroto, matena ga hagarahe.
Ngaira ka guguruga ngavê tangê.
15Henaka inê kê marupera ma kê hagesurira
ma kê hagaramonira nikâ,
ma ngaira ka harikato reniê.
16Ngaira ka kasi reniê,
ma ka hagarapera na ataro,
i asa, vige tamanira.
Ngaira ka makevokevo manga na epage.
I asa, vige tako togo renira.
Na maneraha iata ka page me igê na henahuita,
suria ga tamasi paroparo ma ka guguruga tangê.
Ma na ai ni Esipito ka page rurusira.”
Currently Selected:
HOSEA 7: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
