HOSEA 2
2
Na Isiraelita ma na ai ni Juta ka page haku aporo
1Na Isiraelita ka page rako mangagi na one i asi.
I asa ta na enoni, vige tomanigi,
se vige hagararingenigi.
God ki vi tangara, ki vi,
“Igamu kamu mareha vi na kariaku.”
Ma i ta na tangiana God ki page vi tangara vikê,
“Igamu ka na kariana na God mamauri.”
2Na ai ni Juta ma na Isiraelita
ka page haku aporo.
Ngaira ka page kasia na ani gi tage na mane,
ki page marungira ngaira hato.
Ngaira ka page rakorako ma ka page ramoramo,
ma ka page oga igê na ramana.
Na tangiana ni Jeserele
ki page vora na tarana raha teha!
3Igê na matena ngekana
gu hêtata na goamu vi:
“Kariana God.
God ki takuigamu.”
God ki ramonira na Isiraelita ga pe toto suria
4Na Araha ki vi:
“Kareku, mu ramonia kenami,
ma kamu rangania.
Ngaia ki hato vi na gete iaku nikâ,
ma inê kê hato vi na mane iana nogaku.
Mu ramonia!
Siana ki gamogamo nikâ,
ma siana ki êrâ nikâ.
5Manga i mareha,
inê kê tasitasia ki rupaturi
manga matena i vora me.
Inê kê katoa, ki gomara
manga na mako pusuga,
i avagavaga renia na arito.
Ma ngaia ki page meme,
renia i mamata na riona.
6I asa be takuira nikâ na karena,
suria ga gamogamo manga kenata.
Ngaira ka pe toto suriê.
7Kenata ki na êrâ ma ki pe tangahuria.
Ngaia ki vi,
‘Inê be surira na mane.
Na tamaku ngegê ka page vateê
na ngêra ma na ve,
na tuguni ma na gahu,
na oile ni olive ma na vaini.’
8Tahema inê be ravoravo pusia
renigi na apinige kakaruga,
ma be naka na panga na hê pusia,
hanana i hagabarasigi na tara.
9Ngaia ki page gogo surira na tamana mane,
ma ki bara tanga, vige matarohira.
Ngaia ki page bâbâ renira
ma ki asa vige tarahura.
Ma hemuri ngaia ki page vivi,
‘Inê be aporo tanga na mane iaku monari,
suria na mêriha iaku henia
ki koro teharia na mêriha i ngekê.’
10Ngaia ki hagaigê, vigê pe vatea
na koni, na vaini ma na oile ni olive.
Ngaia ki hagaigê, vigê pe vatea
na siliva ma na golo,
i tagarahia renigi na nununa o Bala,
na ataro i vogasia.
11Tahema inê be toregi aporo na votovoto iaku:
na koni matena ga maua
ma na vaini matena ga mamata.
Ma be toregi aporo na tuguni ma na gahu,
i hagesuru ma ki tuguni re.
12Inê be tasitasia ma be hagamakia
i maata na tamana mane,
ma ki asa na hitangita,
vige hagatahia tenia na raramohaku.
13Inê be hatungigi na ara ni tangiani raha
henigi na magotoha,
na tangiani raha igê na harisi,
na tangiani raha ni hageha haoru,
na tangiani ni mamaroha,
ma na tangiani raha na rotu.
14Inê be erasigi na pariki ni vaini ma ni fiki iana,
suria ngaia ki vi,
vi na tamana mane ka vatea manga vi na mena tanga.
Inê be katogi na pariki ngegê,
ke vora manga na masusu hêga,
ma na marâ vasiga i bemu ka page oka.
15Inê be hagaitangia renigi na mateni
i bonoteniê igê,
ki vogasira igê na ataro,
ki susu tangara,
ma ki rêni bâkoro,
hanana vi gogogo surira na tamana mane.
Hoita, gê vi inê, na Araha.”
Na Araha ki takuira na kariana
16Na Araha ki vi:
“Tahema inê, na Araha, be hagamua,
ma be me aporo igê na masusu raha,
ma be katoa, ke takuiê nikâ.
17Inê be vatea aporo na pariki ni vaini,
ma be katoa na Maroguna ni Eraha,
ke vora na tara ni Naasiha Koro.
I ngekana ngaia ki page barua na takuiha iaku
manga i nago matena i kare viru
ma ki hura tenia i Esipito.
18Vikê ngaia ki page visiê aporo nikâ,
vi inê o vaniana,
ma ki hato hagetage, vi ngaia ke visiê,
vi inê na Bala iana, na avanuna.
19Ma inê kê vivi pusia,
siana hagetage ki visia nikâ na atana o Bala.
20“I na matena ngekana
inê be naka na suruheri henira na manu hato
ma henira na marâ vasiga i bemu
ma henira na marâ hato, ga angoango i ano,
hanana siana ka erasira na kariaku.
Tenia na agua inê be toregi
na ara ni tangaruha hato,
na ara ni tatapa borahu ma na epage ni me,
ma be katora na kariaku,
ke oga igê na marapeha ma na ramana.
21Isiraele, inê be torego manga na gete iaku.
Inê be hagahigasigo ma be toto surigo.
Inê be mesigo ma be takuigo tare,
ma be katogo, ko vora nga na aniku tare ma tarema.
22Inê be hagamonaria tare na suruha iaku,
ma be katogo, ku vora nga na aniku,
ma ko page hagêguri togo reniê,
inê na Araha.
23I na matena ngekana inê be aganarigi
na nunginungi iata na kariaku, na Isiraelita.
Inê be hagarangisia na ano.
24Ma na ano ki page hagarakonigi
na koni, na vaini ma na oile ni olive.
25Inê be haganahunira na kariaku renia na agua,
ma be katora, ke oga igê na ramana.
Inê be takuia na ani ga bani hêtana vi ka Petakuia.
Ma tanga na ani, ga bani hêtata vi Varomu,
kê page vi, ‘Igamu nga na kariaku.’
Ma ngaira ka page arami, ka vivi,
‘Igo nga na God iamami.’”
Currently Selected:
HOSEA 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
