HOSEA 13
13
Na hagaitangiha tangara na Isiraelita
1I nago, matena ga tamasi na aparaha iana o Eparaimi,
na ani getera na aparaha i Isiraele ka magu,
suria ngaira ka hagahigasira.
Ma ngaira ka haganega ka vogasia na ataro o Bala,
ma na tarana ngekê ki hagatasira.
Tahema na mera ki tarahura.
2Ma ngaira ka ama ni tasitasi nga,
suria ngaira ka tagarahigi na nunuta na ataro,
hanana ga vogasira.
Na enoni ka takusigi ma ka tagarahigi
ma ka vivi, “Mu vogasira!”
Tanu hega na enoni ki girara i siginigi
na nunuta na puruka mane!
3Tahema na enoni ngegê ka page magahuru
manga na vaha i mavoraro,
se manga na kârupu,
i magahuru, matena i tangitangi raha.
Ngaira ka page mangagi na gahuni na koni,
i toregi vê na roga, matena ga kangikangi,
se manga na robona na gi.
4Na Araha ki vi:
“Isiraelita, inê nga ki na Araha God iami.
Inê nga kê toregamu hura tenia i Esipito.
Inê geteê nga ki na God iami.
Inê geteê nga kê hagatahigamu.
5Inê nga kê marupegamu
igê na masusu avagavaga.
6Ma na matena mu arâ igê na agua na mako koro,
igamu kamu ngêngê masu,
ma kamu tongesurigamu maremi,
ma kamu paroparo,
ma kamu pe botage reniê.
7Tahema inê be ngasigamu manga na laione.
Inê be gamorahigamu manga na marâ vasiga ngegana.
8Inê be garegamu manga na o raha,
i mangariaga, matena ga torera na karena,
ma be ohegamu.
Inê be ngê kusikusi renigamu manga na laione.
Inê be ngasigamu mangara na marâ vasiga i bemu.
9“Isiraelita, inê be hagaerasigamu ngavê!
Ti ki page tamanigamu? Mareha vê!
10Na maneraha iami vari?
I he ngaia, hanana i tamanigamu?
Na enoni raha iami vari?
I he ngaira, hanana ga hagatahigamu?
11Matena gê mangariaga, inê kê vategamu na maneraha,
ma igê na mangariaganiha iaku
inê kê tavora hura tenigamu.
12“Ga bani segegi so na bagatarihata na Isiraelita.
Na sihonga renigi na tasi iata
ka bani naka bâkoro râ ki tâ.
13Na Isiraelita ka bonobonoga,
suria i bâ, manga viga usitenia na mauriha.
Ngaira ka maratorana na kare i pe gusure,
matena kenana ki harahara tenia,
ma ki usi, vige vora me.
14Vikê ki asa be hagatahira
tenia na agua iata na enoni, ga me,
se vi tenia na raramohana na mera.
Mera, gu migirâ me na ringa iamu!
Gu migirâ me na hagaitangiha raha iamu!
Inê ki hato, be tako renira nikâ.
15“I ngekê na Isiraelita ka mauri bâkoro vari
mangagi na rauga, ga taka.
Ma inê, inê na Araha,
be hagatorangenia na roga mahana
tenia i kerekê, tenia na masusu raha.
Ma na roga ngekê ki page hagamamatarigi
na ve banga ma na ve karu iata.
Na ngêra ma na ruruguha ma na nahuninga iata ka page hato renia.
16Na ai ni Samaria ka page hatamia na mamasiaganiha,
suria ga guguruga bâraha tangê.
Ngaira ka page me igê na hearihatana.
Ga page rahutenira i ano na kare gari iata,
ma na gete, ga obara, ka page tatahura.”
Currently Selected:
HOSEA 13: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
