HAGONEGAHANI 42

O veogana o Josepo ka tabe vuriha ni koni i Esipito

1Matena o Jakobo ki rongo, vi na ngauha ki gâga i Esipito, ngaia ki vi tangara o karena, ki vi: “Siana kamu oga purupuru! 2Inê kê rongoa, vi na ngauha ki gâga i Esipito. Mu râ igê ma kamu vuri tani, hanana siana vi igia ka mesi magêha.” 3Vikê o veogana o Josepo ka râ i Esipito hanana ga vurivuri igê na ngauha. 4O Jakobo ki pe hagatorangenia henira o Benamino o vesina nga o Josepo, suria i magu vi era ma ki togâna ta na tarana.

5O karena o Jakobo ka râ henira na enoni getera, hanana viga vurivuri ngauha, suria na magêha ki tarahua i Kanani. 6O Josepo ki hagavuri ngauha tangara na enoni hato i maveta, suria ngaia ki onosuria i Esipito. Hoi, matena o veogana o Josepo ka ata râ, ngaira ka tubê so i ano tanga. 7Matena o Josepo ki bâsira o veogana, ngaia ki bâgirarara, ma ngaia ki kato manga vi ngaia ki hitenira. Ngaia ki hagate ramo, ki vi: “I he mu râ me igê?”

“Ngaira ka arami, ka vi: “Igami kami râ me tenia i Kanani, hanana vigami vurivuri na ngêra.”

8Henaka o Josepo ki bâgirarara o veogana, ma ngaira ka hitenia. 9Ngaia ki takusigi aporo na maruteha iana renira ma ki vi: “Igamu kamu râ bâbâ me ikê! Vari igamu obania vigamu tarahua na agua i ararigamu, vigamu taharia igê na agua iamami.”

10Ngaira ka arami, ka vi: “Mareha rârâ, maneraha! Igami kami râ me mangara na kare rakuraku iamu, hanana vigami vurivuri ngêra. 11O vahegoata hato kanigami. Maneraha, igami kami pe râ bâbâ me! Igami kami vi monari.”

12O Josepo ki vi tangara, ki vi: “I asa vê! Igamu kamu râ me, hanana vigamu tarahua na agua i ararigamu, vigamu taharia igê na agua iamami.”

13Ngaira ka vi: “Maneraha, igami hato o vahegoata tangahuru matarerua. Igami ka no karena na mane gi tage togo i Kanani. Na vere tage na hitangimami ki me, ma o vesimami hagemuri ki oga vê henia o vaemamami.”

14O Josepo ki arami, ki vi: “Ngaia kanigê bani visia! Igamu kamu râ bâbâ me! 15Hoi, be uhungigamu vikê. Inê kê tohe renia na maneraha, i asa hagetage vigamu aporo i pasimi, nga noga i arâ me igê o vesimi hagemuri. 16Na hitangimi ke râ ke merâ me. Na ani mu gâga so kamu page gâga i ruma ni hagaitangiha mataro me kê tarahua, vi na tamasinga iami ki monari. Manga i mareha, hoi inê kê tohetohe renia na maneraha, vi igamu kamu râ bâbâ me.” 17Hato vikana, ma ngaia ki kasira i ruma ni hagaitangiha, ka oga igê surigi na tangiani gi oru. 18Igê na oruta na tangiana o Josepo ki vi tangara, ki vi: “Inê na mane gê hagahigasia God. Inê be hagatahigamu, manga vi igamu ma kamu katokato vikê. 19Manga i monari, vi igamu kamu pe hagaparu, hoi, na vere tage na hitangimi ki gâga so nga ikê i ruma ni hagaitangiha, ma igamu na ani getegamu, mu aporo i pasimi ma kamu migirâ na koni, mu bani vuri tangara na ahemata iami, ga mesi magêha. 20Ma kamu kahu merâ me nga o vesimi hagemuri. Na tarana ngekê ki page hagatanga monari, vi igamu kamu vi monari. Vikana inê ki asa be hagamesigamu.”

Ngaira ka aganaria, 21ma ka hetamatamasi ka vi: “Bâ, i ngekê ki tarahugia na mamasiaganiha, suria i nago igia ka katoa bera o vesika. Igia ka bâsia na mamasiaganiha iana, matena i avarasigia, ma igia ka usi. Tahema i ngekê ki tarahugia na mamasiaganiha.”

22O Rubeni ki vi: “Inê kê bani vi tangagamu, vi siana kamu katoa bera o vesika, ma igamu kamu pe tê viteaku. Tahema i ngekê igia ka hatamia na mamasiaganiha, suria i me.” 23O Josepo ki aitangisia na tamasinga iata, ma ngaira ka pe girara, vi ngaia ki aitangisia, suria ta na mane ki hagatarê tamasinga iata tanga o Josepo. 24O Josepo ki kariarigu vê ki râ tenira, ma ki haganega ki angi. Matena i angi hato, ngaia ki aporo me. Ngaia ki asiria me o Simeone ma ka rakua i maata.

O veogana o Josepo ka aporo i pasita i Kanani

25O Josepo ki haribona, ka hagavunusigi na anga iata o veogana renigi na koni ma ka nakagi aporo na haga na meni surigi na anga iata ma ka vatera na suarita i tara. Nga i hato vikana. 26Na vahegoata ka hagaruta na koni, ga vurigi, i gerita na tonki iata ma ka râ. 27I manurahi igê na agua ga tako ni mêru igê, na hitangita ki tangahia na anga iana, hanana vi hagangêa na tonki iana, ma ki tarahua na haga iana igê na maana na anga. 28Ngaia ki hagagasuganira o veogana, ki vi: “E, na haga iaku ka naka aporo me igê na anga iaku, Bâ, ikê!” Ngaira ka gasuga ngavê, ka magu ma ka hehagateri, ka vi: “God ki katogia mara ta?”

29Matena ga ata i Kanani i pasina o vaemata o Jakobo, ngaira ka hagarongoa renigi na ara ni tarani i tarahura. 30Ngaira ka vi: “Na mane i onosuria i Esipito ki tamasi ramo tangagami ma ki torahurigami, vi igami kami râ bâbâ me i ngekana. 31Igami kami aramia, kami vi, ‘Mareha, igami kami pe râ bâbâ me. Igami ka na mane mi koro. 32Igami hato ka no vahegoata tangahuru matarerua. O vaemamami ka na mane gi tage. Na vere tage na hitangimami ki me, ma o vesimami hagemuri ki oga vê i Kanani henia o vaemamami.’ 33Na mane ngekana ki arami, ki vi, ‘Ngekana nga hanana vigê obania gê tarahua, vi igamu kamu vi monari, na veretage na hitangimi ki gâga so ikê. Ma igamu na ani mu arâ kamu migirâ na koni tangara na ahemata iami ga magê. 34Mu meaporo me o vesimi hagemuri, hanana gê girara, vi igamu ki mareha vigamu râ bâbâ me, ma vi igamu ka na mane mu vivi monari hete. Inê kê page vategamu aporo na ani i oga so ikê, ma igamu kamu girara mu gâga ikê ma kamu arârâ suri parongami igê na agua iamami.”

35Ma hemuri matena ga tangahigi na anga iata, na ara ni hitangita ki tarahua na anga ni haga iana marena. Matena ga bâsigi na haga, ngaira ma o Jakobo o vaemata ka magu. 36O vaemata ki vi tangara, ki vi: “Mu obaniê vari vigê magari renira na kareku hato? Bâ o Josepo ki bani magahuru. O Simeone ki bani magahuru. Ma i ngekê igamu kamu obania, vigamu torea vê nikâ o Benamino teniê. Na ara ni mamasiaganiha ka akê agani me tangê ma inê!”

37O Rubeni ki vi tanga o vaemana, ki vi: “Manga vi inê ma kê pe meaporo me o Benamino tangago, hoi, girara go hagamesirerua o kareku. Gu naka vê tangê. Inê kê page meaporo me.

38Ma o Jakobo ki vi: “Inê kê manimania o kareku, vige râ henigamu. O veogana ki bani me ma ngaia gi tage ma kani gâga. Inê kê merahaga. I era ma ta na marâ tarahua i tara. Manga i manga ngekana, inê kê page mesi hetakiha, suria ma igamu nge.”

Currently Selected:

HAGONEGAHANI 42: KCB

Highlight

Copy

Compare