HAGONEGAHANI 24
24
O Isako ki êragia ka Rebeka
1O Abarahamo ki merahaga ngavê. Na Araha ki tamania, ka tavoraha bâkoro na ara ni marâ hato i katogi. 2O Abarahamo ki vi tanga na kariana i teha na harisi iana ma ki onosurigi na nahuninga hato iana, ki vi: “Gu naka na rimamu i berarogaterua na tangaku ma ko tohetohe. 3Inê kê obanigo, vigo tohetohe renia na Araha God i hagavorarerua na vavearo ma na ano, vi siana ko atea so na gete ikê i Kanani tanga o kareku. 4Gu arâ hete igê na agua gê vora igê, ma ku atea igê na gete i berarogata na goaku tanga o kareku o Isako.”
5Ma na kariana ki hagate, ki vi: “Ma ki hega manga vi na gete ma ki usi vige pania i pasina, hanana vige râ me heniê ikê? Ki hega, i araria ma gê kasia aporo vari o karemu tanga i pasimu?”
6O Abarahamo ki arami, ki vi: “Siana hagetage! Siana ko kasia aporo râ o kareku i ngekana! 7Na Araha i hagavora na vavearo ngaia ki toreê hura tenia i pasina vaemaku ma tenia na mako iata na goaku. Ngaia ki suru tangê, vi haganahunira na raraha iaku renia na mako ikê. Ngaia ki page hagatorangenia na angero iana i nago taramu, hanana go tarahua na gete i ngekana tanga o kareku. 8Manga vi na gete ma ki usi vige râ me henigo, na tohenga iamu ki hatohato tenigo. Ma siana hagetage ko meaporo o kareku i ngekana.”
9Vikana na kariana ki naka na rimana i berarogaterua na tangana o Abarahamo ma ki tohe vi ngaia ki arâ surigi na tamasinga iana o Abarahamo.
10Ma hemuri na kariana, i bâsurigi na nahuninga iana o Abarahamo, ki râ. Ngaia ki merarâ na kamelo tangahuru gi tage henigi tani na mahatanga koro iana o Abarahamo. Ngaia i râ tanga na hinua, i oga i nago igê o Nagore vesina o Abarahamo. Na hinua ngekana ki oga i Arama-Naharaimi i Mesopotamia. 11Matena i ata vê i ngekana, ngaia ki nakara na kamelo ka tâ so i ano hagarangia na ve karu i na apanena hura na hinua. Ma ki manurahi me. Ngaia ki na matena iata na gete ga huhura me tenia na hinua ka titi ve. 12Ngaia ki nungi, ki vi: “Araha, igo God iana na maneraha iaku o Abarahamo, gu katoa, ke togo na râha iaku i ngeke ma ku hagamonaria na suruha iamu tanga na maneraha iaku. 13Inê kê oga ikê igê na vekaru. Na kare viru i hinua ka sugia ma vige huhura me ke titi ve. 14Inê kê page vi tanga na hitangita, kê vivi: ‘Bagakare, gu kisia me na pi na ve be tono.’ Ma inê kê nungigo, hanana go katoa na ani go bani atea tanga na kariamu o Isako ki aramiê, ki vi, ‘Gu tono ma be hagatonomira nogata na kamelo iamu.’ Vikana inê kê girara, vi igo ko hagamonaria na suruha iamu tanga na maneraha iaku.”
15Matena i nunginungi mênga, ma ka Rebeka ki meata me na pi ni ve igê na gaparana. Ngaia kani ka kareterua o Betuele, karena o Nagore, o vesina o Abarahamo, ma ka Milika kaniana. 16Ngaia ki na tohona na kere gete. Ngaia ki na kere gete tatara, i mamênga vige arâ henia na mane. Ngaia ki so tanga na vekaru ki tia hato na pi ni ve iana ma ki bê aporo. 17Na kariana o Abarahamo ki tango vurusia, ma ki vi tanga, ki vi: “Gu nakê be tono noga igê na pi na ve iamu.”
18Ngaia ki arami, ki vi: “Ia, gu tono.” Na kere gete ki kisia na pi na ve i gaparana ma ki têa tanga ki tono. 19Matena i tono hato, na kere gete ki vi: “Inê be ti ve nikâ tangara na kamelo iamu, hanana ga totono nogata ki ararira.” 20Ngaia ki hata ni karangia na pi na ve iana igê na maraguhu ni tonoha iata na kamelo ma ki tango ki râ ki uriringenia na ve, mataro me na kamelo ka tono ki ararira. 21Na mane ki muni so ma, ma ki boretenia, hanana i girara, vi na Araha ki katoa ki râha koro.
22Matena na kere gete ki hagatonomira hato na kamelo, na mane ki tavoa akê na eburungi na golo i raha era na mena, ma ki naka râ i barisuna na kere gete, ma ki tarasirerua na rago na golo tonganigi na rimana, 23ma ki vi: “Be hagatego, ti o vaemamu? I hega, na ruma iana ki ararigami na me iaku menê, hanana vigami mauru igê?”
24Ngaia ki arami, ki vi: “O vaemaku ka no Betuele kareterua o Nagore ma ka Milika. 25Na bêni na rauga ma na agata na kamelo ka aharêsigami ngavê, ma na agua ni mêruha ki oga tangagamu.”
26Ma na mane ki susure ma ki rahesia na Araha, ki vi: 27“Ge hagarahasia na Araha, God na maneraha iaku o Abarahamo i rahesia, suria ngaia ki hagamonaria na suruha iana tanga na maneraha iaku. Na Araha ki hagaotoê, hanana gê tarahua na goana na maneraha iaku.”
28Na kere gete ki tango râ i pasina ma ki hagarongo i ruma iana kenana. 29O Labani o veogana ka Rebeka ki hura ma ki tango râ tanga na ve karu, na agua i oga igê na kariana o Abarahamo. 30O Labani ki bani bâsigi na eburungi i barisuna kesina ma na rago i rimana ma ki bani rongogi na marâ i visigi na mane akana tanga. Ngaia ki râ i pasina na kariana o Abarahamo i ura henira na kamelo iana hagarangia na ve karu, 31ma ki vi tanga, ki vi: “Râ me karu ata i ruma. Igo nga na mane, i koro ngavê tangago na Araha. Tanu hega go oga ma ikê. Inê kê bani hagarêa na agua tangago i ruma iaku ma tagua nikâ tangara na kamelo iamu.”
32Hoi, na mane akana ki banu i ruma. O Labani ki têtê râ na toraha iata na kamelo ma ki hagangêra renigi na bêni na rauga ma na agata. Ma hemuri ngaia ki torea me na ve tangara na kariana o Abarahamo ma na me iana, ka tanani uga igê. 33Matena ga tora me na ngêra, na kariana o Abarahamo ki vi: “Be visia hagenago na tarana gê râ me tanga, ma hemuri kê kahu ngêngê.” O Labani ki vi: “Hoita, koro ma.”
34Ma ngaia ki vi: “Inê ki na kariana o Abarahamo. 35Na Araha ki koro teha ngavê tanga na maneraha iaku ma ki katoa ki ruruguha ngavê. Ngaia ki haganahunia renira na totoha ni sipi, ni goti ma ni puruka, ma renigi na siliva ma na golo, ma renira na mane vurivuri ma na hehene vurivuri, na kamelo ma na tonki. 36Ka Sara na gete iana na maneraha iaku. Matena i gemêa, ngaia ki apara na kare mane tanga. Na maneraha iaku ki haganahunia o karena renigi na ara ni nahuninga hato iana. 37Na maneraha iaku ki katoê kê tohe, hanana vi siana kê atea na kere gete i Kanani tanga o karena. 38Ngaia ki bonasiê, hanana gê arâ hete i pasita na goana ma na raraha iana o vaemana, hanana gê atea na kere gete i berarogata tanga. 39Inê kê hagatea na maneraha iaku, kê vi: ‘Manga i he manga vi ngaia na kere gete akana ma i usi vi ve merâ me?’ 40Ngaia ki aramiê, ki vi, ‘Na Araha nga gê totosuria, ngaia kani page kasia na angero iana, ki arâ henigo ma ki katogo, ko râha koro. Igo ko girara ma go tarahua na kere gete tanga o kareku i berarogata na goana ma na raraha iana o vaemaku. 41Manga vi na kariana na kere gete ma ka manimania, na tohenga iamu ki hatohato tenigo.’
42I ngekê matena gê atata râ igê na vekaru, inê kê nunginungi, kê vivi, ‘Araha, igo na God na maneraha iaku o Abarahamo i rahesigo. Gu katoê be râha koro. 43Inê kê oga igê na vekaru ikê. Manga vi na kare viru ki arâ me ki titi ve, inê kê page nungia, kê totono na ve igê na pi na ve iana. 44Manga vi ngaia ma ki nakê kê totono ma ki vivi, vi hagatonomira nikâ na kamelo iaku, hoi, go katoa ki vora nga, vi ngaia ka na ani, go atea tanga o karena na maneraha iaku.’ 45Matena gê nunginungi munimuni mênga, ma ka Rebeka ki mêra me na pi ni ve i gaparana ma ki so ki tia igê na ve karu. Inê kê vi tanga, kê vi, ‘Gu nakê be tono.’ 46Ngaia ki hata ni kisia na pi na ve i gaparana, ma ki vi, ‘Ia, gu tono, ma be hagatonomira nogata ma kamelo iamu.’ Menê kê tono, ma hemuri ngaia ki hagatonomira na kamelo. 47Inê kê hagatea, kê vi, ‘Ti vaemamu?’ Ngaia ki arami, ki vi, ‘O vaemaku ki no Betuele kareterua o Nagore ma ka Milika.’ Ma hemuri inê kê naka na eburungi i barisuna ma kê tarasirerua na rago tonganigi na rimana. 48Inê kê susure ma kê rahesia na Araha. Inê kê hagarahasia na Araha, na God na maneraha iaku o Abarahamo i rahesia, suria ngaia ki hagaotoê, hanana gê tarahua na goana na maneraha iaku. I pasina inê kê tarahua igê ka karena tanga o karena na maneraha iaku. 49Hoi, manga vi igamu, ma kamu agana kamu hagabângenia, vi marâ era na apemi renia na maneraha iaku, mu visia me tangê. Ma ki manga mu usi, hoi, mu visia me nikâ. Ngekana inê kê page girara na tarana ta ki tuguhiê vige katoa.”
50O Labani mo Betuele karu arami, karu vi: “Suria na tarana ngekê ki râ me tenia na Araha, tahema ki pe oto tangagami, vigami visia nikâ na ta. 51Ka Rebeka ikê. Gu mêra, ke êragia o karena na maneraha iamu suria na tamasinga iana na Araha.” 52Matena na kariana o Abarahamo ki rongo vikana, ngaia ki susure ma ki rahesia na Araha. 53Ma hemuri ngaia ki tavogi kê na gahu, na rêni, na siliva ma na golo ma ki vatea ka Rebeka. Ngaia ki vatererua nikâ kenana mo veogana ka Rebeka na mahatanga i raha na meni.
54Me hemuri na kariana o Abarahamo ma na me iana ka ngê ma ka tono. Ngaira ka mêru i ngekana. Matena ga rite me i mavoraro, na kariana o Abarahamo ki vi: “Nakê be aporo i pasina na maneraha iaku.”
55O veogana ma kenana ka Rebeka karu vi: “Igami kami obania, vi ka Rebeka ki gâga so noga surigi na tangiani gi pi se tangahuru, ma ki kahu arâ.”
56Na karianna o Abarahamo ki arami, ki vi: “Siana kamu ruruiê kê gâga. Na Araha ki katoê kê râha koro. Nakê be aporo i pasina na maneraha iaku.”
57Ngairerua karu aramia, karu vi: “Ge unia me ka Rebeka ma ke tarahua tenia na obaniha iana.” 58Vikê ngairerua karu unia me ka Rebeka ma karu hagatea, karu vi: “I hega, go obania vigo arâ suria o vani akê?” Ngaia ki arami, ki vi: “Mako.”
59Vikê ngairerua karu nakarerua vê ka Rebeka ma na gete vurivuri i marupea me matena i sisite, karu râ surira na kariana o Abarahamo ma na me iana. 60Ngaira i ruma ka nungia God tanga ka Rebeka, ka vi:
“Goaku, na karemu ke gahu ngavê
ma na raraha iamu ke henahuraugi
na hinua iata na merongata!”
61Matena ka Rebeka ma na gete vurivuri iana ka nanê ni râha, ngaira ka hane i gerita na kamelo ma ka râ suria na kariana o Abarahamo.
62O Isako ki oga igê na bagamasusu raha i Negeve i Kanani hagarangia na vekaru i Lagairoi. 63Matena i mamaru me noga, ngaia ki râ ki barebare igê na pariki iana. Ngaia ki sira râ ma ki rigira na kamelo ga arâ me. 64Matena ka Rebeka ki basiâ me o Isako, ngaia ki vato tenia na kamelo iana. 65Ngaia ki hagatea na kariana o Abarahamo, ki vi: “Na mane o vati kani arâ me vurusigia igê na pariki ikana?”
Ngaia ki arami, ki vi: “Na maneraha iaku nge.” Vikê ka Rebeka ki gasia so na gahu pusigi na maana. 66Na kariana o Abarahamo ki hagarongoa o Isako renia na râha iana. 67Me hemuri o Isako ki mebanu ka Rebeka igê na ruma na gahu i oga igê ka Sara kenana matena i tahitahi mênga. Ka Rebeka ki vora na gete iana. O Isako ki takuia ka Rebeka ma ki kahu pe areare na apena renia kenana.
Currently Selected:
HAGONEGAHANI 24: KCB
Highlight
Share
Compare
Copy
Want to have your highlights saved across all your devices? Sign up or sign in
© 2011 Bible Society of the South Pacific
