HAGONEGAHANI 13
13
O Abaramo mo Loti karu oga hegitigi
1O Abaramo ki pania i Esipito ma ki aporo tanga i Negeve i Kanani. Ngaia ki merâ kaniana henigi na ara ni nahuninga hato iana. O Loti ki takua. 2O Abaramo ki ruruguha ngavê. Ngaia ki nahunira rako na sipi, na goti, na puruka ma na siliva ma na golo nikâ. 3Tenia i ngekana ngaia ki aporo surigi na hinua bê râ tanga i Betele. Ngaia ki tariha aporo râ igê na agua i beraragaterua na hinua i Betele ma i Ai, na agua i hagêrasia i nago igê na ruma na gahu iana, 4ma ki tagarahia igê na bea na panga ni vogasiha. Ngaia ki vogasia igê na Araha.
5O Loti ki nahunira nogana na sipi, na goti ma na puruka henira na ahemata iana ma na kariana. 6Tahema na bena ni go i ngekana ki pe ararirerua o Abaramo mo Loti, hanana vigaru gâga haku igê, suria na togoha iaterua ka rako era. 7Tahema na mane ga bâsurira na togoha iana o Abaramo ma na mane ga bâsurira na togoha iana o Loti ka heariha. I na matena ngekana na Kananita ma na Pirisita ka gâga mêngara i ngekana.
8Vikê o Abaramo ki vi tanga o Loti, ki vi: “Igerua na vetage mane. Na kariamu ma na kariaku ki pe arari vige heariha. 9I arari, garu oga hegitigi. Gu atea na apanena go obania. Manga go arâ i ta apanena inê kê arâ i ta apanena. Manga go bêbêso, inê kê bêbêkê, se manga go bêbêkê, inê kê bêbêso.”
10O Loti ki bâ rârâ ma ki tarahua, vi na maruguna hagenani i ve i Jotano mataro me i Soare ka apia na ve karu. Ngaia ki bâ manga na agua bâkoro i Etene, se manga na mako koro i Esipito. I ngekana kani i nago tarana na matena na Araha ki ruhuruhurerua igê i Sotome me Gomora. 11Vikê o Loti ki atea na maruguna hagenani i ve i Jotano ma ki aharaga ki bêkê. Ngekana nga hanana garu oga hegitigi. 12O Abaramo ki oga so ma i Kanani. O Loti ki râ tangagi na hinua igê na maruguna i ve i Jotano ma ki hagêrasia na ruma na gahu iana hagarangia na hinua i Sotome. 13Na enoni i Sotome ka erataga ngavê ma ka haritohea na Araha.
O Abaramo ki râ i Heberoni
14Matena i bani râ o Loti, na Araha ki vi tanga o Abaramo, ki vi: “Igê na agua go oga igê ikê go bâbâ rârâ maninga igê na ara ni agua rihigo. 15Inê be haganahunigamu, igo ma na raraha iamu, renigi na ara ni agua ni mako go bâsigi. Na agua ngegana mu page nahunigi hagahu. 16Inê be hagarakunira na raraha iamu, ma ki asa ngavê ta na enoni, vige girara ge tomanira. I mangagi na momogani na one i maveta hagenani i bara tanga ta na enoni, vige tomanigi. 17Hoi, gu râhia na mako hagenani, gê page haganahunigo renia.” 18Vikê o Abaramo ki tavoraha nikâ, ma ki râ ki oga tonge hagarangigi na apinige apuna iana o Mamere hagarangia i Heberoni. Ma i ngekana ngaia ki tagarahia igê na bea na panga ni vogasiha tanga na Araha.
Currently Selected:
HAGONEGAHANI 13: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific