GALASIA 4

1Hoi, be visia nikâ ta na marâ. Takusia na mane, i apara na kere mane. O karena ki page nahunigi na nahuninga iana o vaemana. Ma na matena ngaia ki kere mane mênga, na enoni raha ka katora manga na kare rakuraku, henaka vi ngaia ki nahunigi na ara ni marâ. 2Matena i kere mane mênga, na enoni raha ka marupea, ma ka bâbâsurigi na nahuninga iana, mataro me na matena o vaemana ki hagamarumungenia igê, ki bâbâsurigi marena. 3Igia ka manga ngekana nogaka. Na ataro ka raha tangagia, ma igia ka mangara na kare vurivuri iata, matena igia ka mamênga vige takotako bâkoro manga na enoni tako. 4Ma God, bevoana i râ me na matena, i bani naka, ngaia ki hagatorangenia me o Karena. Ngaia ki vora enoni, suria kenana ki na enoni, ma ngaia ki na Siu, ma ki râ surigi na ramata iata na Siu, 5hanana i rupasira na enoni, i raha tangara na Ramata iana o Moise, hanana igia hato ka girara ga voravora re na karena God.

6God ki hagatanga monari renigamu, vi igamu ki na karena, suria ngaia ki hagatorangenia me igê na aitangihaka na Higona Apu iana o Karena. Ma na Higona Apu ngekê ki vi, “Mama, Vaemaku”. 7Tahema, mu hato tenia, vi gamu vora re na kare vurivuri, ma kamu vora re hete na karena God. Ma renia igamu ka na karena, God ki page vategamu na ara ni marâ hato, i bani surugi tangara na karena.

O Paulo ki tako renira na enoni kirisitiano i Galasia

8I nago igamu kamu pe girara God. Tahema igamu ki na kare vurivuri iata na ataro, ga pe god. 9Ma i ngekê igamu kamu girara God, ma kamu tongesuria. Se ve vi nga God ki aitangisigamu. Ma ki tanu hega? Igamu kamu obania, vi gamu aporo vari tangara na ataro purua ga pe ramo ngegana? Suria i hega kanimu obania, vi gamu voravora aporo re na kare vurivuri iata na ataro ngegana? 10Igamu kamu tako bâraha renigi na tangiani, ma na hageha, ma na mateni, ma na harisi! 11Inê kê tako bâraha renigamu. Vari inê kê tagara purua ma i pasimi? I asa!

12Goaku igê na tongesuriha, inê kê kanukanugamu, kamu amaka suriê, renia inê kê manga igamu. I nago igamu kamu pe katoa rârâ ta na marâ era tangê. 13Igamu kamu bani girara, vi inê kê maeha. Tahema inê kê kahu ateate moramora tangagamu renia na Taroha Koro. 14Ma igamu kamu pe kiteniê, se vi gamu pe usiteniê, henaka vi na mera iaku ki hagarigugamu. Ma igamu kamu katoê, manga vi inê ka na angero iana God. Igamu kamu katoê, manga vi inê no Kirisito Jesu! 15Igamu kamu vagevage teha ngavê! Ma i ngekê ki hega? Inê mareku kê girara gê visigamu vikê: igamu kamu tamaniê igê na ara ni marâ, ma ki manga vige pe asa igamu vateê nikâ na maami. 16Renia inê kê tamasi monari tangagamu, mu takusia vari, gê merongasigamu i ngekê?

17Na enoni getera ngegana ka gunahigamu bâraha, ma na katoha iata ki pe koro. Ngaira ka obania ma, vi ga voasigia hegitigi, hanana igamu kamu barigira, tagenana manga ngaira ka barigigamu. 18Hoi, manga ga gunahira na enoni tanga na tarana koro, ua, i koro. Ma na tarana ngekana ki korokoro tare, henaka inê kê gâga henigamu, se gê pe goga henigamu. 19Kareku hetakui! Nikâ, inê kê manga na gete, i riki na gerina tanga vi apara kare. Inê kê hatamia nogaku na mamasiaganiha renigamu, mataro me kamu vora re na karena monari o Kirisito. 20Inê kê obania bâraha be oga henigamu, hanana ve hagagiraragamu maninga renia na aitangihaku tangagamu. Inê kê tako bâraha renigamu.

Na sihonga renirua ka Hagara ma ka Sara

21Inê kê obania be hagatera na enoni i pasimi, ga obanigi na Ramata iana o Moise, vi rakura. I hega? Igamu kamu rongogiraragi maninga vari na marâ, ga visigi na Ramata? 22Na Buka na Ramata ki vi, o Abaramo ki apararerua o karena gi rua. Tani ki vora me tenia na gete tagara iana, ma tani ki vora me tenia na gete iana. 23O karena tenia na gete tagara ki vora me mangara na ara ni kare. Mo karena tenia na gete iana ki vora me, suria God ki bani surua tanga. 24Na taraterua ngegana ki na tamasinga maramaraveta. Na gete gi rua karu manga na suruheri gi rua. Na ani gi tage na suruheri ngaia kini ka Hagara, ma ngaia ki na suruheri ni Hungana i Sinai. Ma na karena ka vora re na kare vurivuri, matena ga vora me. 25Ka Hagara ki manga na Hungana i Sinai i Arabia, ma ngaia ki manga nikâ na hinua raha i Jerusaleme i ngekê. I Jerusaleme ki manga na enoni rakuraku, ma na kare hato i ngekana ka mangara na enoni rakuraku nikâ. 26Ma i Jerusaleme, na anina God, ki mareha vi ge manga na kare rakuraku, ma ngaia ki manga hete kenaka. 27Renia na Buka Apuna ki vi:

“Igo na gete, go gomara, ko vagevage!

Igo na gete, go pe girara gu apara kare,

ko vagevage ma ko ngerengere!

Renia na gete, o vaniana i kasia,

ngaia ki page aparara rako na kare

teharira na karena na gete,

i gâga henia o vaniana.”

28Hoita, tahema, igamu na goaku igê na tongesuriha, igamu ki na karena God suria na suruha iana God, tagenana ma manga o Isako ki vora me tenia o Abaramo suria na suruha iana God tanga. 29I na matena ngekana o karena ka Hagara, i vora me mangara na ara ni kare, ngaia ki merongasia o karena ka Sara, na ani i vora me suria na suruha iana na Higona Apu iana God. Ma ki tagenana ma i ngekê. 30Ma na ta ki visia na Buka Apuna? Ngaia ki vi, “Pairerua na gete tagara mo karena, hanana siana o karena na gete tagara ki nahunigi na nahuninga iana o vaemana; nga noga ma o karena na gete iana ki nahunigi getea na nahuninga.” 31Tahema, goaku igê na tongesuriha, igia ka mareha vi na karena na gete rakuraku, ma igia ki na karena hete na gete aharupa.

Currently Selected:

GALASIA 4: KCB

Highlight

Copy

Compare