GALASIA 2

O Paulo ma na aposotolo getera

1I murini na harisi tangahuru matare he inê kê aporo nikâ i Jerusaleme henia o Banebasi. Inê kê mera nikâ o Tito heniê. 2Inê kê râ, suria God ki obaniê, vi gê arâ. Matena gê meratamasi na meraha igê na rotu, inê kê ramatenia tangara na Taroha Koro, gê ateate renia tangara na enoni, ga pe Siu. Igê na tagaraha iaku i nago, ma i na matena i ngekê, inê kê pe obania, vi ve tagara purua ma. 3Na kariaku o Tito ngaia ki na mane ni Agaia. Ma na meraha igê na rotu ka pe tuguria, ma ka pe retea râ na gavona na varana, 4henaka vi tani na mane ka obania. Na mane ngegana ka vi, vi ngaira nogata ka na enoni, ga tongesuri ma hete ga hagaparu. Ngaira ka banu me henigami, hanana vi ga bâbâ nake renigia, vi manga i he kani igia ga aharupa, suria igia ka obahaku henia o Kirisito Jesu. Ngaira ka obanigia, vi ga maratorata na kare rakuraku renigi na ramata iata na Siu. 5Igami kami usi hagetage ngavê, renia igami kami pe obania, vi gami erasigi na tamasinga monari na Taroha Koro, ma kami obania ma, vi gami marupegi bâkoro tangagamu.

6Ma ngaira ka bâ mangara vi na meraha igê na rotu. Inê kê tamasi vikana, suria inê kê pe haneava renira, suria God ki pe surira na enoni surigi na bâhanata. Hoita na meraha ngegana ka pe bonasiê, vi ve urusia ta na marâ igê na ateateha iaku renia na Taroha Koro. 7Ngaira ka pe vi tangê, vi ve urusia ta na marâ, suria ngaira ka girara, vi God ki bani hagêguriê, kê ateate renia na Taroha Koro tangara na enoni, ga pe Siu, tagenana ma manga ngaia ki bani hagêguria o Petero, ki ateate renia na Taroha Koro tangara na Siu. 8Renia God raramohaga ki bani ateê, kê vora re na aposotolo tangara na enoni, ga pe Siu, i tagenana ma manga ngaia i bani atea o Petero, ki aposotolo tangara na Siu. 9O Jakobo, o Petero mo Joane, ngaira ka bâ mangara na meraha igê na rotu. Ngaira ka girara, vi God ki bani hagêguriê renia na tagaraha ngekana. Tahema ngaira ka here rima henigamirua o Banebasi menê, suria ga obahaku henigamirua igê na tagaraha. Renia igami hato kami tagara haku, igami hato kami vi, vi igami nogamami kami tagara i pasita na enoni, ga pe Siu, ma ngaira nogata ka tagara i pasita na Siu. 10Ma na ani gi tage ma na tarana kaniga nungia, hanana vi igami kami takusira na enoni matareha i pasita na enoni, ga tongesuri, ma na tarana ngekana inê gê bani uhungia tare.

O Paulo ki ramonia o Petero i hinua i Atioko

11Na matena o Petero i vatugia igê na hinua i Antioko, inê kê ramonia i maata na enoni ga tongesuri, suria i rongo mataha, na marâ i pe oto, i tanua o Petero. 12I nago o Petero ki ngêngê tare henira na enoni ga tongesuri, ga mareha vi na Siu. Ma hemuri ka ata me i ngekana na mane, i hagaguhira o Jakobo. Ma na matena ga bani ata me na mane ngegana, o Petero ki haganega ki usi, vi ge ngê henira, suria ngaia ki magutenira na enoni, ga vi, vi na enoni, ga pe Siu, ki ararira, ga retegi râ na gavoni na varata. 13Na ani getera na Siu, ga tongesuri, ka haganega ka katoa nogata ta na tarana, ga girara, i pe koro, suria ga magu. Ngaira ka râ suria na parongana o Petero. Mo Banebasi nikâ ki râ surigi na parongata, ma ki katoa nogana ta na marâ, i girara, vi pe oto, suria i magu. 14Matena gê bâsira, ga pe oto surigi na tamasinga monari na Taroha Koro, inê kê vi tanga o Petero i maata na enoni hato, ga tongesuri, kê vi: “Igo na Siu, ma ku bâ, igo ko bani râ surigi noga na tauhata na enoni, ga pe Siu, migo ko pe bani râ surigi noga na tauhata na Siu. Hoi, manga i he ko girara, vi go uhungia ko bonasira na enoni, ga pe Siu, hanana vi ga mauri surigi na tauhata na Siu?”

God ki hagatahira na Siu ma na enoni, ga pe Siu, suria ga tongesuria o Kirisito

15Hoita, igami kami vora na Siu, ma kami pe vora renira na enoni, ga pe Siu ma ka pe râ surigi na ramata iata na Siu. 16Hoi, igia ka girara, vi na enoni ki korokoro ma ki ototo i maana God, suria ma i tongesuria o Jesu Kirisito, ma ki mareha suria vi i râ surigi na Ramata iana o Moise. Megami nikâ kami bani tongesuria o Kirisito Jesu, hanana vigami korokoro ma kami ototo i maana God, suria igami kami tongesuria o Kirisito, ma ki mareha vi suria mi râ surigi na Ramata iana o Moise. Renia na enoni ki asa, vi ge koro ma ke oto i maana God, suria vi ngaia ki râ surigi na Ramata iana o Moise. 17Igami kami uhungia bâraha, kami korokoro ma kami ototo i maana God, suria igami kami obahaku henia o Kirisito. Hoi, manga igami, ma kami katokato vikana, igami kami aharêngigi na ramata mangara na enoni, ga pe Siu ma ka pe râ surigi na Ramata iana o Moise. Tahema o Kirisito ki kanukanugami, kami tasitasi vari? Mareha vê! 18Ma ki manga inê, ma kê taugi aporo na Ramata iana o Moise, gê bani kasigi râ, ngekana inê kê aharêngigi monari na Ramata iana o Moise, ma kê tasi ngavê. 19Surigi na apaneni na Ramata iana o Moise, inê kê manga na mane, i me tenigi. Tahema na Ramata ka pe raha tangê. Ma na Ramata ka katoê vikana, hanana vi inê kê mauri suria na obaniha iana God. Inê kê manga gê me henia o Kirisito igê na kuruse. 20Manga ngekana, ki hato, vi ve mauri mênga inê mareku, ma ngaia nga hete o Kirisito kani mauri igê na aitangihaku. Na mauriha, gê mauri suria i ngekê, inê kê mauri, renia inê kê tongesuria o Karena God, i takuiê, ma ki agana, hanana i me reniê. 21Inê ki asa, be usitenia na korohana God. Manga i monari, vi na enoni ki korokoro ma ki ototo i maana God, suria vi ngaia ki râ surigi na Ramata iana o Moise, manga ngekana o Kirisito ki me purua ma.

Currently Selected:

GALASIA 2: KCB

Highlight

Copy

Compare