ESEKIELE 8

NA RUATA NA MARUTEHA IANA O ESEKIELE RENIA GOD

(8.1—10.22)

Na vogasiha ni ataro i Jerusaleme

1Ki na rimata na tangiana igê na onota na hageha igê na onota na harisi. Igami, ga henahuraugami, kami oga so suria i Babilonia. Na enoni raha ni Juta ka oga heniê i ruma iaku. Ki parama, ma na raramohana na Araha God ki angariê. 2Igê na maruteha inê kê bâsia ta na marâ, i bâ manga na enoni na gi. Na gupina ki vato ngaia ki na gi. Na gupina ki akê ngaia ki mave manga na kapa, i togatoga ngavê. 3Ngaia ki gusia na marâ, i bâ manga na rimana, ma ki rangu i varehuku. Na raramohana God ki tagiê akê i avoa. Igê na maruteha ngekê ngaia ki toreê tanga i Jerusaleme, tanga na maani para tanga na mahera na Ruma ni Rotu. Na maani para ki maa tanga na bogona tagere na hinua. I ngekana ki ura igê na nununa na ataro. God ki mangariaga ngavê renia na tarana ngekana.

4Tagenana manga i nago gê marute, matena gê oga igê na maruguna na ve i Kebare, i ngekê nikâ inê kê bâsia na God iata na Isiraelita, i raramohaga hunia. 5Ngaia ki vi tangê, ki vi: “Igo, karena enoni ma, gu sira râ tanga na maani para, i maa tanga na bogona tagere na hinua.” Matena gê sira râ, inê kê rigia na bea ni vogasiha hagarangia na maani para i ngekana, ma na nununa na ataro igê, God ki kitenia ngavê.

6God ki vi tangê, ki vi: “Igo, karena enoni ma, go giraragi vari na tarani, ga katogi i ngekana? Gu bâsigi na bagatauhata na ai ni Isiraele. Ngaira ka paiê tenia na Ruma ni Rotu iaku. Na tarana ngekana ki era ngavê. Ma na tarani, go page bâsigi, ka page erataga ngavê teharia.”

7Ngaia ki toreê tanga na maani para tanga na mahera na Ruma ni Rotu. Inê kê bâsia na makuruha igê na apê. 8Ngaia ki vi tangê, ki vi: “Igo, karena enoni ma, gu hura igê na makuruha ikê.” Hoi, inê kê siva igê ma kê bâsia na maani ruma i maaku. 9Ngaia ki vi tangê, ki vi: “Gu banu ma ku bâsigi na bagatauhata i ngekana, gê kitenigi ngavê.” 10Inê kê banu igê ma kê bâ rârâ. Na apê na ruma ka gahuigi na segesegeha na nunuta na ma ma na marâ getera, God ki manimani tenira na Isiraelita, ma na nunuta na harasita hato, ga vogasira. 11Na tangahuru gi pi na maneraha iata na Isiraelita ka ura i maata. Na hitangita ki no Jasaria karena o Sapana. Na ara ni hitangita ki têa na apira, ga susu igê na marâ, i sigini koro. Na vanahuna ki ramo ngavê. 12God ki hagateê, ki vi: “Igo, karena enoni ma, go bâsigi vari na tarani, na maneraha iata na Isiraelita ka katogi pinihi? Ngaira hato ka vogasi igê na kiboru, i vunu renigi na nunuta na harasita, ga segegi igê na apê. Ngaira ka vi ma: ‘Na Araha ki pe bâsigia. Ngaia ki bani pania na agua.’”

13Ma hemuri na Araha ki vi tangê, ki vi: “Igo ko page bâsigi na tarani, ga erataga ngavê teharia na tarana ngekana.” 14Vikê ngaia ki meê aporo tanga na maani para, i maa tanga na bogona tagere na hinua. I ngekana inê kê bâsira igê na gete, ga angiangi maramara, renia i me o Tamusu na ataro.

15God ki hagateê, ki vi: “Igo, karena enoni ma, gu bâ. Hoi, igo ko page bâsigi na tarani, ga erataga ngavê teharia na tarana ngekana.” 16Vikê ngaia ki meêbanu na Ruma ni Rotu. I berarogaterua na bea ni vogasiha ma na apena na Ruma ni Rotu inê kê bâsira na ararina na tangahuru gi rua matare rima na mane. Ngaira ka murisigea na agua apuna i Ruma ni Rotu, ma ka maatia i kerekê. Ngaira ka bêtuhia ma ka rahesia na arito.

17Na Araha ki vi tangê, ki vi: “Igo, karena enoni ma, gu bâ. Na ai ni Juta ngegana ka katogi hagatage ikê na tarani, ga erataga ngavê. Ngaira ka katogi nikâ na perenga suria na agua hagenani, ma ka ama ni hagamangariê nga. Ngaira ka ruhiê ngavê renigi na bagatauhata. 18Henaka, ma ngaira ka page hatamia na mangariaganiha raha iaku! Inê be hagaitangira ngavê. I asa be takira. Henaka ngaira ka avarasiê raharaha, inê ki asa be aganarira.”

Currently Selected:

ESEKIELE 8: KCB

Highlight

Copy

Compare