ESEKIELE 6
6
Na Araha ki kitenia na vogasiha ni ataro
1Na Araha ki tamasi tangê, ki vi: 2“Igo, karena enoni ma, gu maatigi na hungani i Isiraele, ma ko haganunura na Isiraelita, ga goga i ngekana. 3Gu vi tangara, ke karingagi na tamasinga iaku, inê na Araha God. Gu vi tangara, ke rongogi na tamasinga iaku renigi na barani, na hungani, na tarihu ma na maruguni. Inê na Araha God kê tamasi vikê tangara, kê vi: Inê be hagatorangenira na merongami, ke hogegi na agua, mu vogasi ataro igê. 4Na bea ni vogasiha iami ke guguru, ma na apira, mu susu igê na marâ, i sigini koro, tangara na ataro, ke amenamena. Ka page ahurara rako na hitangimi i maata na nunuta na harasimi. 5Isiraelita, inê be tokorenigi na gahuami. Inê be tokorenigi na surimi rihigi na bea ni vogasiha iami. 6Na hinua hato iami ka page aruhuruhu. Na agua, mu vogasi igê, ka page hihiruga. Na bea ni vogasiha iami ka page guguru. Na nunuta na harasimi ka page amenamena. Na apira, mu susu igê, ka page akamakama. Na ara ni tagaraha iami ka page magahuru ngavê. 7Rako na hitangimi ka page ahurara ka meme. Ma na hitangimi, ga tahitahi, ka page tahetara reniê, vi inê ka na Araha.
8“Tani na hitangimi inê be nakara vê, ke tahi tenia na henahuita ngekana, ma be tokorenira surigi na agua iata na mahuara, 9ga page henahuraura. I ngegana ngaira ka page takusiê aporo igê, ma ka page aitangisia, vi inê kani gê hagaitangira ma kê hagamakira, suria ga pe toto suriê, ka kasi reniê, ma ka obanira ma na ataro, ma ki mareha vi inê hete. Ngaira ka page tangahurira ngavê renigi na bagatauhata ma na bagatarihata. 10Ngaira ka page tahetara reniê, vi inê ka na Araha ma kê hagamonarigi na haganunuha iaku.”
11Na Araha God ki tamasi tangê, ki vi: “Gu hita baro! Puhara! Ngerengere, ko vivi: I hato noga na bagatauhata ma na bagatarihata na Isiraelita. I page era ngavê tangara! Ngaira ka page me renigi na henahuita, na magêha ma na ringa. 12Na ani, ga oga hagatê, ka page me renia na ringa. Na ani, ga oga hagarangi, ka page me renia na henahuita. Ma na ani, ga tahitahi mêngara, ka page mesi magêha. Ngaira ka page hatamia na mangariaganiha raha iaku, mataro me ki manava na obaku. 13Na gahuata ka page tâ totoko rihigi na bea ni vogasiha ma i berarogani na nunuta na harasita. Na gahuata ka page tâ totoko igê na ara ni agua, ga susu igê tangara na harasita igê na hungani, igê na barani, ma i ruguhani na apinige ga arubebe. Ma na enoni hato ka page tahetara reniê, vi inê ka na Araha. 14Ua, inê be hagaitangira. Inê be ruhuruhua ma be hagahirungia na apanena hagenani iata, haganega tenia i Negeve tanga na hinua i Ribila. Mareha ta na hinua, vige page tihia. Vikana ngaira hato ka page tahetara reniê, vi inê ka na Araha.”
Currently Selected:
ESEKIELE 6: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
