ESEKIELE 13
13
God ki ranganira mave na mane ga poropete ngarangara
1Na Araha ki tamasi tangê, ki vi: 2“Igo, karena enoni ma, gu ranganira na poropete i Isiraele, ga katogi kê mareta ma na tamasinga poropete. Gu vi tangara, ke karingagi na tamasinga iaku.
3“Inê, na Araha God, kê vi vikê: I era ngavê tangara na poropete ngegana. Ngaira ka beka ngavê! Ngaira ka barobaro i bêta mareta ma ka katogi kê ma mareta na maruteha. 4Isiraelita, na poropete iami ka mangara na o vasiga igê na hinua, i aruhuruhu. Ngaira ka hagaerasigi na ara ni marâ. 5Ngaira ka pe anumasigi na agua, ga guguru igê na para ni hinua, na ka pe tagarahigi aporo na para. Tahema igamu na Isiraelita ki bara, vigamu ngahi pusigamu maremi tenira na merongami igê na matena, inê na Araha kê hagaitangigamu igê. 6Na maruteha iata ki pe monari. Na haganunuha iata ka na hagaparunga ma. Ngaira ka vi, vi inê kê tamasi i harata, ma inê na Araha kê pe hagatorangenira rârâ. Ma ki tanu hega ngaira ka vi, vi na tamasinga iata ka page vagavaga me mave? 7Inê kê hagatera, kê vi: I hega, na maruteha iami ka monari vari? I hega, na haganunuha iami ka mareha vi na hagaparunga vari? Igamu kamu vi, vi inê kê tamasi i harami, ma inê ki mareha rârâ, ve tamasi tangagamu. 8Igamu kamu hagaparu ma. Na maruteha iami ki pe monari. Inê kê merongasigamu. 9Inê na Araha God be vi tangagamu: inê kê sugi hagaitangigamu, igamu na poropete mu marute hagaparu ma kamu haganunu babanga. Matena na kariaku ka hakuhaku hekarigi, igamu ki asa, vigamu oga henira. Na atami ki asa, vige page oga henigi na atata na Isiraelita igê na buka. I asa iami, vigamu page aporo i pasimi. Vikana igamu kamu page tahetara reniê, vi inê ka na Araha God.
10“Na poropete ka hagaparura na kariaku, ka vi, vi na ara ni marâ ki koro ma. Ma hete, i mareha ngavê! Na kariaku ka tagarahigi na para ni hinua, i pe nganganihaga bâkoro, ma hemuri na poropete ka taruhigi renigi na ahu. 11Gu vi tangara na poropete ngegana, vi na para ngegana ka page guguru. Inê be katogi, ke tangi era. Na esusu na rangi ke mangagi na hê. Na roga raha ki page hitaria. 12Na para ki page guguru. Ma na enoni hato ka page hagatego, ka vivi: ‘I he nga na ahu, ga taruhigi re?’
13“Hoi, inê na Araha God, kê vi vikê: Igê na mangariaganiha raha iaku inê be katogi, ke roga raha ma ke tangi era. Na esusu na rangi ke mangagi na hê. Inê be hagaerasigi na ara ni marâ hato, suria gê mangariaga ngavê. 14Inê be hogegi na para, ga taruhigi renigi na ahu. Inê be harasigi vato na hê na para, ki tariha i ano. Ngaigi ki page guguru hurigamu kamu meme. Vikana igamu hato kamu page tahetara reniê, vi inê ka na Araha.
15“Na mangariaganiha raha iaku ki page tarahura na enoni ma na para, ga taruhigi renigi na ahu. Ma hemuri be vi tangagamu, be vi: Na para ka magahuru. Na enoni ki hato iata, vige page taruhigi nikâ renigi na ahu. 16Na poropete ki hato iata, vige page vi tangara nikâ na enoni i Jerusaleme, vi na ara ni marâ ka koro ma, ma hete i mareha. Ngaia kani gê visia, inê na Araha.”
God ki ranganira na gete ga poropete ngarangara
17Na Araha ki vi: “Hoi, igo karena enoni ma, gu bâsira na gete i berarogata na kariamu. Ngaira ka katogi kê ma mareta na haganunuha. Gu ranganira. 18Gu vi tangara, vi inê na Araha God kê tamasi, kê vi vikê: I era ngavê tangagamu. Igamu kamu baraigi na ebo igê na bangobango ni rimata na enoni hato, ma kamu hugusigi nikâ i bêta, hanana vigamu kuasira. Mu takusia vari, vigamu page tahi, suria vigamu kuasira na kariaku? 19Igamu kamu ruhiê i maata na kariaku, suria mu tenigi na kere koni, se na kere bereti. Tahema igamu kamu hagaparura na kariaku, ma ngaira ka tongesurigamu. Vikana igamu kamu hagamesira na ani, i pe ararira, vige meme, ma kamu hagatahira na enoni, i ararira, viga meme. 20Tahema inê na Araha God, inê be tahura na ebo tenigi na bangobango ni rimata na enoni. Na manu vari kani ngaira mu basuira? Inê be hagatahira. 21Inê be musigi râ na ebo i raeta tenira, hanana na kariaku ka asitatara tare, ki bê ki arâ. Vikana igamu kamu page tahetara reniê, vi inê ka na Araha.
22“Na hagaparunga iami ki katora na enoni koro ka rumakaka, na ani gê pe obanira, vige mamasiaga. Igamu kamu urapusira na enoni era, hanana vige urisi parongata ma ke tahi. 23Hoi, na maruteha hagaparu iami ma na haganunuha babanga iami ka hato iani. Inê be hagatahira na kariaku tenigi na raramohami. Vikana igamu kamu page tahetara reniê, vi inê ka na Araha.”
Currently Selected:
ESEKIELE 13: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
