ESEKIELE 10

Na Araha ki pania na Ruma ni Rotu

1Inê kê boretenia na marâ, i bâ manga na gerina na ruma ni buni, i avorata na angero. I ngekana i avorana inê kê rigia igê ta na marâ, i bâ manga na âgâga raha, i togatoga manga na hê ahe marava. 2God k vi tanga na mane, i tuguni siki, ki vi: “Gu tara i berarogani na wili i ruguhata na angero. I ngekana ka oga igê na garaputa na gi. Gu raguigi ma ko tahusingenigi suria na hinua.” Inê kê bâsia, ki râ. 3I na matena ngekana na angero ka ura i metara na Ruma ni Rotu i na apanena, i maatia na bogona vato na hinua. I na matena ngekana na mane ki bêbanu râ. Na vaha ki raro i Ruma ni Rotu. 4God raramohaga hunia ki ahekê tenia na atohana i avorata na angero, ma ki râ tanga na maani Ruma ni Rotu. Na vaha ki raro i Ruma ni Rotu hagenani, ma na mahera ki mave ma ki togatoga ngavê. 5Na avoavota na angero ki rongo raha nikâ igê na mahera i metara na Ruma ni Rotu. I rongo manga na ringena God raramohaga hunia.

6Matena na Araha ki bonasia hato na mane, i tuguni siki, ki raguigi na garaputa na gi i berarogani na wili i ruguhata na angero, ngaia ki râ ma ki ura ngahisia na hitangini na wili. 7Na hitangita na angero ki raguigi na garaputa na gi i ruguhata, ma ki torea ki naka i rimana na mane, i tuguni siki. Na mane ngekê ki tora ki migirâ.

8Na ara ni hitangita na angero inê kê bâsia, i tonga re na marâ, i bâ mangagi na rimana na enoni i ruguhani na gagahana. 9Igê na maruteha iaku inê kê bâsigi na wili ge he. Na wili gi tage ki ura ngahisia na ara ni hitangita. 10Na wili ge he ngegana ka tage bâ, ma ka togatoga mangagi na hê ahe. Na ara ni hitangini na wili ki tâ hagarabo tani na wili i rarona. 11Igê na tarana ngekana tahema na angero ka girara, ga arâ tanga na agua mavê, ga obania, viga arâ igê, mareha vige apapariri rârâ. 12Na maata ka manasigi na apeta, na gerita, na rimata, na gagahata ma na wili iata. 13Inê kê rongoa, vi na wili ngegana ka hêtani vi Maguara.

14Na ara ni hitangita na angero ki tonga re na maana ge he: tani ki na maana na puruka, tani ki na maana na enoni, tani ki na maana na laione, ma tani ki na maana na ahetaronga. 15Ngaira ka na angero, gê bani bâsira noga igê na maruteha iaku hagarangia na ve i Kebare. Matena na marâ mauri ngegana ka akê i haha ka râ, 16na wili nogani ka arâ henira. Matena ga gasigi na gagahata ma ka gaha, na wili nogani ka arâ henira. 17Matena na angero ngegana ka rêra so, na wili nogani ka rêra so. Matena na marâ mauri ka gaha, na wili nogani ka arâ henira, suria na marâ mauri ka angarigi, ki manga ngegana.

18Ma hemuri na Araha raramohaga hunia ki pania na maani Ruma ni Rotu ma ki arâ tanga na atohana i avorata na angero. 19Inê kê bâsira, ga gasigi na gagahata, ma ka gaha i haha tenia na ano, ma na wili nogani ka râ henira. Ngaira ka ura so igê na maani Ruma ni Rotu, i maa bêkê. Ma na mavetana God raramohaga hunia ki oga i avorata. 20Inê kê bâgirarara. Ngaira ka na angero, gê bani bâsira noga i ruguhana God iata na Isiraelita igê na maruteha iaku i nago hagarangia na ve i Kebare.

21Na ara ni hitangita ki tonga re na maana ge he, na gagahana ge he, ma ki tonga re na marâ, i bâ mangagi na rimana na enoni, i ruguhana na ara ni gagahana. 22Inê kê bâ hagagara renigi na maata, suria gê bani bâsigi igê na maruteha iaku i nago hagarangia na ve i Kebare. Na ara ni hitangita na angero ki tari oto, ki arâ.

Currently Selected:

ESEKIELE 10: KCB

Highlight

Copy

Compare