TAHINGA 37
37
Na tagarahiana na bokesi na suruheri
(Tahinga 25.10-22)
1O Besalele ki tagarahia na bokesi na suruheri renia na apinige na akasia. Na borahusigana ki 1 mita ma na 25 sentimita. Na aberaberagana ki 75 sentimita ma ki 75 sentimita ki akê. 2Ngaia ki taruhigi na rarona ma i metara renia na golo taranina ma ki naka na tarina na golo rihuia. 3Ngaia ki tagarahigi na ringi na golo ge he tanga ga tugia igê ma ki nakagi igê na bêni kê na êgana ge he: na ani gi rua i ta apanena ma i ta apanena. 4-5Ngaia ki tagarahirerua na apinige na akasia ni tugiha ma ki taruhirerua renia na golo ma ki suvarenirerua igê na ringi i na apanenaheri na bokesi na suruheri. 6Ngaia ki tagarahia na bubuhina renia na golo taranina. Na borahusigana ki 1 mita ma na 25 sentimita ma na aberaberagana ki 75 sentimita. 7Ngaia ki tagarahirerua na nunuterua na angero renia na golo: 8tani igê ta bogona ma i ta bogona na bubuhina. Na bubuhina haku henirerua na angero ka na golo gi tage ma. 9Na angero karu matohetanga ma karu gasigi hetanga na gagahaterua i avorona na bubuhina.
Na tagarahiana na bea tange na bereti
(Tahinga 25.23-30)
10O Besalele ki tagarahia na bea renigi na apinige na akasia. Na borahusigana ki 1 mita ma na aberaberagana ki 50 sentimita ma na 75 sentimita ki akê. 11Ngaia ki taruhia renia na golo taranina ma ki naka na tarina na golo ki rihu igê. 12Ngaia ki naka na tarina na 8 sentimita na golo rihuia na akerena ma tani na tarina na golo nikâ ngaia ki naka ki rihu i murina hura. 13Ngaia ki tagarahigi na ringi ge he ni tugiha ma ki nakagi tonganigi na sukuni ge he ga oga igê na êgani. 14Na ringi tangarerua na apinige ni tugiana na bea ka oga i ruguhana na tarina i murina hura. 15Ngaia ki tagarahirerua na apinige ni tugiha gi rua renigi na apinige na akasia ma ki taruhirerua renia na golo. 16Ngaia ki tagarahigi na apira, na ani raha na na ani sisite, na kâkâ, na pi tanga na vaini ni vogasiha ma na marâ vigana renigi na golo taranini.
Na tagarahiana na atohana na laiti
(Tahinga 25.31-40)
17O Besalele ki tagarahia na atohana na laiti renia na golo taranina. Ngaia ki tagarahigi na hunana, na gatana henigi na takani ga ahaketa ma na ani ga pe ahaketa renigi na golo. Ngaigi hato ka vora na golo gitage togo ma. 18Na arani ge ono ka hura me tenia na gatana: gi oru i ta apanena ma i ta apanena. 19Na ara ni hitangini ki nahunigi na takani gi oru manga na memeapu: tani ka ahaketa ma tani ki mareha. 20Na gatana na atohana na laiti ki nahunigi na takani ge he ngegana: tani ka ahaketa ma tani ka mareha. 21I ruguhana na ara ni arani ga bê hetanga, ki oga igê na takana i pe ahaketa. 22Na hunana, na gatana henigi na arani ma na takani ki na golo gi tage togo na. 23Ngaia ki tagarahigi na laiti gi pi tanga na atohana, na laiti henigi na eahi ma na kere apira tanga renia na golo taranina. 24Ngaia ki tagarahia na atohana na laiti henigi na ara ni marâ hato tanga renigi na 40 kilo na golo taranina.
Na tagarahiana na bea ni sungiana na marâ i sigini koro
(Tahinga 30.1-5; 22-38)
25O Besabele ki tagarahia na bea renigi na apinige na akasia tanga ga sungigi igê na marâ i sigini koro. Ngaia ki heavore na akerena. Na borahusigana ki 50 sentimita. Na aberaberagana ki 50 sentimita ma ki bê tagere ki 1 mita. Na bugusuni igê na sukuni ge he ka rato haku henia na bea. 26Ngaia ki buhigi na gerina, na apaneni ge he ma na bugusuni renigi na golo taranina ma ki naka na tarina na golo ki rihuia na akerena. 27Ngaia ki tagarahigi na ringi na golo ge he ni tugiha: gi rua tanga ta apanena ma tanga ta apanena. Ngaia ki nakagi i ruguhana na tarina na golo tangarerua na apinige ni tugiha. 28Ngaia ki tagarahirerua na apinige ni tugiha renigi na apinige na akasia ma ki taruhirerua renia na golo.
29Ngaia ki tagarahigi na oile ni moneha apuna ma na marâ i sigini mamaki matena ga sungigi manga na mane i toraria na marâ ni moneha ni ape sigini koro.
Currently Selected:
TAHINGA 37: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
