TAHINGA 33
33
Na Isiraelita ka pania na hungana i Sinai
1Na Araha ki vi tanga o Moise, ki vi: “Mu pania na agua ikê, igo ma na enoni, go bani bêngenira hura tenia i Esipito, ma kamu arâ tanga na agua, gê bani surua, vigê page haganahunira o Abrahamo, o Isako, mo Jakobo ma na raraha iata renia. 2Inê kasia na angero ki nanago tarami, ma kê tarigenira hura na Kananita, na Amorita, na Hitita, na Perisita, na Givita ma na Jebusita. 3Igamu kamu page atata igê na agua na mako koro ni ngauha ma ni togoha. Ma inê mareku ki mareha ve arâ henigamu, i era ma kê mutegamu i tara, suria igamu kamu guguruga ngavê.”
4Matena na enoni ka rongo vikana, ngaira ka haganega ka angi ma ka pe pasi rêni nikâ. 5Renia na Araha ki bani vi tanga o Moise, ki hagarongora na enoni, ki vi: “Igamu kamu guguruga bâraha. Manga vi inê ma ke arâ henigamu sisite râ ma, inê kê mutegamu ngavê. Rongo! Mu tasigi râ na rêni iami. Gê page girara na tarana ta kê page katoa tangagamu.” 6Tahema i murina ga pania na hungana i Sinai, na Isiraelita ka nakagi râ na rêni iata.
Na ruma na gahu apuna iana na Araha
7Na ara ni matena ga tênga igê na Isiraelita, o Moise ki gasia na ruma na gahu apuna tarege râ tenia na tênga. Ngaia ki hêtana renia vi na ruma na gahu iana na Araha. Na anima na enoni i obania vi hagatea na Araha renia ta na marâ, ngaia ki huhura ki arâ tanga. 8Na ara ni matena o Moise ki huhura tanga na agua ngekana, na enoni ka rêra i maani na ruma na gahu iata hanana ga bâsia o Moise i bêbanu igê. 9Matena o Moise ki bêbanu i rarona, na u na vaha ki soso me ma ki rêra i maani ruma na gahu apuna ma na Araha ki tamasi me tanga o Moise tenia na vaha. 10Matena na enoni ka bâsia na u na vaha i maani ruma na gahu apuna, ngaira ka tubê so. 11Na Araha ki memato hetanga o Moise ma ki metamasi, tagenana manga na mane i metamasi na tamana koro. Ma hemuri o Moise ki aporo me igê na tênga. Ma o Josua na mane na gapu haoru, o karena o Nune, na kariana o Moise, ngaia ki gâga vê i rarona na ruma na gahu apuna iana na Araha.
Na Araha ki surua vi ngahisira na kariana
12O Moise ki vi tanga na Araha, ki vi: “Bâ, igo ko bani vi tangê, vigê bêngenira na enoni tanga na agua ni suruha, ma igo ko pe hagagirarê renia vi o ti kani vigo kasia ki tamaniê. Igo ko bani vi, vi igo ko girara erasiê ma ko obakoro reniê. 13Hoi, manga vikana, gu visia me na katoha iamu, hanana ve tagara maninga tangago ma be hagakoro obamu. Siana ko bonotenia, vi igo kanigo bani atera na Isiraelita ka vora re nga na animu maremu.”
14Na Araha ki arami, ki vi: “I hega, inê mareku nga kanigê arâ henigo, hanana vigê haganaku parongamu?”
15O Moise ki arami, ki vi: “Manga vigo pe arâ me henigami, siana ko tugurigami, kami pania na agua ikê. 16Manga i he na enoni ka girara, vi igo ko obakoro renigami, na kariamu ma inê nogaku, manga vigo ma ko pe arâ me henigami? Manga go arâ me henigami, igami kami totora hegetigi tenira na enoni getera i maveta.”
17Na Araha ki vi tanga o Moise, ki vi: “Hoi, be kato manga go obania, suria inê kê girara erasigo ma kê obakoro renigo.”
18O Moise ki nungia na Araha, ki vi: “Inê kê obania, vigê bâsia na bâbâhamu raha hunia.”
19Na Araha ki arami, ki vi: “Inê be kari i maamu igê na bâbâhaku raha hunia ma be visia tangago na ataku apuna. Araha kani inê. Inê kê takuira ma kê koro tangara na ani inênga kê atera. 20Ma ki asa be hagabângeniê mareku tangago, suria na enoni i bâsiê, ngaia ki meme. 21Bâ, gu ura me i na kere agua i na apaneku ikê igê na hê. 22Matena gê riri igê na bâbâhaku raha, inê kê kasigo igê na vaba, ma kê têtê pusia na maamu renia na rimaku mataro me kê riri kê tehateha. 23Hemuri kê tavoa râ na rimaku, ma igo ko page bâsia na geriku, mareha vi na maaku.”
Currently Selected:
TAHINGA 33: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
