TAHINGA 13

Na Araha ki nahunira na ara ni kare hagâkani

1Na Araha ki vi tanga o Moise, ki vi: 2“Gu tagarenira tangê na ara ni bêbê ni kare mane, suria na ara ni bêbê ni kare mane iata na Isiraelita ma na ara ni kareta mane hagâkani na togoha ka na aniku.”

3O Moise ki vi tangara na enoni, ki vi: “Mu takusia tare na tangiana ngekê: na tangiana mu hura igê tenia i Esipito, mu vora na enoni rakuraku igê. Ngaia nga ki na tangiana na Araha ki bêngenigamu hura igê renia na raramohana raha. Siana kamu ngaua igê na bereti i ahunga. 4Igê na tangiana ngekê igê na hageha na Abibi igamu kamu hura tenia i Esipito. 5Na Araha ki tohe tangara na êvarimi, hanana vi haganahunigamu renia na agua iata na Kananita, na Hitita, na Amorita, na Givita ma na Jebusita. Matena i bêngenigamu banu igê na agua ni mako koro ma ni ngauha, ki tuguhigamu vigamu hagahigasia na tangiana raha ngekê igê na ara ni hageha hagenago i na ara ni harisi. 6Surigi na tangiana gi pi mu ngaugi ma igê na bereti i pe ahunga, ma na pita na tangiana ngaia ki na tangiana raha, mu rahesia igê na Araha. 7Surigi na tangiani gi pi siana kamu ngaugi igê na bereti i ahunga. Ma siana nikâ ki gâga na isiti se na bereti i ahunga suria na agua hagenani. 8Matena i haganega na tangiana raha, mu ramatenia tangara na karemi mane, vi igamu kamu kato vikana, hanana mu takusigi igê na tarani hato, na Araha ki katogi tangamu, matena i bêngenigamu hura igê tenia i Esipito. 9Na têsuriana na tangiana ngekana ki hagatakusigamu renia na tahinga iami mangagi na marâ mu nakagi i rimami se i raemi, hanana ga hagatakusigamu renia ta na marâ. Vikana mu ama ni tomanigi nga ma kamu ama ni hagesuringenigi nga na ramata iana na Araha, suria ngaia ki bêngenigamu hura tenia i Esipito renia na raramohana raha. 10Mu hagahigasia na tangiana ngekê igê na tangiana tanga igê na ara ni harisi.

11“Na Araha ki page bêngenigamu banu i Kanani. Ngaia ki tohe, vi haganahunigamu, igamu ma na êvarimi renia. Matena i haganahunigamu renia, 12mu tagarenira na ara ni bêbê ni kare mane tanga na Araha, ma na ara ni kareta mane hagâkani na togoha iami suria ngaira ka na anina na Araha. 13Ma ki tuguhigamu, mu vurivuri aporo tenia na Araha na ara ni kareta mane hagâkani na tonki. Mu vogasia nga hete na karena sipi se na goti baruta. Manga mu pe obania, vigamu vurivuri pusia na tonki, mu nguria na riona. Mu vuria aporo nga na ara ni bêbê ni kare mane iami. 14Manga vi o karemi mane ma ka hagategamu i hemuri me renia na tarana ngekana, mu aramira nga, kamu vivi: ‘Na Araha ki hagabângenia na raramohana raha matena i bêngenigia hura tenia i Esipito, na agua igia ka vora re na kare rakuraku igê. 15Matena na maneraha i Esipito ki hahêaga ma ki usi vige hagamarumungenigia hura, na Araha ki hagamesira na ara ni bêbê ni kare mane i Esipito, na kareta na enoni ma na togoha nikâ. Tahema igia ka vogasia na Araha renira na ara ni kareta mane hagâkani na togoha ma ka vurivuri pusira na bêbê ni kare mane iaka renira. 16Na têsuriana na tarana ngekê ki page hagatakusigia renia na tahinga iaka mangagi na marâ, igia ka nakagi i rimaka se i raeka, hanana ga hagatakusigia renia ta na marâ. Na tarana ngekê nikâ ki hagatakusigia, vi na Araha ki bêngenigia hura tenia i Esipito renia na raramohana raha hunia.’”

Na u na vaha ma na u na gi

17Matena na maneraha i Esipito ki hagamarumungenira hura na enoni, God ki pe bêngenira igê na tara i tarasini tanga i Pilisitia naka ma ngaia ki na tara i hagarangi. God ki tako, ki vi: “Inê kê pe obanira na enoni, vige takotako rugu ma ke aporo i Esipito, manga viga tarahura na merongata ma ka meraheariha.” 18God ki bêngenira hete igê na tara i hagatê igê na bagamasusu raha tanga na Asi Memera. Na Isiraelita ka tangaru ni hearihatana.

19O Moise ki tora na surina o Josepo suria na tohenga iata na Isiraelita tanga o Josepo. Renia o Josepo ki bani vi tangara, ki vi: “Matena God ki hagatahigamu, mu totora nga na suriku tenia i Esipito.”

20Na Isiraelita ka pania i Sukote ma ka mêru i Etama igê na pereperegana na bagamasusu raha. 21Suria na tangiana na Araha ki nanago tarata i manga na u na vaha, hanana i hagabâsira renia na tara. Suria na bungiana ki nanago tarata i manga na u na gi, hanana i mavesira. Vikana ngaira ka girara ga arâ nga surigi na tangiani ma na bungiani. 22Na u na vaha ki nanago tare tarata na enoni surigi na tangiani, ma na u na gi surigi na bungiani.

Currently Selected:

TAHINGA 13: KCB

Highlight

Copy

Compare