ESETA (Hebereo) 4
4
O Moretekai ki avarasia ka Eseta
1Matena o Moretekai ki rongo vikana, ngaia ki tarisigi na tuguni iana, suria i obaera ngavê. Ngaia ki hagesuru kakaga, ki kuhuia na bêna renigi na rahu ma ki angiangi raha matena i rârâhia na hinua suria i rugu ngavê na obana. 2Rârâ ma ki tariha igê na tarâto tanga na ruma raha iana na maneraha. Ngaia ki pe banu igê, suria i apu tanga na enoni i hagesuru kakaga vige bêbanu igê. 3Surigi na apaneni hato ga tarohenia igê na tamasinga iana na maneraha, na Siu ka angiangi maramara raha surigi. Ngaira ka harihari, ka angiangi ma ka angiangi maramara ma ka rako ngavê na ani ga hagesuru kakaga ma ka tâhigi na rahu.
4Matena ka Eseta ki rongo tenira na kere gete tagara ma na vâmavo iana renia na tauhana o Moretekai, ngaia ki anumanuma ngavê. Ngaia ki hagatorangenigi na tuguni tanga o Moretekai, hanana vi tuguni renigi urusigi na kakagani. Ma ngaia ki usitenigi. 5Hemuri ka Eseta ki unia o Hataka. Ngaia ka na vâmavo, na maneraha i kasia ki tagara tanga ka Eseta. Ka Eseta ki vi tanga, ki râ tanga o Moretekai, hanana i tarahua, vi na tarana ta kani katoa ma ki tanu hega. 6O Hataka ki râ i pasina o Moretekai, i oga igê na mahera ni hinua i maana na maani ruma na ruma raha iana na maneraha. 7O Moretekai ki hagarongoa renigi na ara ni marâ ga tarahugi ma renia vi na haga gi hita kano Hamane i bani surua vi naka igê na kiboru ni haga iana na maneraha, manga viga mutera na Siu hato. 8Ngaia ki vatea o Hataka tahana na pepa ni bonasiha iana na maneraha, ga bani tokorenia suria na hinua i Susa, hanana viga mutera na Siu hato. O Moretekai ki nungia o Hataka, vi torea na pepa tanga ka Eseta, ma ki ramatenia tanga ka Eseta na tarana ngekana ma ki vi tanga ki arâ ki metamasi na maneraha ma ki nungia, hanana i takira na Siu. 9O Hataka ki kato vikana. 10Ka Eseta ki hagatorangenia aporo tanga o Moretekai, ki vi: 11“Manga ta na enoni, na mane se na gete, ma ki bêbanu i pasina na maneraha igê na kiboru i na akerena na mahera ni ruma raha, ma na maneraha ki pe unia hanana vige arâ me, na enoni ngekana ka nahuia nga ki meme. Na ramata kani râ vikana. Na enoni hato ka bani girara me vikana, haganega tenira na mane ni hagaotonga iana na maneraha i râ me tangara na enoni surigi na ara ni apaneni hato. Na tarana gi tage ma na enoni ki girara i tahitahi igê. Ngaia ki manga ikê. Manga na maneraha ma ki usia na enoni ngekana renia na vato na golo iana, hoi, na enoni ngekana ki girara i tahitahi. Ma ki bani hato na hageha gi tage ma na maneraha ki pe uniê i pasina.”
12Matena o Moretekai ki rongoa na tamasinga iana ka Eseta, 13ngaia ki kasi tamasinga bê aporo tanga ka Eseta, ki haganunua, ki vi: “Siana ko takusia vi igo ko page tahi renira na Siu getera, suria vi igo ko oga i ruma raha iana na maneraha. 14Manga go gâga purua ma igê na matena manga i ngekê, na hetamaniha ki page arâ me i tagua tangara na Siu. Na Siu ka page tahitahi nga noga ma igo ko page meme ma na raraha iana o vaemamu ki page magahuru. Ti ki girara? Vari tanga na matena vikê kanigo vora re na kaniana na maneraha!”
15Ka Eseta ki kasi tamasinga tanga o Moretekai, ki aramia, ki vi: 16“Gu unira haku na Siu hato ga oga i hinua i Susa. Mu harihari ma kamu nungia God ki tamaniê. Siana kamu ngêngê se mu totono surigi na tangiani ma na bungiani gi oru. Igami nikâ, na kere gete tagara iaku menê, igami kami katokato vikana nogamami. Ma hemuri inê kê page arâ i pasina na maneraha, naka ma gê aharêngia na ramata. Manga gê meme, suria vi gê kato vikana, i koro ma.”
17O Moretekai ki aharaga vê ki râ ma ki katogi na marâ ka Eseta ki hagatora renigi.
© 2011 Bible Society of the South Pacific