TANIELE 7
7
NA MARUTEHA IANA O TANIELE
(7.1—12.13)
Na maruteha renira na marâ ga mauri ge he
1Igê na harisi gi tage o Belosasare ki maneraha suria, inê Taniele kê marutegi rako na marâ, matena gê tâ kê mauru i banaku. Inê kê segegi so na maruteha iaku. Igê nga na marâ, gê marutegi.
2Igê na maruteha iaku igê na bungiana ngekana inê kê bâsigi na roga raha, i râ me tenigi na ariruguni ge he na maveta, ma ki hitaria na asi, ki ramo ngavê. 3Na baga marâ mauri ge he ka hura akê me tenia na asi. Ngaira hato ka bâ hehegitigi. 4Na ani hagenago ki bâ manga na laione, ma ki tonga na gagahana manga na ahetaronga. Inê kê bâsia, ga hâgi râ na gagahana, ka ragea aharaga ki ura manga na enoni, ma ka katoa na aitangihana ki manga na enoni.
5Na ruata ki bâ manga na baga marâ raha manga na huto. Ngaia ki ura hagaoto. Ngaia ki garegi ki tâ i rivona na suri ravoravogi oru. Inê kê rongoa na ringe, i vi tanga, ki vi: “Gu ngê nga! Gu ngê nga na ganiani! Gu masu aharêngigo renigi!”
6Ma hemuri inê kê bâsia, i vora me na oruta na marâ mauri. Ngaia ki bâ manga na baga pusi raha. Ngaia ki tonga na gagahana ge he i gerina mangagi na gagahana na manu. Ngaia ki tonga nikâ renigi na bêna ge he. Ga katoa ki ramoramo ngavê.
7Hemuri inê kê bâsia, i vora me na heta na marâ mauri. Ngaia ki raramohaga hunia, i bâ mamagutaga ma ki mamêkuga. Na rivona na aiani ka borahu ngavê. Ngaia ki kurukurugi na ganiani, ma ki puhuritagenigi so i ano na agua, i ngê kasigi. Ngaia ki tora getea ngavê tenira na ani getera, ma ki tonga na hona tangahuru gi tage. 8Matena gê boretenigi na hona, inê kê bâsia na kere hona sisite, i ono akê i berarogani. Ngaia ki bogegi râ tarana na hona gi oru, na ani ga bani oga. Na hona ngekana ki tonga re na maana ma na harana manga na enoni, ma ki tamasi rasia marena.
Na surihata na marâ mamauri
9Inê kê ama ni bâbâ nga, ma kê bâsia, viga nakagi na âgâga raha igê na atohani. Na ani, i bani oga me kere vê noga, ngaia ki râ ki oga igê na hitangini na âgâga. Na tuguni iana ki siki ahuru ngavê, ma na varehuna ki mangagi na varehuna koro na sipi. Na âgâga iana ki na kati, i vavata manga na gi. Na wili igê ka mangagi na anguruna na gi. 10Na gi ki gogogo me tenia na âgâga iana. Rako na rehagaro na enoni ka tagara tanga. Na rehagaro ma na rehagaro ka ura i maana. Na kotiha ki haganega, ma ka tangahigi na buka.
11Matena gê boretenigi, inê kê rongoa mênga na kere hona sisite, ki tamasi rasia marena. Inê kê bâsia, ga nahuia ki me na heta na marâ mauri. Na gahuana ka kasia igê na gi, ki makaka. 12Na ani gi oru getera ka toregi tenira na raramohata, ma ka nakara vê, ka oga rârâ ma ki mataro me na matena i hatohato iata.
13Igê na bungiana gê marute, inê kê bâsia na marâ, i bâ manga na enoni. Ngaia i râ me. Na vaha ka rihia. Ngaia ki râ tanga na ani, i bani oga me kere vê noga. Ga merâ tanga. 14Ga vatea renigi na ramoha, na arahanga ma na ata i rongo raha, hanana na enoni hato i maveta ka tagara tanga, naka ma tenia i he, se vi bâ marata, se vi na tamasinga ta. Na raramohana ki asa, vige page hato, ma na arahanga iana ki page oga tare, ki bê ki arâ.
Na girarana na maruteha
15Inê Taniele kê anumanuma bâraha renia na maruteha iaku, ma kê takoha bâraha renia. 16Inê kê râ tanga na hitangita na ani, ga ura i ngekana, ma kê nungia, ki ramatenigi tangê na marâ hato ngegana. 17Ngaia ki ramatenigi, ki vi: “Na marâ raha mauri ge he ngegana ka na arahanga ge he, ga page heheuri i maveta. 18Ma hemuri na kariana na Araha God ka page urusi ka nahunigi na ramoha ma na arahanga, ma na arahanga iata ki asa, vige page hato.”
19Hemuri inê kê obania ve girara nga na girarana na heta na marâ mauri, i tora getea tenira na ani getera. Ngaia ki hagamamagura. Ngaia ki rumugira na ganiani renigi na rimana, ma ki kurukurura renigi na aiani na rivona, ma ki puhuritagenigi na agua, i ngê kasigi. 20Inê kê obania be giraragi nga na girarani na hona tangahuru gi tage igê na bêna ma na hona, i kahu ono kê, ki bogegi râ na bani hona gi oru. Ngaia ki tonga na maana ma na harana, ma ki tamasi rasia marena tare. Ngaia ki bâ mamagutaga teharigi na ani getigi. 21Na hona ngekana inê kê bâsia, i meraheariha na kariana God ma ki teharira. 22Ma hemuri na ani, i bani oga me i nago kere vê noga, ngaia ki râ me ma ki suria, ma na kariana na Araha God ka teha. Ngaia ka na matena na kariana God ka urusia igê na arahanga.
23Ngaia ki ramatenia vikê tangê, ki vi: “Na heta na marâ mauri ka na heta na arahanga, i page akê me i maveta. Ngaia ki page totora getea ngavê tenigi na ani hato getigi na arahanga. Ngaia ki page menamenaria na maveta hagenani ma ki page purigi so i ano na marâ hato. 24Na hona tangahuru gi tage kaniga na maneraha tangahuru gi tage, ga page nahunia na arahanga. Ma hemuri ta na maneraha getea ki page akê me. Ngaia ki page totora getea ngavê tenira na ani getera na maneraha i nago tarana ma ki page hatungira na maneraha gi oru. 25Ngaia ki page tamasi merongasia na Araha God, ma ki page hagamamasiagara na kariana God. Ngaia ki page gunahia, vi urusigi na ramata na rotu ma na tangiani raha ni rotu. Na kariana God ka page mamasiaga i ruguhana surigi na harisi gi oru ma na hageha ge ono. 26Ma hemuri ka page torea igê na tamasinga, ma ka page hatungia na ramoha tenia, ma ka page hagamagahurua ngavê. 27Ga page mahatangenigi na arahanga, na ramoha ma na ruruguha iata na maneraha hato i maveta tangara na kariana na Araha God. Na arahanga iata ki asa, vige page hato, ma na maneraha hato i maveta ka page oga ruguhata, ma ka page têtê viteata.”
28Ngaia nga na tamasinga iaku. Inê kê bubununuga ngavê ma kê bâ anumanuma ngavê. Na ara ni marâ ki bara i bêku.
Currently Selected:
TANIELE 7: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
