TANIELE 12
12
Na suriha igê na hatongina na maveta
1Na angero, i tuguni siki, ki tamasi tangê, ki vi: “Igê na matena ngekana Mikaele, na angero raha i anumasira na kariamu, ki page râ me. Na matena ngekana ka na matena tangagi na bagabevoani raha ngavê. I mareha rârâ ta na enoni, vige bani bâ marangana rârâ, haganega me tenia na matena na enoni ka vora me moramora i maveta. Igê na matena ngekana na kariamu hato, i oga na atata igê na buka iana God, ka page tahi. 2Rako na ani, ga bani me, ka page mauri aporo. Tani ka page nahunia na mêriha mora ma tarema, ma tani ka page nahuira tare ngavê na makiha. 3Na enoni raha, ga tako mataha, ka page togatoga manga na arito i vavearo. Ma na ani, ga hagesurira na enoni renigi na tarani, ga koro ma oto i maana God, ngaira ka page mave tare ma tarema mangagi na higu.
4“Hoita, Taniele, gu buhia na buka ma ku puruia, ki purupuru mataro me na hatongina na maveta. Na enoni rako ka page rapasia, viga takotako mataha renia, ma ka hagame apeta purua ma.”
5Ma hemuri inê kê bâsirerua na mane gi rua, garu ura i papana heri na ve. 6Na hitangiterua ki hagatea na angero, i tuguni siki i ura kere banu igê na ve, ki vi: “I na keta ka page hatohato igê na tarani ni hagakoneha ngegana?”
7Na angero ki gasigi akê na rimana ma ki tohe renia God, i bani oga me ma ki mauri tare ma tarema. Inê kê rongoa i tohe, ki vi: “I murini na harisi gi oru ma na hageha ge ono na tarani ngegana ka page hato. Ma ki page hato nikâ igê na hagamamasiaganiha tangara na kariana God.”
8Inê kê rongoa na marâ, i visia, ma kê pe tarahua na girarana. Tahema inê kê hagate, kê vi: “Araha, manga i he ka page hato?”
9Ngaia ki aramiê, ki vi: “Taniele, gu râ nga, suria na buka ki purupuru ma na marâ i rarona ka pinihi nga mataro me na matena na hagahatongina. 10Na tarani ngegana ka page uhungira rako na enoni, ga page hagakorora ma ka page hagamatarotarora. Na ani, ga haritohea God, ki asa iata, vige page tako mataha renia, ma ka ama ni haritohea nga hete. Ma na ani, ga tako mataha, ngaira ka page tahetara renia.
11“Haganega tenia na matena, ga hatungia igê na vogasiha i na ara ni tangiani ma ka hagêrasia igê na nununa na ataro i Ruma ni Rotu, ki page vora na tangiani 1290. 12Ga page babarisi na enoni, ga ama ni toto suria nga God, mataro me ka hatohato na tangiani 1335. 13Tangago igo Taniele, ki tuguhigo, vigo tototo suria God, mataro me ko meme ma ko mamaro. Ma igo ko page mauri aporo igê na hatongina na maveta, hanana go nahunia na memu.”
Currently Selected:
TANIELE 12: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
