TANIELE 10

Na maruteha iana o Taniele i papana na ve i Tigirisi

1Igê na oruta na harisi o Kuro ki maneraha surigi i Pesia, na tamasinga iana God ki râ me tanga o Taniele, ga hêtana nikâ vi o Belotesasare. Ngaia ki na morana na tamasinga renia na hearihatana raha. Ngaia ki tako mataha renia, suria ga ramatenia tanga igê na maruteha.

2I na matena ngekana inê Taniele kê angi maramara surigi na wiki gi oru. 3Inê kê haritenigi na ngêra mora, na ganiani ma na vaini, se vi ve surasura bê rârâ ma ki hato na wiki gi oru.

4Igê na tangahuruta gi rua matare he na tangiana igê na hageha gi tage igê na harisi inê kê ura i papana na ve raha i Tigirisi. 5Inê kê sira akê, ma kê bâsia na ani, i tuguni siki ma ki hogotenia na golo na hogosina. 6Na apena ki togatoga manga na hê ahe. Na maana ki mave manga na marangea, ma na oruni na maana karu manga na vavatana na gi. Na rimana ma na êgana ka marora manga na kapa, i togatoga. Na ringena ki rongo raha mangara na enoni rako, ga kasi mamava.

7Inê geteê ma kani gê rigia na maruteha ngekana. Na mane mi tage oga, ngaira ka pe rigia rârâ ta na marâ, ma ka magutenia na ringena. Ngaira ka gava ka ahi. 8Inê geteê ma kê oga so ma kê boretenia na maruteha raha ngekana. Inê ki hato na ramoha. Na maaku ki bâ riariaga, ma na enoni ki asa, vige bâgirarê. 9Matena gê rongoa na ringena, inê kê apuri so i ano, kê baga ma me, ma kê abahia na maaku. 10Ma na rima ki hatariê, ma inê kê aharaga renigi na rimaku ma na buru ni ugaku. Inê kê tata ngavê.

11Na angero ki tamasi tangê, ki vi: “Taniele, God ki takuigo. Gu ura aharaga. Ku karinga maninga. Inê kê torea me na rongoha tangago.” Matena i vi vikana, inê kê ura aharaga, gê tatata mênga.

12Ngaia ki vi tangê, ki vi: “Taniele, siana ko magu. God ki bani aganarigi me na nunginungiha iamu, haganega me tenia na matena go ruhigo maremu moramora igê tanga God, hanana vigo tarahua na takoha mataha. Inê kê torea me na aramiha tanga na nunginungiha iamu. 13Ma na angero, i anumasia na arahanga iana na maneraha i Pesia, ki ura pusiê surigi na tangiani tangahuru gi rua matare tage. Me muri Mikaele, na hitangita na angero raha, ki râ me ki tamaniê, suria inê geteê ma kani gê oga so i Pesia. 14Inê kê râ me, hanana gê hagagirarago renigi na tarani, ga page voravora me i hemuri tangara na kariamu, suria ngaia ki na maruteha renia na matena i muri me.”

15Matena ngaia ki vi vikana, inê kê tubê so, ma ki bara ve tamasi. 16Me muri na angero, i bâ manga na enoni, ki tagare me ki hatarigi na gaviharaku, ma inê kê tamasi. Inê kê vi tanga, kê vi: “Araha, na maruteha ikê ki hagamarusiga apeku ngavê, ma na tataniha ki asa, vige hato. 17Inê kê maratorana na kare rakuraku, i ura i maana na maneraha iana. Manga i he kê girara, vigê megotamasi? Inê ki hato na ramoha, ma kê manavanava.”

18Na angero ki hatariê nikâ, ma inê kê kahu ramo sisite. 19Ngaia ki vi: “God ki takuigo. Na ara ni marâ ka page koro ma tangago. Siana ko anumanuma. Siana ko magu.” Matena i tamasi hato vikana, inê kê kere ramo râ nikâ. Inê kê vi tanga, kê vi: “Araha, gu tamasi me, suria go kanukanuê.”

20-21Ngaia ki tamasi tangê, ki vi: “Go girara vari, vi tanu hega kani gê râ me i pasimu? Inê kê râ me, hanana gê ramatenigi tangago na segesegeha igê na Buka ni Monariha. Inê kê aporo nga i ngekê, hanana gê meheariha na angero, i anumasia i Pesia. Matena gê teharia hato, hoi, na angero, i anumasia i Agaia, ki page akê me nogana. Mikaele, i anumasia i Isiraele, ngaia getea ma ki page tamaniê,

Currently Selected:

TANIELE 10: KCB

Highlight

Copy

Compare