TAGARAHA IATA NA APOSOTOLO 28

I na marê Malata

1Matena igami kami bani mataro me i one ma kami tahi, igami kami girara tenira na enoni i ngekana, vi na atana na marê ngekana ka hêtana vi Malata. 2Na enoni i na marê ngekana ka koro era tangagami. Ki rangi, ma ki magarisi. Ngekana ngaira ka tanga na gi tangagami, ma ka tamanigami. 3O Paulo ki hogo na ario, ma ki naka igê na gi. Ma renia i mahana na gi, na ma ki hura me tenia na ehogo, ma ki garea na rimana, ma ki kuku igê. 4Na Ai ni Malata ka bâsia na ma, i kuku i rimana o Paulo, ma ka hetamatamasi, ka vi: “Hoi, veka na mane i henahu ka no vani ikê. Henaka i tahi tenia na asi, ma na Ataro ni Hagaitangiha ki page nahuia.” 5Mo Paulo ki kangikangia na ma ki vota igê na gi, ma ngaia ki mareha vê, vi ge hatamia rârâ ta na mamasiaganiha renia na ma. 6Ngaira ka vi ma, vi mamanu na apena o Paulo, se ki manumanuga ki votavota ki meme. Ma i murina ga naasia arihu rârâ, ma ka bâsia o Paulo, i mareha vê, vi ge hatamia rârâ ta na mamasiaganiha, ngaira ka tako ma, ka vi: “Na ataro vari ngekini!”

7Hagarangia na agua ngekana ka oga igê tani na mu iana o Pubilio, na maneraha igê na marê. Ngaia ki unigami banu i pasina, ma ki koro tangagami, ma igami kami oga i pasina surigi na tangiani gi oru. 8O vaemana o Pubilio ki matoro, ma ki gavare obana. Ngaia ki tâ igê na bea. O Paulo ki banu igê na kiboru iana, ki nunginungi, ki têbuhia, ma ki hagakomaga. 9Renia na tarana ngekana na enoni hato getera, ga maeha, ka râ me, mo Paulo ki hagakomagara. 10Ngaira ka vategami rako na votovoto, me muri, matena mi tage, ngaira ka hagarutangia na haka renigi na marâ, igami kami obanigi tanga na râha iamami.

O Paulo ki pania i Malata ma ki râ i Roma

11I murini na hageha gi oru igami kami tage igê na haka ni Alesanteria. Na atana na haka ka na “Ataro Papa”. I na matena i ramo na asi ma na roga, na haka ngekê ki bani oga i na marê ngekana. 12Igami kami ata igê na hinua raha i Sirakuse, ma kami oga i ngekana surigi na tangiani gi oru. 13Tenia i ngekana igami kami tage kami râ, ma kami ata igê na hinua raha i Resio. Igê na tangiana i muri ki haganega na târagina, ma suria na roga ki tora i murimami, igami kami râ surigi ma na tangiani gi rua, ma kami ata igê na sugu i hinua i Puteoli. 14I ngekana igami kami tarahura igê tani na enoni, ga tongesuri. Ma ngaira ka vi tangagami, kami oga henira suria na wiki gi tage. Manga gami râ me i Roma nga. 15Na enoni i Roma, ga tongesuri, ka rongogami, vi gami râ me, ma ka râ me vurusigami igê na Agua ni Hohoronga iana o Apio ma igê na Ruma ni Mahuara gi oru. Matena o Paulo ki bâsira, ngaia ki visia koro God, ma ki koro na apena.

O Paulo i hinua i Roma

16Matena igami kami ata i Roma, ka hagamarumungenia o Paulo, ki oga getea igê na ruma, ma ta na mane ni me ki hahutugia.

17I murini na tangiani gi oru o Paulo ki unira na meraha iata na Siu, ga oga i ngekana, hanana vi ga hekarigi. Matena ga bani haku me, ngaia ki tamasi tangara, ki vi: “Goaku! Henaka vi inê kê pe erasira rârâ na goaka, se vi na tauha, na êvarika ga hagatarêngenigi tangagia, ma na Siu ka tagareniê tangara na Ai ni Roma, ma inê kê oga igê na ruma ni hagaitangiha. 18Ngaira ka hagateê renia na parongaku, ma ka obania, vi ga rupasiê, renia ngaira ka pe tarahua rârâ ta na marâ, hanana vi inê be meme renia. 19Ma renia na Siu ka pe obania, vi na Ai ni Roma ke rupasiê, tahema ngaira ka tuguriê, ma inê kê obania, vi na mane i teha igê na gavumane i Roma, ki suriê, henaka inê kê pe merahetuguri na goaku mareku renia ta na marâ. 20Tahema inê kê obanigamu, vi mu arâ me, ma kê megamu tamasi, suria ngaira ka rakuê manga na enoni, i oga igê na ruma ni hagaitangiha renia o vani, na Isiraelita ga naasia.”

21Ngaira ka vi tanga o Paulo, ka vi: “Igami ki pe tarahugami na leta renigo tenia i Jutea, ma nikâ i pe râ me ta na goaka ke hagarongogami renigo, se vi ge visia ta na marâ era, vi go tanua. 22Ma igami kami obania, vi gami rongogi na takotako iamu, renia igami kami girara, i na ara ni agua na enoni ka tamasi pusia na haku, go oga igê.”

23Vikana ngaira ka surua na tangiana henia o Paulo, ma igê na tangiana ngekana ka haku me na enoni, ga rako teharenia i nago, igê na agua, i oga igê o Paulo. Ngaia ki hagararingenia ma ki tarohenia na Arahanga iana God tangara, haganega i mavoraro ki rârâ ma ki bungi. Ngaia ki uhungira, vi ge tongesuria o Jesu, ma ngaia ki hagatanga monari renia na tamasinga iana, i râ suria na Buka na Ramata iana o Moise ma surigi na segesegeha iata na poropete. 24Tani na hitangita ka tongesuria na tamasinga iana, ma tani ka usi, vi ge tongesuria. 25Tahema ngaira ka pe obahaku, vi ge tongesuria, ma na matena ga sugi arâ noga, o Paulo ki visia na marâ gi tage ngekê tangara, ki vi: “I vi koro na Higona Apu, matena i tamasi i harana o Isaia na poropete tangara na êvarimi! 26Renia ngaia ki vi:

‘Go arâ, ma ko tamasi tangara na enoni ngegana, ko vivi:

Igamu kamu page rongorongo,

ma ki asa, vi gamu rongogirara.

Igamu kamu page bâbâ,

ma ki asa, vi gamu bâsia.

27Renia na enoni ngegana ka usi vi ge rongogirara.

Ngaira ka bunigi na karingata

Ma ka piringigi na maata.

Manga siana,

vikana ngaira ke bâsia vari,

ma ke rongoa vari,

ma ke rongogirara vari,

ma ke ahoro me tangê vari,

ma inê be hagakomagagi

na apeta ma na aitangihata.

God ki vi vikana.’”

28Mo Paulo ki vi nikâ: “Hoi, i tuguhigamu, vi mu girara, na taroha iana God renia na tahinga ki tangara na enoni, ga pe Siu. Ngaira nga kaniga page rongoa!” [O Paulo ki tamasi hato vikana, na Siu ka râ vê, ma ka hetuguri bâraha so mareta.] 29Matena o Jesu ki bani tamasi vikê, na Siu ka arâ pania ma ka hetuguri bâraha so mareta.

30Surigi na harisi gi rua o Paulo ki oga igê na ruma, i taharia, ma ki unira banu na enoni hato, ga obania, vi ga bâsia. 31Ngaia ki ateate renia na Arahanga iana God, ma ki hagesurira renia na Araha o Jesu Kirisito. Ngaia ki pe magu, vi ge tamasi, ma ki asitatara hete, hanana i tamasi.

Currently Selected:

TAGARAHA IATA NA APOSOTOLO 28: KCB

Highlight

Copy

Compare