TAGARAHA IATA NA APOSOTOLO 26

O Paulo ki ramatenia na parongana i maana o Agiripa

1O Agiripa ki vi tanga o Paulo, ki vi: “I araria, go tamasi i na matena ikê, ma ko ramatenia na parongamu.” O Paulo ki tagare rima, ma ki ramatenia na parongana, ki vi:

2“Maneraha Agiripa! Inê kê takusia, gê hagâvo, renia i ngekê inê kê girara gê ramatenia na parongaku i maamu pusigi na ara ni marâ, na Siu ga tuguriê renigi. 3Renia igo ko giraragi bâkoro era na ara ni tauhata na Siu ma na takotako, ga hegitigi, i pasita. Inê kê nungigo, ko piringiape, ma ko karingê.

4“Na Siu hato ka girara na mêriha iaku, haganega tenia gê sisite. Ngaira ka girara, vi haganega igê na matena gê sisite, inê kê oga ma i pasiku ma i Jerusaleme. 5Ngaira ka bani girara arihu me era, matena gê sisite, inê kê pane henia na haku na enoni igê na rotu iamami, ga râ surigi na ara ni ramata hato. Na enoni ngegê ka na Pariseo. Ma ki manga vi ngaira, ma ka obania, ga visia, vi na tarana ngekana ki monari. 6Ma i ngekê inê kê ura ikê igê na tamasinga, renia inê kê tongesuria, God ki page hagamonaria na suruha iana tangara na êvarimami. 7Ma na varo ninuni tangahuru matarerua iata hegitigi na enoni hato i pasimami ka naasia, vi ga tavoa na marâ, God i bani surua, suria ga rahesia tare God na tangiani ma na bungiani. Ma ku bâ, maneraha na Siu nogata ka tuguriê, renia inê kê naasia nga na tarana ngekana. 8Tanu hega igamu na Siu kanimu takusia, vi bara tangagamu, vi gamu tongesuria, vi God ki hagamaurira aporo na enoni, ga bani me? 9“Inê mareku nikâ kê takusia, i tuguhiê, vi gê uhungia bâraha, vi gê erasia o Jesu ni Nasarete. 10Nga na tarana gê bani katoa i Jerusaleme. Na mane ni vogasiha ga teha ka vateê na ramoha, ma kê kasira rako na kariana God i ruma ni hagaitangiha. Ma na matena ga surira, vi ga meme, inê nogaku kê vi, vi i koro ma. 11Hagarako inê kê hagaitangira igê na ara ni ruma ni sukuru, ma kê uhungira, vi ge kasia na tongesuriha iata. Inê kê mangariaga ngavê tangara. Tahema inê kê arâ igê na hinua getigi, ma kê merongasira.

O Paulo ki tamasia vi tanu hega ngaia kani tongesuria o Jesu

(Tag 9.19; 22.6-16)

12“Na mane ni vogasiha ga teha ka vateê na ramoha, ma ka hagatorê. Tahema inê kê râ i Tamasiko. 13Inê kê tavoraha, maneraha ma na matena i ritova, inê kê bâsia ta na marara, i mave teharia na arito, ma ki takirigami, na tamaku menê, i take me tenia na vavearo. 14Igami hato kami vota so i ano, ma inê kê rongoa na ringena na Araha, i tamasi tangê igê na tamasinga iata na Siu, ki vi: ‘Saulo, Saulo! Suria hega kanigo merongasiê? Igo ko gaharenigo maremu, manga go tahurua bê aporo na apinige, i masi, manga na puruka i kikia aporo na apinige, i masi, i taua na avanuna.’ 15Inê kê hagate, kê vi: ‘O ti kani igo, Araha?’ Ma na Araha ki vi: ‘O Jesu kani inê. Igo ko merongasiê. 16Gu aharaga ma ku ura. Inê kê vora me tangago, hanana vi gê atego, ko tamaniê. I tuguhigo, vigo hagarongora na enoni getera renia na marâ, go kahu bâsia i ngekê akê, ma renia na marâ, gê page hagabâsigo renia i hemuri. 17Inê be hagatahigo tenira na Isiraelita, ma tenira na enoni, ga pe Siu, renia inê be hagatorangenigo tangara. 18I tuguhigo, vigo mavesigi na obata, ma ko horora tenia na mengo tanga na marara, ma tenia na raramohana Satana tanga God, hanana God ki bonotenigi na tasi iata, renia ga tongesuriê, ma ka bêbanu henira na enoni, God i bani atera.’

O Paulo ki tamasia na tagaraha iana

19“Ma i ngekana, maneraha Agiripa, inê kê katoa nga na marâ, na Araha i bonasiê renia. 20Inê kê ateate hagenago i Tamasiko i Jerusaleme, ma hemuri i Jutea hagenani, me pasita na enoni, ga pe Siu. Inê kê ateate, hanana vi ngaira ka murisigegi na parongata era, ma ka maatia God, ma ka tanugi na marâ, ga araria na ani haoru na mauriha. 21Ma suria inê kê ama ni ateate nga vikana, tahema na Siu ka ranguie, matena inê kê goga i Ruma ni Rotu, ma ka uhungia, vi ga nanahuiê. 22God ki tamaniê tare, haganega me tenia i nago. Ngaia kani gê ura ikê, ma na ateateha iaku ki tagenana ma tangara na enoni hato, na enoni purua ma na enoni raha. Na marâ, gê tamasi renigi, ka tagenani ma henigi na marâ, ga visigi na poropete mo Moise, vi ga voravora me. 23Ngaira ka bani vi, vi tuguhia na Mesaia, i hatamia na mamasiaganiha, ma ki meme, ma ki hagenago ki mauri aporo tenira na enoni, ga bani me, hanana i hagarongora na Siu ma na enoni, ga pe Siu, ka girara ga tahitahi. Ma na tarana ngekana ki manga na marara tangara.”

24Matena o Paulo i ramatenia vikana na parongana, o Fesito ki ngiria, ki vi: “Paulo, igo ko beka! Na giraraha raha iamu ki hagabekasigo!” 25O Paulo ki arami, ki vi: “Gavumane inê kê pe beka. Na tamasinga iaku ki monari, i pe bekabekaga. 26Maneraha Agiripa! Inê kê pe haneta, vi ve tamasigi na ara ni marâ tangago, renia igo ko bani giraragi na ara ni marâ, suria na tarana ngekê ki pe vora me pinihi i ta agua. 27Maneraha Agiripa, igo ko tongesurira na poropete, iê? Inê kê girara, go tongesurira!”

28O Agiripa ki vi tanga o Paulo, ki vi: “Igo ko takusia vari, vi go katoê, kê voravora re na enoni kirisitiano i na kere matena i ngekê?” 29O Paulo ki arami, ki vi: “Naka ma na kere matena, se na matena borahu, inê kê nungia God, hanana igo ma igamu hato mu karingê i na matena i ngekê, kamu voravora manga inê, ma na marâ gi tage ma, ga pe rakugamu!”

30Ma hemuri na maneraha na gavumane, ka Berenise, ma na enoni hato getera ka aharaga, 31ma ka hura vê, ma ka hetamatamasi, ka vi: “Na mane ikana ki pe tanua rârâ ta na marâ era, hanana vi ge nanahuia, se vi ge kasia i ruma ni hagaitangiha.” 32Mo Agiripa ki vi tanga o Fesito, ki vi: “I ararigo, gu rupasia o vani akê ma suria vi ngaia ki obania na mane, i teha igê ma gavumane i Roma, vi suria, tahema ki asa, vi gu rupasia.”

Currently Selected:

TAGARAHA IATA NA APOSOTOLO 26: KCB

Highlight

Copy

Compare