TAGARAHA IATA NA APOSOTOLO 21

O Paulo ki arâ i Jerusaleme

1Igami kami arira ma kami râ. Mi tage kami oto tare, ma kami ata i Koso. Na tangiana i muri me igami kami ata i Rotesi, ma tenia i ngekana igami kami tage tanga i Patara. 2Ma igami kami tarahua na haka, i arâ tanga i Punisia. Ngekana igami kami tage igê ma kami râ. 3Mi rârâ, ma kami bâsia i mahamami na marê i Saipero, ma kami ritare tanga i Siria. Igami kami goto i Taire, na agua i kasikasi toraha igê na haka. 4I ngekana igami kami tarahura igê tani na enoni, ga tongesuri, ma kami oga henira suria na wiki gi tage. Igê na raramohana na Higona Apu ngaira ka visia tanga o Paulo, ka vi: “Siana ko arâ tanga i Jerusaleme.” 5I hato na ogaha iamami henira, ma igami kami râ, ma kami uruia na râha iamami. Ngaira hato, na mane ma na gete iata ma na kareta, ka pania na hinua, ma ka râ me surigami, ka kasigami. Igami hato kami susure so i ano, ma kami nunginungi. 6Ma hemuri igami kami arigami heri, ma kami tage igê na haka. Ma ngaira ka aporo i pasita.

7Igami kami uruia na râha iamami, mi tage tenia i Taire tanga i Potolomai. Ma i ngekana igami kami vatugira igê na enoni, ga tongesuri, ma kami oga henira suria na tangiana gi tage. 8Igê na tangiana i muri igami kami râ, ma kami ata i Sesarea. I ngekana kami banu i pasina o Pilipo. Ngaia ki na hitangita na mane gi pi, na enoni i Jerusaleme, ga tongesuri, ka bani atera tangagi tani na tagaraha. 9Ngaia ki bani aparara na kare hehene ge he, ga kare viru, ma ka ateate renia na tamasinga iana God. 10Matena igami kami bani oga i ngekana surigi na tangiani haritamani, o Agabo ki ata me tenia i Jutea. Ngaia ki na mane ni hinarunga. 11Ngaia ki râ me i pasimami, ki tavoa na hogosina o Paulo, ki rakugi marena na êgana ma na rimana renia, ma ki vi: “Na Higona Apu ki vi vikê: Na Siu i Jerusaleme ka page rakua vikê na avanuna na hogotekâ ngekê, ma ka page tagarenia tangara na enoni, ga pe Siu.”

12Matena mi rongo vikana, igami ma na enoni i ngekana, igami kami ama ni hagakonea nga o Paulo, kami vi: “Siana ko arâ i Jerusaleme.” 13Ma ngaia ki aramigami, ki vi: “Na ta kani tanugamu, kamu angi vikana, mu hagarugu obaku bâraha? Inê kê nanê tanga ga rakuê i Jerusaleme, ma nikâ gê meme renia na Araha o Jesu.” 14I asa iamami, vi gami katoa, ke urusi parongana. Tahema igami kami naka ma vê, ma kami vi: “Na Araha ma ki girara.”

15I murina mi oga i ngekana, igami kami hagarurugu, ma kami uruia na râha iamami tanga i Jerusaleme. 16Tani na enoni i Sesarea, ga tongesuri, ka râ me henigami nikâ, ma ka megami râ i pasina o Manasoni, na mane mi tuguhia. I pasina kani i Saipero. Ngaia ki bani tongesuri me i nago vê.

O Paulo ki vatugia o Jakobo

17Matena igami kami ata i Jerusaleme, na enoni, ga tongesuri, ka vagevage, ma ka unigami banu i pasita. 18Igê na tangiana i muri o Paulo ki râ henigami, hanana vi bâsia o Jakobo, ma na ara ni meraha igê na rotu ka râ me nogata. 19O Paulo ki mêri renira, ma ki hagarongora renigi na ara ni marâ hato, God i bani katogi i pasita na enoni, ga pe Siu, renigi na tagaraha iana o Paulo. 20Matena ga rongoa hato, ngaira hato ka visia raha God. Ma hemuri ka vi tanga o Paulo, ka vi: “Goamami igê na tagaraha, igo ko girara, ga rako na rehagaro na Siu, ga bani têa na tongesuriha, ma ka têgi gatagata na Ramata iana o Moise. 21Ngaira ka bani rongoa na tamasinga renigo, vi igo ko bani hagesurira na Siu hato, ga oga igê na agua iata na enoni, ga pe Siu, hanana viga nakagi vê na Ramata iana o Moise, ma ko bani vi tangara, vi siana ka retegi râ na gavoni na varata na kareta, ma siana ka arâ surigi na tauhata na Siu. 22Ngaira ka page girara, vi igo ko bani ata me. Hoi, na ta ka katoa renia? 23Go tanua na marâ, mi visia tangago! Eka ka goga na mane ge he, ga katoa na suruha tanga God. 24Go hakunira, ma igamu, igo ma ngaira, kamu tanua na marâ, i visia na Ramata, mu tanua na vuripusiami tenigi na suruha tanga God. Ma igo ko vurigi na vogasiha tanga na vuripusiata. Ma hemuri ngaira ka kahu girara ga tapurugi na bêta. Igê na tarana ngekena na ara ni enoni ka page girara, vi na tamasinga renigo ka pe monari, ma igo maremu ko râ surigi na Ramata iana o Moise. 25Ma ka hega na enoni, ga pe Siu ma ka tongesuri? Hoi, igia ka bani segea na leta tangara, ma ka bani hagarongora renigi na marâ, igia ga takusigi, vi ga tuguhira. Siana ka ngêngê na ngêra, ga bani susu tangara na ataro renigi, se vi ga ngêngê na gapu, se vi na ganiana, ga nguria, ma siana ka gamogamo, paronga iera, se vi na marâ vigana.”

26Ma hemuri o Paulo ki hakunira na mane, ma na tangiana i muri me ngaia ma na mane ngegana ka tanua na vuripusiata renigi na suruha iata tanga God. Ma hemuri o Paulo ki banu i Ruma ni Rotu, ma ki visia mataha na matena, ga page hatohato igê na vuripusiata renigi na suruha tanga God, ma ka page tagarenia igê na vogasiha, i rupasia na ara ni hitangita.

Na Siu ka ranguia o Paulo i Ruma ni Rotu

27Matena ga hato noga na tangiani gi pi, tani na Siu tenia na apanena i Asia ka bâsia o Paulo i Ruma ni Rotu. Ngaira ka hagatagetagera na enoni hato, ma ka ranguia o Paulo. 28Ngaira ka ngerengere, ka vivi: “Isiraelita, tamanigami! Na mane ikê ki na mane, i hagesurira na enoni hato surigi na ara ni hinua hato, ma ki tamasi erasira na Ai ni Isiraele, ma na Ramata iana o Moise, ma na Ruma ni Rotu ikê. Ma i ngekê ngaia ki merabanu nikâ i Ruma ni Rotu tani na enoni, ga pe Siu, ma ki aerasia na agua, i apuna!” 29(Ngaira ka tamasi vikana, suria ngaira ka bani bâsia o Toropimo na mane ni Epeso, i râhia na hinua raha henia o Paulo, ma ngaira ka takusia ma, vi o Paulo ki mebanu i Ruma ni Rotu.)

30Ngaira ka hagatagetagera na enoni hato i hinua raha, ma na enoni hato i hinua raha ka tango ka haku me i na agua gi tage, ka ranguia o Paulo, ma ka okebaba henia hura tenia na Ruma ni Rotu. Ka parama na maa ni Ruma ni Rotu, ma ka purupuru. 31Na enoni, ga mangamangariaga, ka uhungia, vi ga nahuia o Paulo, matena na tamasinga ki râ tanga na mane, i araha tangara na mane ni me ni Roma, vi na enoni hato i Jerusaleme ka tanua na perenga. 32Na mane, i araha tangara na mane ni me, ki bonasira ototo râ tani na mane ga bêngenira na mane ni me ma na mane ni hearihatana, ka râ henia, ma ki hatani tango vato tangara na enoni. Matena na enoni ka bâsia, i râ me henira na mane ni hearihatana, ngaira ka naka so o Paulo, mareha vi ge tahurua nikâ. 33Na mane, i araha tangara na mane ni me, ki râ tanga o Paulo, ki têa, ma ki bonasira na mane ni hearihatana, ka rakua renirerua na seni gi rua. Ma hemuri ngaia ki surare, ki vi: “O ti ngekê? Ma na ta kani erasia?” 34Tani na enoni ka ngere ka visia ta na marâ, ma tani na enoni ka ngere ka visia ta na marâ getea. Na mane, i araha tangara na mane ni me, ki bagatatako renigi na tamasinga iata, ka tora hegitigi, ma ki pe girara, vi na ta ki na hunana na perenga. Tahema ngaia ki bonasira na kariana, ma ka metagere o Paulo, ka mebanu igê na ruma nganganihaga iata. 35Ngaira ka urua rârâ, ma ka tariha igê na tara akê tanga na ruma nganganihaga iata, ma tenia i ngekana na mane ni hearihatana ka tugia, suria na enoni ka mangariaga teha. 36Ngaira hato ka tarogenia, ma ka ngerengere, ka vivi: “Ge nahuia!”

O Paulo ki ramatenia na parongana

37Matena na mane ni hearihatana ka mebanu noga o Paulo igê na ruma nganganihaga, ngaia ki tamasi tanga na mane, i araha tangara na mane ni me. Ngaia ki vi: “I koro ma, be visia ta na marâ tangago?” Na mane, i araha tangara na mane ni me, ki hagate, ki vi: “Igo ko girara vari na tamasinga ni Agaia, iê? 38Hoi, i manga ngekana, igo ki mareha vi na mane ni Esipito, i haganega i nago na perenga, iê? Ngaia ki merarâ na rehagaro ge he na manero igê na bagamasusu raha.”

39O Paulo ki arami, ki vi: “Inê na Siu, gê vora i Tareso ni Silisia. Inê na mane igê na hinua raha. Gu hagamarumungeniê be tamasi tangara na enoni.” 40Na mane, i araha tangara na mane ni me, ki hagamarumungenia. Vikana o Paulo ki ura igê na tara akê tanga na ruma nganganihaga, ma ki bubuhira na enoni. Matena ngaira ka muni so, o Paulo ki tamasi tangara igê na tamasinga iata na Siu, ki vi:

Currently Selected:

TAGARAHA IATA NA APOSOTOLO 21: KCB

Highlight

Copy

Compare