TAGARAHA IATA NA APOSOTOLO 14

O Paulo mo Banebasi i hinua i Ikonio

1Na marâ, i tagenana ma, ki vora me i hinua i Ikonio. O Paulo mo Banebasi karu banu i ruma ni sukuru iata na Siu, ma karu tamasi bâkoro era. Tahema ka rako na Siu ma na enoni, ga pe Siu, ka kahu tongesuria o Jesu. 2Ma na Siu, ga usi, vi ge tongesuria o Jesu, ka hagatagetagera na enoni, ga pe Siu, hanana vi ga rêra pusira na enoni, ga tongesuri, ma ka mangariaga tangara. 3Na aposotolo karu oga arihu i ngekana. Ngairerua karu tamasi ramo renia na Araha o Jesu. Ma na Araha ki hagatanga monari renia na tamasinga iaterua, renia na korohana, suria ngaia ki vatererua na ramoha, hanana garu katogi na mena ma na tagaraha raha. 4Na enoni i hinua raha ka hevoavoa so mareta. Tani ka pane henira na Siu, ma tani ka pane henirerua na aposotolo.

5Ma hemuri na enoni, ga pe Siu, ma na Siu henira na maneraha iata ka hekarigi, vi ga hagatavarerua, ma ka ariha hunirerua renigi na hê. 6Matena na aposotolo karu rongo, ngairerua karu gava, karu râ i hinua i Lisitare me hinua i Terebe, me na apanena hagarangirerua. Na hinua ngegê karu oga i Likaonia. 7Ma i ngekana ngairerua karu ateate igê renia na Taroha Koro renia o Jesu.

I hinua i Lisitare na Siu ka ariha hunia igê o Paulo renigi na hê

8I hinua i Lisitare ki oga igê ta na mane, i tavi na êgana. I haganega tenia na matena i vora, ma ki bara, vi ge arârâ. 9Ngaia ki gâga ma, ma ki karingagi na tamasinga iana o Paulo. O Paulo ki girara, vi na mane ngekana ki tongesuri, ma ki araria, vi ge komaga. Tahema ki boretenia. 10Ma ngaia ki tamasi raha tanga, ki vi: “Gu aharaga ototo râ nga.” Na mane ki reke kê, ma ki haganega ki rârâ. 11Matena na enoni ka bâsia na tarana ngekana, i tanua o Paulo, ngaira ka haganega ka ngerengere igê na tamasinga iata i Likaonia, ka vivi: “Na ataro karu maramare nuni, ma karu so me i pasika!” 12Ngaira ka hêtana o Banebasi renia na ataro raha o Soisi, mo Paulo ka hêtana renia na ataro o Hemesi, suria o Paulo ki tamasi tare. 13Na ruma na ngêsu, ga vogasia igê na ataro raha o Soisi, ki oga râ i metara i hinua. Na mane ni vogasiha i rahesia na ataro raha o Soisi ngekê, ki toregi me na puruka mane, ga mahe renigi na takani na apinige. Ngaia ma na enoni ka obania, vi ga susu tangarerua na aposotolo. 14Matena o Banebasi mo Paulo karu rongo vikana, ngairerua karu tarisigi na tuguni iaterua, na girarana, vi garu usi, ma karu tango karu râ, ma karu ura i guputa na enoni, ma karu ngere, karu vi: 15“Vegamu! I hega mu kato vikê? Na enoni ma kani igamirua! Igamirua ka na enoni manga igamu! Igamirua kamuru râ me ikê, kamuru tamasia na Taroha Koro renia o Jesu, hanana muru horogamu tenigi na vogasiha tangara na marâ purua, ma kamu rahesia ma hete God mamauri, i hagavoragi na vavearo, na ano, na asi, ma na ara ni marâ hato igê. 16I nago God ki nakara mavê na enoni hato i maveta, ka râ surigi na takotako iata mareta. 17Henaka i manga ngekana, ma ngaia ki hagatanga monari tare renia marena igê na tagaraha koro iana. Ngaia ki katoa na rangi ki râ me tangagamu tenia na roto. Ngaia ki katogi ka oga na harisi tangagamu igê na mateni tange. Ngaia ki vategamu na ngêra, ma ki hagakoro obami bâraha.” 18Henaka vi na aposotolo karu tamasi vikana ma ki kere bara tangarerua, vi garu urapusira na enoni, hanana vi siana ke susu tangarerua. Henaka i manga ngekana, ma ngairerua karu ura hagabarasira.

19Tani na Siu ka râ me tenia i Antioko i Pisitia ma tenia i Ikonia. Ngaira ka katora na enoni, ka pane henira, ma ka takea o Paulo renigi na hê, ma ka okerataratagenia, ka mehura tenia na hinua, suria ga vi ma, vi i me. 20Ma na matena na enoni, ga tongesuri, ka haku me rihia, ngaia ki aharaga ma ki aporo râ i hinua. Igê na tangiana i muri ngaia mo Banebasi karu râ i hinua i Terebe.

O Paulo mo Banebasi karu aporo i Antioko i Siria

21O Paulo mo Banebasi karu ateate renia na Taroha Koro i hinua i Terebe, ma renia na ateateha iaterua rako na enoni ka tongesuria o Jesu. Ma hemuri ngairerua karu aporo i Lisitare, me muri karu aporo i Ikonio, ma hemuri karu aporo i Antioko i Pisitia. 22Ngairerua karu hagaramonira na enoni, ga tongesuri, ma karu kanukanura, ka gatagata monari igê na tongesuriha. Ngairerua karu hagesurira, karu vi: “I tuguhigia, vi ga hatamigi bâraha na mamasiaganiha, hanana igia ka page vagevage igê na arahanga iana God.” 23Ngairerua karu hagêgurira na meraha igê na ara ni hakuta na enoni, ga tongesuri, karu nunginungi ma karu harihari, ma karu nungia na Araha, ki anumasira, suria ngaira ka hagêguritogo renia. 24I murina garu aharêvoro i na apanena i Pisitia, ngairerua karu ata me i Pamupilia. 25Ngairerua karu tarohenia o Jesu tangara na enoni i hinua i Perega, ma hemuri karu so i hinua i Atalia. 26Ma tenia i ngekana ngairerua karu tage igê na haka ma karu aporo i Antioko. I nago i hinua ngekê na enoni, ga tongesuri, ka bani nungia God, ki onosurirerua bâkoro igê na tagaraha iaterua, i kahu hato i ngekê.

27Matena garu ata me i Antioko, ngairerua karu unira haku me na enoni, ga tongesuri, ma karu hagarongora, renia vi manga i he God ki tamanirerua igê na tagaraha iaterua, ma manga i he ngaia ki tangahia na tara tangara na enoni, ga pe Siu, ka tongesuri. 28Ngairerua karu oga arihu henira na enoni, ga tongesuri i ngekana.

Currently Selected:

TAGARAHA IATA NA APOSOTOLO 14: KCB

Highlight

Copy

Compare