TAGARAHA IATA NA APOSOTOLO 10

O Petero mo Konelio

1I Sesarea ki oga igê ta na mane, o Konelio na atana. Ngaia ki araha tangara na mane ni me tangarê gi tage. Na mane ni me ngegana ngaira kani ta apaneni me na meronga ni Roma. Ma na apaneni me ngekana ka hêtana vi “Na Apaneni Me ni Itali.” 2Ngaia ki rahesia koro tare God. Ngaia ma na ahemata iana ka rahesia God. Ngaira ki tamanira bâraha na Siu, ga matareha, ma ki nunginungi tare tanga God. 3Ta na tangiana, na ararina i pepe i oru na arito, ngaia ki marute, ma ki bâsia maninga, vi tani na angelo iana na Araha ki banu me, ma ki vi tanga, ki vi: “Konelio!” 4Ngaia ki boretenia na angelo, ma ki magu, ma ki vi: “Na ta va?”

Na angelo ki arami, ki vi: “God ki bani aganarigi na nunginungiha iamu, ma ki bani girarago, vi go tamanira na enoni, ga matareha, ma ki takusigo. 5Ma i ngekê gu hagatorangenira tani na mane, ke râ i Jopa, ke unia me ta na mane, na atana hagenani ka no Simone Petero. 6Ngaia kani gâga i pasina o Simone, na mane i maningaigi na gavota na puruka. Na ruma iana ki oga hagarangia na asi.” 7Ma hemuri, matena i tamasi hato vikana, na angelo ki râ vê, mo Konelio ki unirerua na vererua na mane tagara i ruma iana, ma nikâ na vere tage na mane ni me. Na mane ni me ngekê ki rahesia God. Ngaia kani ta na hitangita na kariana, o Konelio i hagêguritogo renira. 8Ngaia ki hagarongora renia na maruteha iana, ma ki hagatorangenira vê, ka râ i Jopa.

9Igê na tangiana i muri, matena ga arâ i tara, ma ka hagarangia me noga i Jopa, o Petero ki akê i gerina na ruma, i tora be, hanana vi nunginungi igê. Na ararina i ritova. 10Ngaia ki magê, ma ki pasi ngê. Matena ga hagamako ngêra, ngaia ki marute. 11Ngaia ki rigia na vavearo, i tahataha, ma ta na marâ, i bâ manga na apena na gahu siki, ki so me, ma ki bâ, manga vi na enoni ka tê igê na sukuni ge he na gahu. 12Ma igê na gahu ngaia ki bâsigi igê na ataka vê ma na marâ, ga mauri i mu, ma na marâ mangara na ma, na gagarisu, na tata, na babagiro, na gunu ma na manu. 13God ki vi tanga o Petero, ki vi: “Petero, gu aharaga. Ku nahuira ma ku ngêra.” 14Mo Petero ki vi: “I asa vê, Araha! Inê kê pe ngêgi noga na marâ, na ramata ka visira, vi ga bera, ma ka pe arari, vi ge ngaura.”

15God ki tamasi tanga nikâ, ki vi: “Siana ko visira, vi pe arari, vige ngaura na marâ, God i visira, vi ga pe apu.” 16God ki tamasi vikana hageoru tanga. Ma hemuri na gahu ki magahuru aporo i vavearo.

17O Petero ki kone renia na girarana na maruteha iana. Matena i oga ki konekone vikê, ma na mane, i hagatorangenira o Konelio, ka bani ata me, ka hagate renia na ruma iana o Simone, hanana vi ga girara, ma i na matena ngekana ngaira ka ura me i maa ni ruma. 18Ngaira ka agoe, ka vi: “Oe, ta na mane, na atana o Simone Petero, ki gâga ikê?” 19O Petero ki takotako mênga renia na girarana na maruteha, ma na Higona Apu ki vi: “Rongo! Na mane gi oru ga bâbâ renigo igê. 20Gu nanê ku vato, ma siana ko magu, vi go arâ henira, suria inê kani gê hagatorangenira.” 21Ngekana o Petero ki so, ma ki vi tangara na mane, ki vi: “Inê nga na mane, mu bâbâ reniê. Na ta kanimu râ me renia?”

22Ngaira ka arami, ka vi: “O Konelio ki hagatorangenigami. Ngaia ki na araha iata na mane ni me tangarê gi tage. Ngaia na mane koro, ma ki rahesia God. Ma na Siu hato ka visia, vi ngaia ki na mane koro era. Ta na angelo iana God ki bani vi tanga, vi unigo i pasina, hanana vi rongoa na marâ, go visia.” 23O Petero ki vi: “Mu banu me ka mauru.”

Igê na tangiana i muri o Petero ki hagarurugu, ma ki râ henira, ma tani na enoni i Jopa, ga tongesuri, ka râ henia. 24Igê na tangiana i muri ngaira ka ata vê i Sesarea. Ma i ngekana o Konelio ki oga karia igê, ma nikâ na raraha iana ma na tamana koro ka oga karia, suria o Konelio ki bani unira me. 25Matena o Petero ki ata me noga i metara, o Konelio ki hura me vurusia, ki susure i maana, ma ki tu bê tanga. 26Mo Petero ki vi tanga, ki aharaga aporo. Ngaia ki vi: “Gu aharaga, renia inê nogaku na enoni ma.” 27O Petero ki ama ni tamasi nga tanga o Konelio, matena garu banu i ruma, ma i rarona na ruma ngaia ki bâsira, ga rako na enoni, ga bani haku. 28Ngaia ki vi tangara, ki vi: “Igamu maremi kamu bani girara bâkoro, vi na rotu iaku ki manimania na Siu, vi ge bêbanu i pasina na enoni, i pe Siu, se vi ge hakunia. Ma God ki bani vi tangê, vi siana kê visia ta na enoni, vi bera, se vi siana be arâ i pasina. 29Tahema, matena mu uniê, inê kê pe haneta, vi ve râ me. Hoi, be hagategamu, na ta kanimu uniê renia?”

30O Konelio ki vi: “I oge na nora vê na tangiani gi oru ga hato. Na ararina i pepe i oru na arito manga i ngekê akê, menê kê nunginungi i ruma iaku. Ki parama, ma ki ura me i maaku ta na mane, i tuguni siki, 31ma ki vi, ‘Konelio! God ki bani aganarigi na nunginungiha iamu, ma ki bani girarago, vi go tamanira na enoni, ga matareha. 32Gu hagatorangenia ta na enoni, ke râ i Jopa, ke unia me ta na mane, na atana hagenani ka no Simone Petero. Ngaia ki gâga i pasina o Simone, na mane i maningaigi na gavota na puruka. Na ruma iana ki oga hagarangia na asi.’ 33Tahema inê kê unigo vê ototo râ, ma ki koro era, igo ko arâ me. I na matena ikê igia hato ka oga ikê, ma God ki oga henigia, ma igami kami obania mi rongogi na ani mavê na marâ, na Araha ki obanigo vi go visigi.”

Na ateateha iana o Petero

34O Petero ki haganega ki tamasi, ki vi: “I ngekê inê kê girara, i monari, i maana God na enoni hato ka tagenata ma. 35God ki visia, vi koro na ani mavê na enoni, i magutenia God, ma ki tanugi na marâ, ga koro, naka ma vi ngaia ki Siu, se mareha. 36Igamu kamu bani girara na tamasinga, God ki bani kasia tangara na Isiraelita. Ngaia ki hagagirarara renia na Taroha Koro, i vi, vi na enoni ma God ka hekorokoro renia o Jesu Kirisito, i araha tangara na enoni hato. 37Igamu kamu bani girara na marâ raha, i vora me i Jutea hagenani, ma ki haganega i Galilea, i murina o Joane i ateate renia na batesimo. 38Igamu kamu bani girara o Jesu ni Nasarete, vi manga i he God ki bani vatea ngavê na Higona Apu ma na ramoha. Ngaia ki râ igê na ara ni agua, ma ki tamanira na enoni, ma ki hagakomagara na enoni hato, i erasira Satana, suria God ki tamania. 39Igami kami tarohenigi na ara ni marâ, i bani tanugi i na agua iata na Siu ma i Jerusaleme. Ngaira ka nahuia, ma ka rapusia igê na kuruse. 40Ma God ki hagamêria aporo tenira na enoni, ga me, igê na oruta na tangiana, ma ki katoa, ki vora tangagami. 41Na enoni hato ka pe bâsia, nga noga ma igami, renia God ki bani ategami, kami tarohenia. Matena God ki bani hagamêria tenira na enoni, ga me, igami kami mebêrihu. 42Ma ngaia ki hagatoragami, hanana mi ateate renia na Taroha Koro tangara na enoni, ma kami tarohenia, vi ngaia ki na ani, God i bani kasia me, ki page surira na enoni hato, na ani, ga mauri, ma na ani, ga me. 43Na ara ni poropete ka bani tamasi renia, ka vi, ‘Manga ta na enoni, ma ki tongesuria o Jesu, God ki page bonotenigi na tasi iana renia na raramohana o Jesu.’”

Na Higona Apu ki angarira na enoni ga pe Siu

44Matena i tamasi mênga o Petero, ma na Higona Apu ki angarira na enoni hato, ga karinga na taroha. 45Na Siu, ga tongesuri ma ka râ me i Jopa henia o Petero, ka kone, suria God ki votoa nikâ na Higona Apu tangara na enoni, ga pe Siu. 46Suria ngaira ka rongoa na Higona Apu, i tamasi i harata, ma na enoni, ga pe Siu, ka visia raha na korohana God. O Petero ki tamasi, ki vi: 47“Na Higona Apu ki angarira na enoni ngegê, tagenana manga i bani angarigami igami. I hega? I koro ma vari, vi igami kami hagabarasira, vi siana ke batesimo renia na ve? Mareha!” 48Tahema ngaia ki bonasira ka batesimo igê na raramohana o Jesu Kirisito. Ma hemuri ngaira ka vi tanga, ki oga henira surigi nikâ na tangiani haritamani.

Currently Selected:

TAGARAHA IATA NA APOSOTOLO 10: KCB

Highlight

Copy

Compare