2 TIMOTI 4
4
O Timoti ki tuguhia i tarohenia na tamasinga iana God
1I maana God, ma i maana o Kirisito Jesu, i page surira na enoni hato, na ani ga mauri, ma na ani ga me, ma renia o Kirisito i page arâ me nikâ, hanana i marungira na enoni hato, inê kê bonasigo nga; 2gu ateate renia na Taroha Koro. Go togeaga, ko tarohenia tare, henaka vi na enoni ka obania se mareha. Gu katora na enoni, ke tongesuria. Gu ramonira, ma ku kanukanura, ma ko piringiape ngavê, matena go hagesurira. 3Renia i page arâ me na matena, na enoni ka page usi, vi ve rongoa igê na hagesuringa monari. Ngaira ka page arâ surigi na obaniha iata mareta, ma ka page atera tatage na mane ni hagesuringa tangara mareta, suria ga obania, vi ga rongora, ga hagesurira renigi na tarani, ga râ surigi na obaniha iata mareta. 4Ngaira ka page herehere pusigi na karingata, hanana vi siana ka rongoa na hagesuringa monari, ma ka page karingagi na sihonga purua. 5Ma igo, ki tuguhigo, vigo ototo surigo maremu tare. Go ramoramo, matena i tarahugo na mamasiaganiha. Go tarohenia na Taroha Koro, suria ngaia ki na tagaraha iamu, ma ko katoa bâkoro na tagaraha iamu, suria igo ki na kariana God.
6Ma tangê inê, inê kê meme noga. Inê kê manga na vogasiha. I râ me noga na matena tangê, vi gê magahuru igê. 7Inê kê bani hêmêmesi bâkoro. Inê kê bani hatongia na tangoha iaku hagenani. Inê kê bani oto suria na tongesuriha. 8Ma i ngekê na mena na tangoha iaku ki nanê tangê, na mena na parongaku i koro ma ki oto i maana God. Ma na Araha, i surira oto na enoni, ki page vateê na meku ngekê igê na Tangiana na Suriha Raha, mareha vi tangê ma inê, ma tangara nikâ hete na enoni hato, ga takuia na Araha, ma ka naasia na aporoha me iana.
Na tamasinga iana o Paulo tanga getea o Timoti
9Go uhungia nga, hanana go arâ me rêrê i pasiku. 10O Temasi ki bani paniê, suria ngaia ki takuigi na marâ ni maveta. Ngaia ki bani râ i Tesalonika. O Keresenso ki bani râ i Galasia, mo Tito ki bani râ i Talamasia. 11Nga noga ma o Luka kani oga heniê. Go vi tanga o Mareko, ki arâ me henigo, suria ngaia ki girara i tamaniê igê na tagaraha. 12Inê kê bani hagatorangenia o Tigiko tanga i Epeso. 13Matena go arâ me, go torea me na tuguni iaku, gê bani pania vê i Toroasi i pasina o Karepo. Go toregi me nikâ na buka, ma ngaigi nga ka na buka, ga tagarahigi renigi na gavota na sipi.
14O Alesanta, na mane i tagarahigi na marâ renigi na kapa, ki bani erasiê bâraha. Na Araha ki page vuria na mena na bagaparongana. 15Ma igo nikâ go hinarua nogamu, renia ngaia ki bani urapusia ngavê na tamasinga iaku.
16Matena gê hagenago kê oga igê na tamasinga, mareha ta na enoni, vi ge tamaniê. Ngaira hato ka reteniê. Inê kê nungia God ki bonotenigi na tasi iata. 17Ma na Araha ki tamaniê, ma ki hagaramoniê. Tahema inê kê girara gê tarohenia na taroha hagenani tangara na enoni hato, ga pe Siu, ka rongoa. Ma inê kê tahitahi tenia na harana na laioni. 18Ma na Araha ki page hagatahiê tenigi na eraha hato, ma ki page uniê banu maninga i pasina, suria ngaia ki Araha teha. Ge visia raha tare ma tarema. Monari!
Na hatongina na leta
19Inê kê visia “Mauru Koro” tangarerua ka Pirisila mo Akuila, ma tanga na ahemata iana o Onisipore. 20O Erasito i oga vê i Korinto, ma inê kê pania o Toropimo i Mileto, suria i maeha. 21Go uhungia nga, hanana go bani arâ me, matena i mamênga na rogaroga ahuru.
O Ubulo, mo Putense, mo Lino, ma ka Kolotia ka visia “Mauru Koro.” Ma ngaira hato nikâ na goaka igê na tongesuriha ka kato vikana nogata.
22Inê kê nungia na Araha ki tamanigo.
Ma kê nungia God, ki korokoro tangagamu hato.
Currently Selected:
2 TIMOTI 4: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific