2 TIMOTI 2
2
Na kariana koro o Jesu Kirisito
1Ma igo, o kareku igê na tongesuriha, go ramoramo renia na hetamaniha iana God, igia ka nahunia, matena igia ka obahaku henia o Kirisito Jesu. 2Go taua gatagata na hagesuringa, go bani rongoê, gê ateate renia i maata na enoni rako, ma ko hagatorara na mane renia, na mane go tako togo renira, ma ka girara ga hagesurira na enoni getera nikâ.
3Go meramamasiaga manga na mane koro ni me iana o Kirisito Jesu. 4Na mane ni me ki gagêmaga, suria i obania ma, vi hagakoro obana na araha ni me iana. Manga ngekana, ngaia ki pe takotako renigi na ani mavê na tagaraha iata na enoni. 5Na mane, i tangotango igê na hemêmêsiana, ki asa, vi ge tehateha, manga vi ngaia, ma ki pe arâ surigi manga vi hanana, ma i ngekana ki asa, vi ge nahunia na mena. 6Na mane, i bani tagara bâraha i mu, ki araria, i nahunia na nagona na mu. 7Go takotako renigi na marâ, gê visigi tangago, suria na Araha ki page hagagirarago renigi na marâ hato.
8Takusia o Jesu Kirisito. God ki bani hagamêria aporo tenia na mera. Ngaia ki na raraha iana o Tavite, manga i visia na Taroha Koro, gê ateate renia. 9Suria inê kê ateate renia na Taroha Koro, inê kê hatamia na mamasiaganiha, ma ka rakuê renigi na seni, manga vi inê ka na mane era. Ma ki asa, vi ge rakua na tamasinga iana God renigi na seni. 10Tahema inê kê agana, kê kasikasi manavaku tare renira na kariana God, hanana vi ngaira nikâ ka page nahunia na tahinga, o Kirisito Jesu i vategia henia na vagevageha tare ma tarema.
11I monari na tamasinga, i vi:
“Manga vi igia, ma ka bani meme henia,
igia ka page mauri henia nikâ.
12Manga vi igia, ma ka pe makumakusiga,
igia ka page araha henia.
Manga vi igia, ma ka hagaiga pusigia mareka renia ngaia,
ngaia nikâ ki page hagaiga pusia marena renigia igia.
13Manga vi igia, ma ka hagêguri baranga,
ngaia ki hagêguri togo tare,
suria i asa, vi ge hagaparu.”
O Timoti ki tuguhia, vi tagara maninga
14Go hagatakusira tare na kariamu renia na tarana ngekê, ma ko haganunura nga i maana God, hanana vi siana ka hetuguri renigi na tamasinga. Manga ngekê, ki pe koro, renia i erasira ma na enoni, ga rongogi. 15Go uhungia nga, hanana vi na tagaraha iamu ki hagakoro obana ngavê God. Go tagara manga na enoni tagara, i pe maki renigi na tagaraha iana, ma ko hagesurira ototo na enoni renia na tamasinga iana God renia na monariha. 16Go hinarugi na tamasinga bekabekaga, ga hagatasira na enoni, ma ka okera râ tatage tenia God. 17Na hagesuringa iata ki page manga na garu, i sugasuga. Na hitangita na enoni, ga hagesuri manga ngekana, ngairerua ka no Himeneo mo Pileto. 18Ngairerua karu bani kasia na monariha, ma karu erasia na tongesuriha iata tani na enoni, suria ngairerua karu vi, vi na mêriha aporo iaka ki bani oga. 19God ki bani hagêrasia gatagata na hunana, ma ki asa, vi ge angingi. Ma ka bani segegi so igê na tamasinga igê: “Na Araha ki aitangisira na kariana,” ma, “Na enoni, i vi, vi ngaia ki na kariana na Araha, ki tuguhia, i murisigegi na tasi.”
20I rarona na ruma raha ka oga igê na ataka mavê na marâ, ga ngêngê igê: tani ka tagarahigi renia na siliva ma na golo; ma tani ka tagarahigi renia na apinige ma na mako; tani ka nakagi vê tangagi na tangiani raha, ma tani ka ngêngê igê i na ara ni tangiani. 21Manga vi na enoni, ma ki manuhia marena ki matarotaro tenigi na marâ era ngegana, ngaia ki manga na apira na golo se na siliva, i nanê tare tanga God. Ngaia ki na kariana koro na Araha, ma ki nanê tare tangagi na ara ni tagaraha koro, na Araha i bonasia renigi. 22Go hinarugi na teniha era iata na enoni haoru. Gu uhungia nga, ko ototo i maana God, ma i maata na enoni. Go ama ni tongesuria nga o Kirisito. Ko ama ni takusira nga na enoni getera. Ko haritagi. Ko katokato vikana henira na enoni, ga avarasia maninga na Araha. 23Ma ko hinarugi na tamasinga ga bekabekaga ma ka bonobonoga. Igo ko bani giraragi na tamasinga ngegana, ka katora na enoni, ka hemangari. 24Na kariana na Araha ki tuguhia, siana ki bagamangamangariaga. Ki tuguhia, i korokoro hete tangara na enoni hato, ma ki tuguhia, i voravora re na mane ni hagesuringa, i korokoro ma ki piringiape, 25ma ki haritagi, ki hagaotora na enoni, matena ga rêrapusia. Vari God ki page vatera, ka urisi parongata, hanana ga girara na monariha. 26Manga ngekana, ngaira ka page takotako koro aporo, ma ka page taratara tenia na tu iana Satana, i bani tura, ma ki bani katora, ka tê viteana.
Currently Selected:
2 TIMOTI 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
