2 MAKABEO 7
7
O hegoata gi pi ma kenata ka me renia na rotu
1I ta na matena nikâ ka têra o hegoata gi pi ma kenata. Ngaira ka na Siu. Na maneraha ki haribona, ka ramusira, hanana ga tugurira viga ngaua na bo. 2Na hitangita o hegoata ki tamasi renira, ki hagatea na maneraha, ki vi: “Na ta kanigo obania tenigami? Na ta kanigo obania vigo girara tenigami? Igami kami agana vigami meme teharia vigami kasigi râ na ramata iata na êvarika.”
3Vikana na maneraha ki mangariaga ngavê. Ngaia ki bonasira na me iana, ka tangagini na kuki raha ma na ani sisite, ka karekare ni sivi. 4Ma ngaira ka kato ototo râ nga vikana. Hemuri ngaia ki bonasira na me iana, ka retea râ na meana na mane i tamasi, ka sibia na bêna, ka rete mukugi na bangobango ni rimana ma na vekuru ni êgana, i maata o goana ge ono ma kenata. 5Na mane haoru ngekana ki manava so mênga, henaka i mamanuhi gapuna ma ki mukumukuga. Na maneraha ki bonasira na me iana ka torea râ tanga na gi ma ka kasia i rarona na kuki. Matena na hurahurana ki akê tenia na kuki, o hegoata ma kenata ka henganingani viga togeaga ka meme. 6Ngaira ka vi: “Na Araha ki bâsigia ma ki takigia manga i vi o Moise igê na ki, matena i ramonira na Siu, ga murisigea God, ki vi, ‘Na Araha ki page takira na ani ga têtê viteana.’”
7I murina i me na hitangita o hegoata ngegana, ma ka haganega ka hagatavatava nikâ na ruata na hitangita. Ngaira ka piripiria na bêna ma ka sibia. Hato ma ka hagatea, ka vi: “Hega, go ngaua na bo se mi reterete mukugi tatage na bangobango ni rimamu ma na vekuru ni êgamu?”
8Ngaia ki arami igê na tamasinga iana marena, ki vi: “I mareha ngavê! I asa ve ngêa!” Tahema na mane ni me ka nahu hagatavatava tagenana manga na ani i nago na mane. 9Igê na manavaso ni mera iana, ngaia ki ngere tanga na maneraha, ki vi: “Na eragani nuni kanigo! Henaka go nahuigami kami meme, ma na Araha, i nahunigi na ara ni marâ hato ga oga, ngaia ki page hagamêrigami aporo tenia na mera ma ki page haganahunigami renia na mêriha mora ma tarema, suria igami kami me renigi na ramata iana.”
10Hoi, na mane ni me ka haganega ka nahu hagatavatava na oruta na hitangita o hegoata ngegana. Matena ngaira ka bonasia, i kunai hura na meana, ngaia ki kunai hura ototo râ nga. Ngaia ki pe magu ma ki tagarenigi râ noga na rimana. 11Ngaia ki tamasi ramo, ki vi: “God ki vateê renirerua na rimaku. Inê kê pe tako renirerua, nga noga ma na ramata iana God. Inê kê bani girara, vi God ki page vateê aporo renirerua.” 12Na maneraha ma na karinana ka konetenia ngavê, vi na mane haoru ngekana ki pe magu rârâ ma ki aganaria na mamasiaganiha.
13I murina i me, na mane ni me ka nahu hagatavatava vikana nikâ na heta na hitangita o hegoata ngegana. 14Matena i meme noga, ngaia ki vi: “Inê kê ageage, suria igamu na enoni kamu nahuiê kê me, suria God, i asa vige hagaparu, ki bani suru, vi page hagamêrigami aporo tenia na mera. Ma tangago igo o Antioko, ki asa iamu vigu mêri aporo tanga na mêriha haoru.”
15Na mane ni me ka têa nikâ na rimata na mane haoru ma ka haganega ka nahu hagatavatava. 16Ngaia ki bâ rapurapu renia na maneraha ma ki vi: “Igo ko nahuni ramoha, hanana go katogami igê na anima na tarana go obania, henaka ma igo ko page me nogamu. Ma siana ko takusia, vi God ki rumakaka renigami na kariana. 17Gu oga ma noga. God raramohaga hunia ki page nahunahu hagatavatavagamu igo ma na raraha iamu.”
18Hemuri na mane ni me ka ranguia na onota na hitangita o hegoata ngegana. Matena i meme noga, ngaia ki vi: “Gu takotako bâkoro. Igami kami mamasiaga ararigami, suria mi haritohea God. Tahema ga tarahugami na bagabevoani ngegana. 19Ma siana hagetage ko takusia, vi na hagaitangiha ki page tihigo, suria vigo merongasia God.”
20Kenata ki hagakonekone teha ngavê ma na enoni ki ararira viga takusia tare. Henaka i bâsira o karena gi pi ga me igê nga na tangiana ngekana, ma ngaia ki ramo ma, suria i hagêguritogo renia na Araha. 21I pasina karu oga igê na aitangiha ni gete ma na ramoha ni mane. Ngaia ki kanukanua na ara ni hitangita o karena igê na tamasinga iata mareta. 22Ngaia ki vi: “Inê kê pe girara, vi manga i he kanimu toto i obaku. Mareha vi inê kani ve vategamu na mêriha ma na rogaroga, se vi ve hagatotogamu. 23God hete kani tagarahigamu, God i hagavoragi na ara ni marâ hato, God i hagavorara na enoni ma na ara ni marâ hato ga oga. Ngaia ki hetaki ma ki page vategamu aporo na mêriha ma na rogaroga, suria mu takuigi na ramata iana teharigamu igamu maremi.”
24O Antioko ki takusia ma, vi ngaia na gete ki mehagau ngaia ma ki tamasi erasia ngaia. Tahema ngaia ki uhungia bâraha, vi hagaharoa na kere mane i tahitahi mênga, na hagamata susu iana na gete, hanana vi kasigi râ na tauha iata na êvarina. Ngaia ki pe tamasi tanga ma, ma ki tohe ki suru hete, vi page katoa ki ruruguha ma ki page ageagesia na ogaha iana ma ki page nahunia na ramoha igê na gavumane. 25Ma na kere mane ki pe pasi karinga. Tahema o Antioko ki tamasi tanga kenana na kere mane, vi ngaia ke hagahoroa na aitangihana o karena, hanana vi tahitahi. 26Na gete ki usi, ma suria na maneraha ki tamasi bâraha tanga, tahema ngaia ki agana ki tamasi tanga o karena. 27Ngaia ki maroro râ tanga o karena ma ki hagabekasia na eragani nuni ni hagatavatavaniha ngekana, suria i tamasi igê na tamasinga iaterua mareterua, ki vi: “O kareku, gu takiê. Go girara, igo ko oga i obaku surigi na hageha gi siva. Inê kê hagasusugo surigi na harisi gi oru. Inê kê hagangêgo ma kê marupego ma kê hagesurigo mataro me i ngekê. 28O kareku, inê kê nungigo nga. Gu bâsigi na vavearo, na ano ma na ara ni marâ hato igê. Gu takusia, vi God kani tamasi ma, ma na ara ni marâ hato ka vora me ma na enoni nikâ ka vora me vikana. 29Siana ko magutenia na mane ni hagatavatavaniha ngekana. Gu aganaria na mera, hanana go korokoro mangara o veogamu. Vikana God ki page vateê aporo renigamu igo ma o veogamu igê na tangiana ni hetakiha iana, na tangiana ni mêriha aporo.”
30Matena i tamasi hato vikana kenana, o karena ki tamasi ototo râ nga tanga na maneraha, ki vi: “Maneraha o Antioko, go naasia na ta? Inê kê usitenigi na tamasinga iamu. Inê kê marupegi ma hete na ramata iana God tangara na êvarimami renia o Moise. 31Igo nga kanigo katogi na manitarani ni hagamamasiaganiha tangara na Hebereo. Ma God ki page hagaitangigo. I asa ngavê vigu tahi tenia ngaia. 32I monari, na mamasiaganiha ka tarahugami meni na bagatauhamami. 33Na Araha monari ki mangariaga tangagami ma ki hagaitangigami, hanana i hagesurigami ma ki hagaotogami. Ma ki tanga ma na kere matena abubu. Ngaia ki page korokoro tangagami igami na kariana. 34Ma igo, na eragani nuni go erataga teha ngavê, siana ko hagabekasigo maremu igê na paroparoha iamu, matena go hagamamasiagara na kariana God. 35I asa hagetage, vigu tahi tenia na hagaitangiha i arâ me tangago tenia God raramohaga hunia, i giraragi na ara ni marâ hato. 36O veogaku ka mamasiaga sisite râ ma, ma i ngekê ngaira ka nahunia na mêriha tarema, suria ga totosuria na suruheri iana God. Ma tangago igo, God ki page surigo ma ki page hagaitangigo mena na paroparoha iamu. 37Hoi, inê nogaku, kê tagarenirerua na apeku ma na mêrihaku tangago, suria gê aganaria na mera renigi na ramata iata na êvarimami mangara o veogaku. Inê kê nungia God, ki takira rêrê na kariana ma ki nahunahu hagatavatavago, hanana i tugurigo ko tahetara, vi ngaia getea ma kani God. 38Na mamasiaganiha iamami, inê ma o veogaku, ke hatungia na mangariaganiha iana God raramohaga hunia, i oto tanga vikana.”
39O Antioko ki mangariaga ngavê, suria na tamasinga iana na kere mane ki takea ngavê. Tahema ngaia ki nahu hagatavatava ngavê teharira o veogana. 40Vikana na kere mane ki me. Ngaia ki hagêguritogo ngavê renia na Araha ma na aitangihana ki matarotaro ngavê i maana God.
41Kenata ka nahuia ki me hagemuri tatare.
42I arari râ noga vikana renira na Siu, ga nahu hagatavatavara ma ka tugurira ka ngêgi na ganiani ni vogasiha ni ataro.
Currently Selected:
2 MAKABEO 7: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific