2 MAKABEO 2
2
1Igê na buka igami kami girara, vi o Jeremia na poropete ki bonasira na enoni i nago tarana ga henahuraura vê, ka tavogi râ na gi tenia na bea ni vogasiha, manga mi bani visia. 2Nikâ ngaia ki vatera renigi na ramata iana God ma ki bonasira ka marupegi, hanana vi siana na nunuta na ataro na golo ma na siliva, ga page bâsigi igê na agua ga henahuraura tanga, ka hagabekasira. 3Ngaia ki bonasira, vi siana ka kasigi râ na ramata iana God.
4Na buka ngegana ka vi nikâ, vi God ki angaria o Jeremia, ki haribona, hanana ga torea me na ruma na gahu iana na Araha henia na bokesi na suruheri ma ka migitagere suria igê na hungana, i bani tagere igê o Moise, hanana i bâsia râ na agua ni suruha. 5Matena o Jeremia ki hura akê i ngekana, ngaia ki tarahua igê na vaba. Ngaia ki pinihigi igê na ruma na gahu iana na Araha, na bokesi na suruheri ma na bea ga sungigi igê na marâ i sigini koro. Ma hemuri ki bonopusia na maana na vaba. 6I na murina ngekana tani na kariana o Jeremia ka tagere nogata, hanana viga nakagi na girarani na tara tanga na vaba. Na enoni hato ka konekone ngavê. 7Matena o Jeremia ki rongo vikana, ngaia ki ramonira, ki vi: “Na agua ngekana ki gâga pinihi nga mataro me God ki page hagahakura aporo na kariana ma ki takira. 8Igê na matena ngekana God ki page nakagi hura mave na marâ ngegana ma na bâbâhana raha na Araha ki page vora me igê na vaha manga igê na matena iana o Moise ma igê na matena iana o Solomo, i hagapunaria na ruma ni rotu ma na mararana raha na Araha ki raro igê.”
9Na buka ngegana ka visigi nikâ na tauhana na maneraha o Solomo i tako mataha ngavê, matena i vogasia God renia na vogasiha ni hagapunariana na ruma ni rotu, matena i uhu igê. 10Matena i nunginungi, na gi ki râ me tenia na vavearo ma ki ngêgi na ganiani ni vogasiha, manga i nago matena o Moise i nunginungi. 11Renia na vogasiha ngekana o Moise ki vi: suria ga pe ngaua na vogasiha ni bonoteniha ni tasi, tahema na gi ki ngaua ngaia. 12O Solomo ki hagarahasia na hagapuana na ruma ni rotu surigi na tangiani ge varu.
13Na tarani ngegana ka oga igê na buka ngegana ma igê na segesegeha iana o Nehemia. Ngaigi ka vi nikâ, vi o Nehemia ki rurugi haku na buka renira na maneraha ma na segesegeha iata na poropete ma o Tavite henigi na leta iata na maneraha renigi na votovoto tanga na ruma ni rotu. 14O Juta ki rurugi haku aporo me na buka ga totoko renia na hearihatana. Igami kami nahunigi mêngagi. 15Manga mu obanigi tani, mu hagatorangenia me ta na enoni ki totora.
16Igami kami sege tangagamu, suria i sugia ma vigami hagarahasia na tangiana raha ni hagapuana aporo na ruma ni rotu, ma kami obanigamu vigamu hagarahasia nogami. 17God ki bani hagatahira na kariana hato ma ki vatera aporo na agua na maneraha, na ruma ni rotu henira na mane ni vogasiha ma ni hagarahenga, 18manga i bani surua igê na buka ni ramata iana. Igami kami naasia, vi ngaia ki sugi takigia ma ki hagahakugia tenigi na apaneni hato na maveta tanga na ruma ni rotu apuna iana, suria i bani hagatahigia tenigi na bagabevoani raha ma ki bani hagamatarotaroa na ruma ni rotu.”
Na tamasinga renia na buka i arâ me ngekê
19O Jasone ni Saerini ki segegi na buka gi rima. I raroni ka oga igê na sihonga renigi na tauhata o hegoata o Juta Makabeo, renia na hagamatarotaroana na ruma ni rotu i rongo raha na atana ma renia na hagapuana na bea ni vogasiha igê, 20renigi na hearihatani henirerua o Antioko Epipanesi ma o Upatore o karena, 21ma renigi na marâ ga vora me i vavearo, hanana ga hagaramonira na enoni ga tongesuri ka heariha ramo tanga na rotu iata na Siu henigi na tauha iata. Henaka vi ngaira ka pe rako, ma ngaira ka têa na apanena hagenani ma ka tarigenira hura na mane ni me iata na enoni ahuroto. 22Ngaira ka têa aporo na ruma ni rotu i rongo raha na atana i maveta hagenani, ma ka têa aporo i Jerusaleme tenira na merongata, ki oga purunguni aporo. Ngaira ka hagagatagatanigi aporo na ramata, na merongata ka hagani hagamagahurugi. Ngaira ka girara ga katogi na tarani ngegana, suria na Araha ki takira ma ki koro tangara.
23Na tarani hato ngegana o Jasone ki segegi igê na buka gi rima. Hoi, inê be uhungia be hagatarobêgi igê na buka gi tage ma. 24Suria na taromegani na sihonga ma na sihonga ga rako teha ngavê igê na buka ngegana, inê kê takusia, vi ngaigi ki hagabarasia na enoni vige aitangisigi na tarani ga akê me. 25Tahema inê kê uhungia vigê hagatarobêgi, ki mataku tangara na enoni hato ga tomanigi, tangara na ani ga pasi toma, suria ga vagevagesia na tomaha, ma tangara na ani ga obania viga giraragi i bêta ta na tarana. 26Na segeha ni hagatarobêana ki kere bara. Ngaia ki na tagaraha raha, i suhigo renia na mavaru ma ki asa vigu mauru bore renia. 27Ngaia ki kere bara manga viga hagarêa na ngêra na magotoha, i ararigi na marotaniha iata na enoni hehegitigi. Henaka i kere bara, ma inê kê ageagesia kê aganaria, hanana vi gê hagakoro obata na ani ga tomania. 28Inê kê tihigi na taromegani na sihonga tanga na ani i bani segegi. Inê kê uhungia ma vigê hagatarobêgi na tarani ga akê me. 29Inê kê mareha vi na mane i torea na ruma haoru. Ngaia ki tuguhia i takoha bâraha renigi na kere mani marâ tarome. Inê kê manga na mane i hagabâkoroa na ruma. Ngaia ki takotako bâraha ma renia na ruma vige bâkoro. 30Na enoni i obania vi segegi na tarani ga akê me, ki tuguhia vi aitangisigi maninga, ki haharirigi ma ki hagaterigi na ara ni kere taromegani. 31Na mane i hagatarobêgi ma, ngaia ki oto tanga, vi hagabubugi na sihonga ma ki nakagi vê na taromegani na tarani ga akê me. 32Hoita i hato na tamasinga iaku. Inê be haganega na sihonga iaku. Manga vigê tamasi ki borahu, matena gê hagabubua na sihonga, e, inê kê beka.
Currently Selected:
2 MAKABEO 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific