2 ESETARASE 2
2
1“Inê na Araha, kê vi: Inê kê bêngenira hura tenia i Esipito na kariaku ga vora re kare rakuraku igê. Na ramata iaku inê kê vatera re na kariaku na poropete. Ma ngaira ka usi vige karingara ma ka pe botage renigi na hagesuringa iaku. 2I Jerusaleme, kenata i aparara, ki vi tangara, ki vi: ‘Kareku, mu râ suri parongami maremi. Inê kê nâ. Na ara ni enoni hato ka bani paniê. 3Inê kê vagevagesigamu bâraha, matena gê marupegamu kamu raha, ma igamu kamu haritohea na Araha God, ma kamu katogi na tarani gê girara ga erataga. Tahema inê ki rugu ngavê na obaku ma kê angi maramara renigamu, suria gê tê tara renigamu. 4Na ta kanigê girara vigê katoa tangagamu? Na nâ kani inê ma kê gâga getegeteê. Kareku, mu râ ma kamu avarasia na Araha ke takigamu.’
5“O Esera vaema ni kare, inê kê nungigo, hanana go ranganira na enoni ngegana, manga kenata i bani kato vikana, suria ngaira ka bani usi vige marupea na suruheri iaku. 6Hoi, gu haganumanumara ma ku ruhuruhua kenata, hanana siana ke apara kare. 7Ngaira ka page totoko surigi na apanena iata na enoni ahuroto, ma ki mareha rârâ ta na enoni i maveta vige takusira aporo nikâ, suria ngaira ka ruhia na suruheri iaku.
8“I Asiria, na hagaitangiha ki page nahuigo ngavê, suria go nakara na enoni erataga ka ahi i pasimu. I Asiria erataga, gu takusigi na tarani gê katogi tangarerua na hinua i Sotome ma i Gomora. 9Na puru masuri ma na rahu ka anuirerua. Nga na tarana gê katoa tangara na enoni, ga guguruga tangê ngekana.
10“Inê na Araha, kê vi tangago o Esera, kê vi: Go hagarongora na kariaku haoru, vi inê kê page haganahunira renia i Jerusaleme, gê bani kato vigê haganahunira renia ka marungia. 11Inê ki hato vi ve oga igê na bâbâhana raha ngavê na marara henira na Isiraelita ma be haganahunira hete na kariaku haoru renia na ruma ni rotu i gâga hagahu, gê bani hagarêa tangara na Isiraelita. 12Na vanuhana koro na apinige ni mêriha ki page aruhera na kariaku haoru. Ngaira ka pe tagara rârâ ma ki asa vige meme na apeta. 13Gu nunginungi ma ko page tavotavo. Go nunginungi, hanana ga pe rakorako na tangiani go nanasi surigi. Hoi, na arahanga ki bani oga tangago. Tahema gu nanê. 14Gu tohe renirerua na vavearo ma na ano, vi inê na God mamauri, kê bani hagamagahurua na eraha ma kê bani hagavora na koroha.
15“I Jerusaleme, kenani kare, gu ragera ku topera na karemu. Gu hagaotora igê na tara koro. Gu vagevagesira, matena go marupera ka raharaha, manga na kuvê i marupera na karena ka raharaha. Inênga na Araha kanigê bani atego. 16Inê be hagamêrira aporo na karemu ga bani me tenigi na anoanota, suria ngaira ka na kariaku. 17I Jerusaleme, kenata na enoni ngegana, siana ko magu. Inê nga na Araha kanigê bani atego.
18“Inê be hagatorangenirerua o Isaia ma o Jeremia na kariaku, karu tamanigo. Suria ngairerua karu nungiê, tahema inê kê bani hagapunarigi ma kê bani hagarêgi tangago na apinige tangahuru matarerua, ga rasirasi ngavê renigi na guani hehegitigi. 19Na ve banga tangahuru matarerua, ka gogogo renigi na tavoni na susu ma na pirui, ma na barani gi pi ga gahuigi na mahe, na ani memera ma na ani siki. Inê be katora na karemu ke vagevage ngavê i ngekana.
20“Hoi, i Jerusaleme, gu rohe pusira na gete na nâ, gu pane henira na ani ga mareha o vaemata, gu mahata tangara na ani ga matareha, gu anumasira na kare banogo, gu vatera na gahu na ani i marehasira, 21gu marupera na ani ga pe hagêguritogo ma ka mameaga. Siana ko meramarabe na ani ga tavi. Gu anumasira na ani ga hagêrahu ma ku tamanira na ani ga guru, hanana ga bâsia na bâbâhaku raha igê na aitangihata. 22Gu bâsurira na bani enoni ma na enoni haoru, hanana ga gâga purunguni i raroni na para ni hinua iamu. 23I na ara ni mateni go tarahugi na gahuata na enoni, go bagigi ma ko ririhêni na anoanota. Vikana inê be hagarahasigo, matena gê hagamêrira aporo na enoni ga me.
24“Kariaku, mu piringiape ma. Na matena iami vigamu mamaro igê, ki page arâ me. 25Mu marupera na karemi, manga na gete i bâbâsuri kare maninga tare. Mu hagaotora igê na tara koro, 26hanana siana ki tarupe na hitangita. Igê na matena tanga inê kê page hagategamu re, suria na tagaraha iami ngekana. 27Siana kamu anumanuma. Matena i arâ me na tangiana ni bagabevoani ma ni mamasiaganiha, na enoni getera ka page angiangi ma ka page angiangi maramara, ma tangagamu igamu, igamu kamu page vagevage ma kamu page ruruguha. 28Na enoni i na agua getigi ka page hengarigamu ma ki asa iata vige page hagaerasigamu.
29“I Jerusaleme, inê be anumasigo renia na raramohaku ma be hagatahira na karemu tenia na agua ni hagaitangiha i gâga hagahu. 30Gu vagevage. Mu vagevage, igo ma na karemu, suria inênga na Araha kanigê be hagatahigamu. 31Gu takusira na karemu ga mamaro igê na anoanota. Inê nga na Araha raramohaga huniê, inê kê hetaki ma kê page hagamêrira hura tenigi na agua, ga tâ pinihi igê i rarona na mako. 32Mataro me kê arâ me, go topera na karemu ma ko hagarongora renigi na korohaku ma na hetakiha iaku, ga manga na ve banga, i asa vige page mamata.”
O Esera i hungana i Sinai
33Matena inê o Esera gê oga i hungana i Sinai, na Araha ki bonasiê, kê râ i pasita na Isiraelita. Ma na matena gê râ i pasita, ngaira ka kiteniê ma ka usitenigi na ramata iana na Araha. 34Tahema inê kê tamasi tangagamu, igamu na enoni mu pe Siu, suria igamu kamu agana vigamu karinga ma kamu aitangisia na tamasinga ikê: “Mu nananêa na ani i bâsurigamu manga na mane i bâsurira na sipi iana. Ngaia ki sugi ma vige râ me, igê na hagahatongina, hanana i haganahunigamu renia na mamaroha hagahu. 35Mu nananê, hanana mu aganarigi na korohana na arahanga iana, suria na marara hagahu ki page mavesigamu tare ki bê ki arâ. 36Mu gavagavatenia na mengo i na mateni i ngegê ma kamu aganaria hete na ogaha ni vagevageha bâkoro ngavê, i nanê tangagamu. Inê kê tarohenia na ani i hagatahiê. 37Na Araha ki bani atea, tahema mu aganaria ma kamu vagevage. Mu visia koro God, suria i bani unigamu banu i pasina. 38Mu aharaga ma kamu bâsira na rehagaro na ani ga nahunia na girarana na Araha ma ka mengê. 39Ngaira ka bani gavatenia na mengo i na matena i ngegê ma ka hagesuru renigi na tuguni siki, na Araha i vatera renigi. 40Hoi, i Jerusaleme, gu unira banu na enoni ngegana ga marupegi na ramata iana na Araha. Ngekana ki hagatonganira ka uhuhu na ani God i bani nakara tangago. 41Na kare, go naasira bâraha, ngaira ka bani aporo me. Ngaira ka uhu. Hoita, go nunginungi, hanana na arahanga iana na Araha ke râ me kê gatagata, ma hanana na kariamu ke tê viteana, na kariamu God i bani atera me, matena i mamênga na maveta.”
O Esera i hungana i Sione
42Inê o Esera kê bâsia na bera na enoni i hungana i Sione. Ngaira ka rako teha ngavê. I asa vige tomanira. Ngaira hato ka kiki ma ka hagarahasia na Araha. 43I guputa ki ura igê na mane haoru i borahu teha ngavê, i borahu teharira ngaira hato. Ngaia ki nakagi na tarepuri i raeta na ara ni enoni. Ngaia ki teha akê i guputa ngaira hato. Inê kê kone ma kê bore rapurapu renira. 44Inê kê hagatea na angero, kê vi: “Angero, ti kani igê?”
45Ngaia ki arami, ki vi: “Na enoni, ga bani tasigi râ na tuguni ni mera, ma ka tuguni renigi na tuguni ni mêriha tarema ngegana. Ngaira ka bani hagabângenia, vi ngaira ka tongesuria God ma i ngekê ngaira ka tavogi na tarepuri ma na nini, na girarani, vi ngaira ka teha.”
46Inê kê hagatea nikâ na angero, kê vi: “Ti ka na mane haoru i nakagi na tarepuri i raeta na enoni ma ki vatera re na nini?”
47Na angero ki arami, ki vi: “Ngaia ka no karena God. Ma na enoni hato ngegana ka bani hagabângenia vi ngaira ka tongesuria, matena ga gâga mêngara i maveta.” Hoi, inê kê haganega kê visira raha na ani ga ramo ka ura tanga na Araha. 48Ma na angero ki vi tangê, ki vi: “Gu râ ma ku hagarongora na kariaku renigi na marâ go bani basigi, na manimena hato iana na Araha.”
Currently Selected:
2 ESETARASE 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific