2 KORINTO 9
9
Na hetamaniha tangara na enoni i Jutea ga tongesuri
1Inê kê pe obania, ve hagarako segea tangagamu renia na hetamaniha tangara na kariana God i Jutea. 2Inê kê bani girara, vi igamu kamu agana, hanana vi gamu hetamani; ma inê kê bani kasikasigamu akê tangara na enoni i Masetonia. Inê kê bani visia, vi “Haganega igê na harisi hato na goaka igê na tongesuriha i Agaia ka bani nanê, hanana vi ga hetamani.” Na marumuha iami ki bani katora rako na enoni i pasita, ka amaka surigamu. 3Tahema inê kê hagatorangenira na goaka igê na tongesuriha ngegana, hanana vi siana kami tamasi purua ma, matena mi kasigamu akê igê na tarana ngekê. Ma ki manga gê bani visia ea, vi igamu kamu page nanê, hanana vi gamu hetamani. 4Ma ki manga i mareha, igami kami maki. Manga vi na enoni i Masetonia, ma ka takuê, matena gê vatugigamu, ma ka tarahua, vi igamu kamu pe nanê, e, igami kami maki ngavê, suria igami kami hagêguritogo ngavê renigamu. Inê kê tamasi renia ma na makiha iamami igami, mareha vi na makiha iami igamu! 5Tahema inê kê takusia, vi arariê, vi gê kanukanura na goaka igê na tongesuriha ngegana, ka hagenago taraku i pasimi, ma ka hagarêa na mahatanga, mu bani surua, vi gamu hakua, ma hemuri kê kahu atata vê i pasimi, ma ki hagabângenia, vi igamu kamu mahata, suria na obaniha iami maremi, mareha vi suria gê bonasigamu.
6Mu rongo: na enoni, i hasihasi na harisi pe rako, ki page nahunigi na harisi pe rako. Ma na enoni, i hasihasi na harisi rako, ki page nahunigi na harisi rako. 7Hoi, na ara ni hitangimi ki araria i mahata suria na obaniha iana marena, mareha vi suria ga bonasia, ma siana ki takotako rugu renia, suria God ki takuia na enoni, i ageage renia i mahata. 8Igamu kamu obanigi na marâ, mu mauri renigi, ma God ki vategamu kê nikâ, hanana vi gamu girara mu hetamani, suria igamu kamu nahunigi kê nikâ tare na ara ni marâ. 9Suria na Buka Apuna ki vi,
“Ngaia ki mahata ngavê
tangara na enoni, ga matareha.
Na korohana ki gâga tare ma tare ma.”
10Ma God, i vatera na enoni na marâ, ga hasihasi, ma na ngêra, ga ngaugi, ngaia ki page vategamu kê nikâ na marâ hato, mu obanigi, vi gamu hasihasi, ma ngaia ki page katogi, ka akê, ma ka rakorako na harisi iami, suria mu mahata, manga hanana mu mahata. 11Ngaia ki page katogamu tare, kamu ruruguha, hanana mu girara mu mahata tare. Manga ngekana, na enoni rako ka page visia koro God renigi na mahatanga iami, mi vatera. 12Renia na mahatanga iami ki tamanira na kariana God, ga mamasiaga, ma ki katora nikâ, ka rakorako na enoni, ga visia koro ngavê God. 13Na mahatanga iami ngekê ki hagatanga monari renia na tongesuriha iami, ma na enoni rako ka page visia raha God, renia igamu kamu tongesuria na Taroha Koro iana o Kirisito, ma kamu râ suria, renia mu mahata, matena mu tamanira na enoni hato getera. 14Ngekana ngaira ka page takuigamu bâraha, ma ka page nunginungi tangagamu, renia God ki koro ngavê tangagamu. 15Ka visia koro God renia na korohana, i raha teha nga vê.
Currently Selected:
2 KORINTO 9: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
