2 KORINTO 7
7
1Goaku hetakui igê na tongesuriha, na marâ hato ngegana God ki surugi tangagia. Tahema i ararigia, vi ga tananigia mareka tenigi na ara ni marâ, ga katogi na apeka ma na ataroka, ka pe matarotaro. Ma ki tuguhigia, vi ga uhungia maninga, ka korokoro ma ka ototo nga i maana God, ma ka hanetasia.
Na vagevageha iana o Paulo
2Mu takuigami i mêrihami. Igami kami pe tanua rârâ ta na marâ, hanana vi ge pe oto tanga ta na enoni. Igami kami pe erasia rârâ ta na enoni. Igami kami pe hagaturia ta na enoni. 3Inê kê vi vikê, ma ki mareha be vi, vi ve surigamu be hagaitangigamu. Suria inê kê bani visia i nago, vi igami kami takuigamu ngavê. Tahema igia ka gâga haku tare, matena ga mauri, ma matena ga meme. 4Inê kê hagêguri togo ngavê renigamu. Inê kê ageage ngavê renigamu. Henaka viga tarahuê na ani mavê na mamasiaganiha, menê kê hahêaga ngavê. Inê kê vagevage ngavê. 5Nikâ, matena mi ata i Masetonia, ki mareha rârâ, vi na mamaroha tangagami. Na mamasiaganiha ka râ me tenigi na ara ni agua: na hemangariana ma na maguha igê na aitangihamami. 6Ma God, i hagaramonira na enoni, i pe gatagata na takoha iata, ngaia ki hagaramonigami, suria i ata me o Tito. 7Mareha suria ma vi ngaia i râ me, ma suria nikâ hete i hagarongogami renigamu, vi gamu hagaramonia, ma kamu obania bâraha, vi gamu bâsiê, ma renigamu, vi rugu bâraha na obami, ma kamu nanê, hanana vi gamu ramoramo pusiê. Tahema i ngekê inê kê vagevage ngavê teharia i nago.
8Henaka vi na leta iaku tangagamu ki hagarugu obami, ma inê ki mareha vi ve tangahuriê, suria vi gê segea. Inê kê tangahuriê vari, matena gê girara, vi na leta iaku ki hagarugu obami, henaka vi suria na kere matena abubu ma. 9Ma i ngekê inê kê vagevage, mareha suria vi gê hagarugu obami, ma suria hete igamu kamu urisi parongami, renia i rugu na obami. I rugu na obami suria na obaniha iana God. Tahema igami kami pe erasigamu. 10Suria manga vi ta na enoni, ma ki rugurugu na obana suria na obaniha iana God, ngaia ki urisi parongana, hanana i tahitahi. Ma ki asa ta na enoni, vi ge tangahuria. Ma ki manga vi ta na enoni, ma ki rugurugu na obana, mareha vi suria na obaniha iana God, ngaia ki tarahua na mera. 11Mu bâsigi na marâ, ga voravora me, renia i rugurugu na obami suria na obaniha iana God. I ngekê igamu kamu nahunia na takotako koro; mu agana ngavê, hanana vi gamu hagaotogamu maremi; mu mangariaga tanga na eraha, i oga i pasimi; mu magu; mu naasiê; mu hagaotogi rêrê nga na marâ, ga pe oto; ma kamu hagaitangia ototo râ nga na mane, i gâga sutaga. Renigi na tarani ngegana ka hagatanga monari renigamu, vi igamu kamu matarotaro ngavê.
12I ngekana ki monari, inê kê segea na leta ngekana, mareha vi suria vi na enoni ki oga sutaga; nikâ mareha vi suria na enoni ki hatamia na marâ, i pe oto tanga. Ma kê sege hete, hanana vi gê hagagiraragamu, i maana God, vi igamu kamu takuigami ngavê. 13Tahema igami kami nganganihaga.
Mareha vi suria igamu kamu hagaramonigami, ma o Tito nikâ ki hagakoro obamami bâraha, suria ngaia ki vagevage, suria igamu hato kamu tamania, hanana i nganganihaga. 14Inê kê hagarongoa, vi inê kê ageage renigamu, ma kê pe raruni era renigamu. Igami kami tamasia tare na monariha tangagamu. Nikâ na ageageha iamami renigamu, mi hagarongoa renia o Tito, ki monari, ma ki tonga hunana. 15Tahema na takuiha iana tangagamu ki ama ni raharaha nga, matena i takusigamu aporo, mu tê viteana bâkoro, mu manatangenia, mu magutenia, ma kamu hagahigasia. 16Inê kê vagevage bâraha, suria inê kê girara, gê hagêguri togo ngavê renigamu.
Currently Selected:
2 KORINTO 7: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
