2 KORINTO 4

Tarohenia nga na monariha

1God, i takuigia, ki bani kasigami tanga na tagaraha ngekê. Tahema i asa iamami, vi gami rumakaka. 2Igami kami nakagi vê na ara ni marâ hato, na enoni ga pinihigi, suria ga era, se ga maki renigi. Igami kami pe hagaparu, ma nikâ igami kami pe topea râ tagua renia na tamasinga iana God. Igami kami tarohenia na monariha hagenani, ma i maana God igami kami uhungia, vi gami tagarenigami maremami tangara na enoni hato, ga agana ka karinga. 3Suria i manga vi na taroha koro, mi ateate renia, ma ki pinihi, ngaia ki pinihi tenira ma na enoni, ga pe tahi. 4Ngaira ka pe tongesuria, suria na ataro era i maveta ikê ki bani rotosigi na aitangihata. Ngaia ki ura pusira, ka pe rigia na marara, i takirira. Na marara ngekê ki râ me tenia na Taroha Koro renia na raramohana o Kirisito. Ngaia ki na nununa monari nga God. 5Renia igami kami pe ateate renigami maremami, ma kami ateate renia hete o Jesu Kirisito, i Araha, ma renigami maremami, vi igami ki na kariami, hanana mi hagarahasia o Jesu. 6God, i vi, “Tenia na roto hono na marara ki page mave!”, ngaia ki na God, i mavesigi na obaka, hanana viga mataha na obaka renia na giraraha renia na raramohana God, i togatoga i maana o Kirisito.

7Igami kami manga na pi na hê; ma igami kami nahunia na ruruguha raha igê, hanana i vagavaga mave me, vi God ki raramohaga teha, mareha vi igami. 8Hagarako na merongamami ka rumugigami, ma ki asa, vi gami amenamena. Tani na matena igami kami takotako tugupu, ma ki asa, vi gami rumakaka. 9Na merongamami ka rako, ma na tamamami ka tamanigami tare. Ma ki he naka, viga hitahita porotagenigami, ma igami kami tahitahi ma. 10Igami kami migirâ tare na mera iana o Jesu igê na apemami, ga girara ga meme, hanana i voravora mave me nikâ na mêriha aporo iana igê na apemami. 11Surigi na mêrihamami hagenani igami kami hatamia na mera, hanana mi hagarahasia o Jesu, hanana i voravora me mave na mêriha iana igê na apemami, ga girara ga meme. 12Tahema na mera ki tagara i pasimami, ma na mauriha ki tagara i pasimi.

13Na Buka Apuna ki vi, “Inê kê tamasi, suria inê kê tongesuri.” Igami kami nahunia na tongesuriha, i tage tora ma. Tahema igami nikâ kami tamasi, suria igami kami tongesuri. 14Renia igami kami bani girara, vi God, i bani hagamêria aporo na Araha o Jesu, ngaia ki page hagamêrigami aporo nogamami henia o Jesu, ma ki page toregia, igamu ma igami, i pasina. 15Na tarani hato ngegana ka tamanigamu. Ma na matena na korohana God ki tarêhira rako nga na enoni, ngaira ka page ama ni visia koro nga ma ka visia raha nga tare God.

Na tongesuriha ki hagaramonigia

16Tahema ki asa, vi gami rumakaka. Henaka ga ama ni soso tare nga na apemami, ma na mêriha igê na ataromami ki ama ni ramoramo tare nga igê na ara ni tangiani. 17Ma na kere mamasiaganiha ngegê, ga tarahugami igê na mêrihamami i maveta, ka page vategami na ramoha raha teha, i gâga tare, ma ki raha teharigi ngavê na mamasiaganiha. 18Renia igami kami pe takusigi na marâ, ga girara ga bâsigi, ma kami takusigi ma hete na marâ, ga pe girara, vi ge bâsigi. Na marâ, ga girara ga bâsigi, ka page hatohato; ma na marâ, ga pe girara, vi ge bâsigi, ki asa, vi ge page hato.

Currently Selected:

2 KORINTO 4: KCB

Highlight

Copy

Compare