1 PETERO 5
5
Na hakuta iana God
1Hoi, inê kê obania be visia ta na marâ tangagamu, na maneraha igê na rotu. Inê nogaku kê maneraha. Inê kê bâsigi na mamasiaganiha iana o Kirisito, ma kê page nahunia na arahanga henia o Kirisito igê na matena, i page arâ me nikâ igê. Inê kê vi tangagamu: 2mu marupera na hakuta na enoni, God ki hagatoragamu renira, ma kamu agana, kamu bâbâsurira, manga vi God ki obanigamu, ma siana ki meme na apemi. Mu tanua na tagaraha iami, mareha vi suria ga vategamu na vurimi ma suria hete igamu maremi kamu obania maninga, vi gamu hetamani. 3Siana kamu ramonira na kariami, ma ki koro, kamu hagabângenigi na parongami koro tangara na hakuta na kariana God. 4Manga vi na Araha raha teha, i marupera na kariana God, ma ki arâ me, ngaia ki page hagamahegamu renia na tarepuri, suria igamu kamu teha. Ma na tarepuri ki asa, vi ge page hato na togatogana.
5I tagenana ma igamu na mane haoru, i koro, kamu têtê viteata na meraha. Siana kamu ragaraga maneraha hurigamu maremi, ma ki tuguhigamu hete, mu hetamaniheri. Suria na Buka Apuna ki vi,
“God ki urapusira na enoni, ga paroparo,
ma ki tamanira na enoni, ga haritagi.”
6Mu nakagamu so maremi, ma kamu rongoa na tamasinga iana God raramohaga hunia, hanana ngaia ki page ragegamu akê igê na matena, i obania igê. 7Mu nakagi vê na ara ni anumanumaha iami tanga God, renia ngaia ki marupegamu.
8Mu bâsigamu, ma kamu bâbâ! Renia Satana, na merongami, ki arârâ manga na laione, i mangariaga, i bâbâ rârâ, vi ngaua ta na enoni. 9Mu nganganihaga igê na tongesuriha iami, ma kamu rêrapusia Satana, suria mu girara, vi i maveta hagenani na tamami, ga tongesuria o Kirisito, ka hatamia nogata na mamasiaganiha manga igamu. 10God koro hunia ki unigamu noga tanga na arahanga tarema iana henia o Kirisito. Ma i na matena mu hatamia hato igê na mamasiaganiha suria na kere matena abubu, ngaia ki page hagakorogamu aporo, ma ki page vategamu na ramoha, kamu ramoramo, ma kamu rêra gatagata. 11Ngaia ki araha tare ma tarema! Monari.
Na hatongina na leta
12O Silevano ki tamaniê, kê segea na kere leta abubu ngekê. Ngaia ki na goaka igê na tongesuriha, gê girara gê hagêguri togo renia. Inê kê obania gê nganinganigamu, ma be hagarongogamu, renia vi ikê ki na hetakuiha monari iana God. Mu rêra gatagata igê.
13Na goami kirisitiano i Babilone ka hagamauru koro tangagamu. God ki bani atera nikâ. O Mareko, o kareku igê na tongesuriha, ki hagamauru koro tangagamu nogana. 14Mu hetakuiheri ma kamu hesigini igê na hetakuiha heri kirisitiano.
Na marapeha ke hagarêsigamu hato, igamu na kariana o Kirisito.
Currently Selected:
1 PETERO 5: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific