1 MAKABEO 2
2
O Matatia ki totosuria God
1I na matena ngekana o Matatia ki aharaga tenia i Jerusaleme ma ki râ ki oga i Moteini. Ngaia ki na mane ni vogasiha tenia na hagosi ninuni iana o Joiaribi. O vaemana ka no Joane mo virana ka no Simeone. 2O Matatia ki aparara o karena gi rima: o Joane ga hêtana nikâ vi o Gati, 3o Simone ga hêtana nikâ vi o Tasi, 4o Juta ga hêtana nikâ vi o Makabeo, 5o Eleasare ga hêtana nikâ vi o Avarane, mo Jonatane ga hêtana nikâ vi o Apuse.
6Matena o Matatia ki bâsigi na eraha ma na tasi ga akê me i Jutea ma i Jerusaleme, 7ngaia ki vi:
“Gê gahanita ma kanigê vora me
kê bâsigi na tarani erataga ngegana?
Ngaira ka tê erasira ngavê na kariaku
ma ka hagaerasia ngavê na hinua apuna.
I hega, i tuguhiê vari vigê gâga purua vikê
ma ki bara tangê vi ve katoa rârâ ta na marâ,
matena na merongaka ka ogasia na hinua tenigia
ma na ai mahuara ka rêa na ruma ni rotu?
8Na ruma ni rotu ki manga na ataka mavê na mane.
9Ga bani rurugugi na apira ma na kâkâ ni hagarahanega.
Ka bani mutera na kareka igê na tara i hinua.
Na merongaka ka bani ahurara na mane na gapu haoru iaka.
10Na ai mahuara suria na maveta hagenani
ka parênia na hinua ma ka rurugu tenia.
11Na ara ni mahe hato ka bani hasuigi râ.
I ngekê ngaia ki na kare rakuraku, i mareha vige asitatara.
12Bâsia, na ruma ni rotu ga ageagesia,
i nago ki bâkoro ngavê ma i ngekê ki mareha.
Na ahuroto ka hagaerasia ngavê.
13Igia ka mauri mênga tanga na ta?”
14O Matatia mo karena ki rugu ngavê na obata. Ngaira ka tarisigi na tuguni iata, ka hagesuru kakaga ma ka ama ni angiangi maramara nga.
15Ma hemuri na kariana na maneraha ga tugurira na enoni ka murisigea God, ngaira ka ata i hinua i Moteini, hanana ga tugurira na enoni igê ka vogasira na ataro. 16Na Isiraelita rako ka hakurira ma o Matatia mo karena ka ura tarege râ. 17Tahema na kariana na maneraha ka vi tanga o Matatia, ka vi: “Igo ka na mane ga hagahigasigo na enoni i hinua ikê. O karemu ma na goamu ka pane henigo ma ka tamanigo. 18Igo ki ararigo vigu hagenago ku râ suria na bonasiha iana na maneraha. Na enoni hato ga pe Siu, na ai ni Jutea ma na enoni hato ga hita i Jerusaleme ka bani kato vikana. Gu kato vikana nogamu! Manga ngekana igo mo karemu kamu page voravora re na tamana koro na maneraha. Ngaia ki page kasigamu akê ma ki page vategamu na siliva, na golo ma na mahatanga rako.”
19O Matatia ki arami raha, ki vi: “Henaka vi na enoni hato ga pe Siu surigi na agua hato i marungigi na maneraha ka têtê viteana ma ka râ suria na bonasiha iana ka kasia râ na rotu iata na êvarita, hoi, ma igami ki asa ngavê. 20O kareku, ma na goaku menê kami ama ni taua gatagata nga na suruheri iana God henira na êvarimami. 21God ki tamanigami, hanana siana kami kasia na buka ni ramata iana se vigami aharê igê na ramata iana. 22Igami ki asa vigami aganaria na bonasiha iana na maneraha, ma kami usi hagetage, vigami urusia ta na marâ igê na rotu iamami, henaka vi na kere marâ sisite ngavê.”
23Matena o Matatia ki kahu tamasi hato, ma ta na Siu ni Moteini ki akê i maata na enoni hato, hanana vi vogasia na ataro igê na bea ni vogasiha i ngekana suria na bonasiha iana na maneraha. 24Matena o Matatia ki bâsia vikana, ngaia ki mangariaga ngavê ma ki hagahurasia na mangariaganiha iana. Ngaia ki tagira na apena ma ki gaha râ ki rete nguria na mane igê nga na bea ni vogasiha. 25Ngaia ki mutea nikâ na kariana na maneraha i tugurira na enoni ka vogasia na ataro ma ki hogea na bea ni vogasiha. 26O Matatia ki hagabângenia igê na tarana ngekana, vi ngaia ki hagahigasigi ngavê na ramata iana God. Vikana ngaia ki manga o Pinegasi i nahuia ki me o Simiri karena o Salumu.
Na hearihatana ma na nahuta ni nuni igê na tangiana ni mamaroha
27Hemuri o Matatia ki ngere ki râhia na hinua, ki vi: “Ti na enoni i totosuria na suruheri iana God ma ki marupegi na ramata iana, ge takuê!” 28Matena i tamasi hato, ngaia mo karena ka gava tangagi na hungani ma ka panigi so na nahuninga hato iata.
29-30Igê nikâ na matena ngekana na Isiraelita rako ga obania viga hagakoro obana God ma ka marupegi na ramata iana, ngaira ka aharaga ma ka râ ka oga igê na bagamasusu raha, suria na hagamamasiaganiha raha ki tarahura. Ngaira ka merarâ na kareta, na gete iata ma na togoha iata. 31Na rongoha ki tarahura na kariana na maneraha ma na mane ni me iana ga oga igê na ruma ni para nganganihaga i Jerusaleme, vi tani na enoni ka haritohea na bonasiha iana na maneraha ma ka râ ka ahi igê na bagamasusu raha. 32Na mane ni me gahu ka râ surira ma ka tarahura, ka tênga i avorata ma ka nanê viga taharira igê na tangiana ni mamaroha. 33Ngaira ka ngirira na Siu, ka vi: “Mu hato vikana, ki arari noga! Mu ura mave me! Mu tê viteana na maneraha, i era ma kami mutegamu.”
34Ngaira ka arami, ka vi: “I asa vigami hura mave vê! I asa vigami tê viteana na maneraha. I asa vigami aharêngia na tangiana ni mamaroha.”
35Na mane ni me ka taharira ototo rânga. 36Na Siu ka nakara mavê. Ngaira ka pe arihate rârâ na hê se vige hagapusigi na maani na vaba ga ahiahi igê. 37Ngaira ka vi ma: “Igami kami nanê ma vigami meme, suria na aitangihamami ka matarotaro i maana God. God ma na enoni ka girara, vi i pe oto tangagamu vigamu kamu mutegami.” 38Ngekana na merongata ka taharira igê na tangiana ni mamaroha ma ka mutera na mane henira na gete iata ma na kareta ma na togoha iata. Na rehagaro na enoni kaniga me.
39Matena o Matatia ma na kariana ka rongo vikana, ngaira ka angi maramara. 40Ngaira ka hetamatamasi so mareta, ka vi: “Manga vi igia hato ma ka katokato mangara na goaku na Siu ngegana ma ka usi vige meraheariha bê aporo na ani ga pe Siu, hanana viga roherohe pusigia mareka ma pusia na rotu iaka, manga ngekana ngaira ka page hagamagahurugia ngavê tenia na maveta.” 41Igê nga na tangiana ngekana ngaira ka kato viga roherohe pusira mareta, manga vi na merongata ma ka taharira igê na tangiana ni mamaroha, hanana siana ngaira hato ka meme mangara na goata na Siu ga bani me igê na vaba.
42Igê na matena ngekana na haku na Siu ga rotu bâkoro ma ka henahu pusia na agua iata, ngaira ka hakunira o Matatia ma na tamana. Na Siu ngegana ka na Isiraelita ga ramo ngavê ma ki asa vige magu. Ngaira ka bani nakara mareta, hanana viga roherohe pusigi na ramata igê na buka apuna. 43Ma nikâ na ara ni enoni hato ga gavatenia na hagamamasiaganiha ka hakunira ma ka hagarakonira. 44Ngaira ka vora na ruruha raha na mane ni me. Ngaira ka hagahurasigi na mangariaganiha iata, ka taharira na Siu ga bani kasia na rotu. Na ani ga tahi, ka gava ka ruku i pasita na enoni ga pe Siu. 45O Matatia ma na kariana ka râhia i Isiraele hagenani, ka hogegi na bea ni vogasiha ni ataro, 46ma ka retegi na gavoni na varata na ara ni kere mane ga tarahura, henaka ga pe obania. 47Ngaira ka tarigenira vê na mane ahuroto, ga paroparo ma ka obania viga hagamagahurugi na ramata iana God. O Matatia ma na kariana ka akê me bâkoro. 48Ngaira ka hagatahigi na ramata iana o Moise tenia na raramohata na enoni ahuroto ma tenira na gavumane iata, ma ka katoa ki mameaga na raramohana o Antioko na maneraha erataga.
I me o Matatia
49Matena o Matatia ki girara so, vi ngaia ki sugi meme, ngaia ki vi tangara o karena, ki vi: “Igia ka oga igê na mateni ni perenganiha ma ni anumanumaha. Na enoni ga paroparo ka akê me ma ka hagavora na mangariaganiha raha. 50Ma igamu o kareku, ki tuguhigamu, vigamu marupegi maninga na ramata iana o Moise ma kamu aganaria na mera, hanana mu roherohe pusia na suruheri iana God henira na êvarika. 51Mu takusigi na tauhata na êvarika igê na matena iata hehegitigi. Ngaira ka akê me bâkoro igê na tagaraha raha. Mu amaka surira. Vikana ki page akê me na apanena iami ma ki page rongo raha tare na atami.
52Mu takusia o Abarahamo. Ngaia ki hagêguritogo renia na Araha i uhungia. Na Araha ki obakoro tanga. Ngaia ki totosuria na Araha. Tahema God ki aganaria vi ngaia ka na mane koro.
53Mu takusia o Josepo. Igê na mamasiaganiha iana ngaia ki ama ni tê viteana nga God. Tahema ngaia ki vora re na maneraha i Esipito.
54Mu takusia na êvarika o Pinegasi. Ngaia ki tagara bâraha tanga na rotu. Tahema God ki surua tanga vi na raraha iana ka mane ni vogasiha tare.
55Mu takusia o Josua. Ngaia ki vora re na mane ni hagaotonga i Isiraele, suria i râ suria na bonasiha iana o Moise.
56Mu takusia o Kalebe. Ngaia ki aporo me henia na morana na rongoha tanga na hakuta na Isiraelita. Tahema ngaia ki nahunia ta apanena na agua.
57Mu takusia o Tavite. Ngaia ki vora re na maneraha. God ki surua tanga, vi na raraha iana ka maneraha tare, suria ngaia ki totosuria tare God.
58Mu takusia o Elia. Ngaia ki hagahigasigi ngavê na ramata. Tahema God ki torea akê i pasina.
59Mu takusira o Ganania, o Asaria ma o Misaele. God ki hagatahira tenia na gi, suria ngaira ka hagêguritogo renia God.
60Mu takusia o Taniele. Ngaia ki matarotaro tare i maana God. Tahema na Araha ki hagatahia tenigi na harata na laione.
61Mu amaka suria na ara ni hitangita na êvarika ngegana ma kamu kahu tahetara, vi na enoni i hagêguritogo renia na Araha, ngaia ki ama ni togeaga nga. 62Siana kamu magutenira na enoni erataga, ga hagamakukugamu. Ngaira ka page meme. Na bâkorohata ka page kakaga ma ka mamaga igê na maniae. 63I ngekê ngaira ka maneraha, ma i gomaha ngaira ka page magahuru. Na apeta ka page vora aporo re na mako ma na harikatoha iata ka page hatohato râ. 64Ma igamu o kareku, mu rêra gatagata ma kamu ramoramo, hanana mu roherohe pusigi na ramata iana o Moise. Vikana igamu kamu page nahunia na memi i raha teha ngavê.
65O goami o Simone ngaia ki na mane i takotako mataha. Tahema mu têtê viteana tare. Mu naka ki manga o vaemami urusiê inê. 66O Juta Makabeo ki na mane ni me ramo, haganega tenia i sisite. Ngaia ki page bêngenigamu igê na hearihatani pusira na merongami. 67Mu unira haku me ngaira hato ga marupegi na ramata iana God, ka hakunigamu. Ngekana igamu kamu girara mu naka na siva tangara na merongaka ga erasira na Siu. 68Mu hagaitangira na enoni ahuroto surigi na bagatauhata tangagia. Ma kamu taugi gatagata nga igamu na ramata iana God.”
69Hato vikana ma o Matatia ki nungia God hanana vi korokoro tangara o karena ma ki kahu me. 70Ngaira ka bagia igê na matahu iata i Moteini. Na Isiraelita hato ka angi maramara renia. Na tarana ngekana ki akê me igê na harisi 146.
Currently Selected:
1 MAKABEO 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific