1 MAKABEO 13
13
O Simone ki bêngenira na Siu urusia o Jonatane
1O Simone ki rongo, vi o Tiripone ki bani hagahakura na mane ni me gahu, hanana vi taharia i Jutea ma ki ruhuruhua. 2Ngaia ki bâsia, vi na rongoha ki hagamagusira na enoni. 3Ngaia ki kanukanura, ki vi: “Igamu kamu bani girara, vi igami o vaemaku ma na ruma iana ma igami o hegoata kami tagara ramo tangagi na ramata iana o Moise ma na ruma ni rotu. Nikâ, igamu kamu bani giraragi na hearihatani ma na bagabevoani ga tarahugami. 4Igami o hegoata, inê ma kanigê tahi ma ngaira hato ka me igê na henahuita pusigi na ramata ma na ruma ni rotu iaka ma pusira na Isiraelita hato. 5Siana hagetage kamu takusia, vi inê kê meêtanu mareku igê na mateni na bagabevoani, suria gê takusia, vi inê kê koro teharira ngaira. Mareha ngavê! 6Inê kê meraheariha hete na merongaka ga kitenigia, pusira na Isiraelita, pusia na ruma ni rotu ma pusira na gete iami ma na karemi.”
7Matena na enoni ka rongoa na tamasinga ngekana, ngaira ka gatagata aporo, 8ma ka ngere raha, ka vi: “I ngekê igo ko bêngenigami nga urusirerua o Juta mo Jonatane na goamu 9tange na hearihatani ga tarahugia. Na anima na marâ go vi tangagami renia, ngaia noga.”
10Ngekana o Simone ki hagahakura na mane ni me hato. Ngaia ki hagasusu ki hatungigi rêrê na para ni hinua i Jerusaleme ma ki hagagatagatanigi kê nikâ na bebetehe rihia. 11Ngaia ki hagatorangenia o Jonatane karena o Abasalome tanga i Jopa henira na mane ni me gahu. O Jonatane ki paira hura na enoni igê ma ki ogasia ngaia.
O Simone ki uhungia vi hagatahia o Jonatane o vesina
12O Tiripone ki râ me tenia i Potolemaisi henira na mane ni me gahu, hanana i taharia i Jutea. Ngaia ki merâ me o Jonatane o vesina o Simone, i bani hagatotongoa i nago. 13O Simone ki tênga i Atita i na akerena na bena. 14Matena o Tiripone ki rongo, vi o Simone ki urusia o Jonatane o vesina ma ki nanê vi meheariha, ngaia ki kasi tamasinga tanga, ki vi: 15“Inê kê têa o Jonatane o vesimu, suria ngaia ki pe vurigi na takesi tanga na maneraha, matena i gâga mênga igê na tagaraha iana. 16Henaka, ma inê be naka vê ke râ, manga vi igo ma ko vuriê renigi na 3000 na kilo na siliva ma ko hagatorangenirerua na vererua tani o karemu tangê, hanana gê taurerua, i era ma ki merongasigami i murina mi naka vê ki arâ.”
17Henaka o Simone ki girara vi ngaira ka hagabekasia, ma ngaia ki haribona ka toregi me na siliva henirerua o karena o Jonatane, i era ma na Siu ka mangariaga tanga. 18Ngaia ki kato vikana, i era ma i hemuri na enoni ka vivi vi na merongata ka nahuia ki me o Jonatane, suria o Simone ki usi vige hagatorangenigi na siliva henirerua o karena gi rua o Jonatane ngegana. 19Ngekana ngaia ki aganaria na tamasinga iana o Tiripone ma o Tiripone ki pe hagamonaria na suruha iana, suria i pe naka vê o Jonatane ke râ.
I me o Jonatane
20Hemuri o Tiripone ki râ ki taharia i Jutea, hanana i ruhuruhua. Ngaia ki arigu suria na tara i Atora. Ma o Simone ma na mane ni me iana ka raravoro pusia igê na ara ni teha vi i arâ igê. 21Na mane ni me i ruma na para nganganihaga i Jerusaleme ka ama ni hagatorangenira nga na mane tora tamasinga tanga o Tiripone, ka nungia vi arâ me rêrê tangara suria na tara igê na bagamasusu raha, hanana i kasikasi na ngêra tangara. 22O Tiripone ki hagarêra na mane ni me igê na hosi, hanana ga arâ i ngekana. Ma suria igê na bungiana ngekana ki na bagaroga raha, ma ki hagêrahusia vige tagere igê na hungani. Tahema ngaia ki aporo ki râ tanga i Gileata. 23Matena i hagarangia i Basakama, ngaia ki nahuia ki me o Jonatane ma ki bagia i ngekana. 24Hemuri o Tiripone ki aporo i pasina.
25O Simone ki bonasira tani na me iana, hanana ga râ ka torea me na gahuana o Jonatane o vesina tanga i pasita ngaira i Moteini ma ka bagia i ngekana. 26Na Isiraelita hato ka angi maramara, suria i me o Jonatane. Na angiha maramara ki râ surigi na tangiani rako. 27Igê na matahuta o vaemana ma o goana o Simone ki tagarahia igê na giraraha i akê ngavê, ga atea râ. Ngaia ki tagarahia renigi na hê ga mamao na apaneniheri. 28Ngaia ki tagarahigi na ruma na matahu gi pi: na anita o vaemana, kenana ma o goana ge he ka maaheri. 29Ngaia ki hagêrasigi na u rihigi na ruma na matahu ngegana. Na u ga borahu ma ka bâkoro, suria ga tahe nununi igê na marâ ni hearihatana ma na haka. Ngaigi ki ura hesurisuri hetorariga. Ngaia ki tahegi vikana, hanana viga hagatakusira tare ki bê ki arâ na enoni renigi na tauhata na Makabeo. Na enoni na agua getigi ka girara ga arâ me ka bâsigi. 30Na matahuta, o Simone i tagarahia i Moteini, ngaia ki gâga mênga i ngekê.
O Simone ma na ruata o Temeterio karu hekorokoro aporo
31Hoi, o Tiripone ki nahuia ki me na maneraha haoru na onota o Antioko, 32ma ki ura akê marena ki maneraha i Siria urusia. Ngaia ki katogi rako na bagabevoani i ngekana.
33O Simone ki tagarahigi aporo na hinua na para nganganihaga i Jutea. Ngaia ki hagagatagatanigi renigi na bebetehe ga akê ngavê. Na para ka upupuga ma ka tonga na maani para henigi na raburuni. Ngaia ki rurugi igê na ngêra. 34Ngaia ki hagatorangenira tani na mane tora tamasinga tanga na ruata o Temeterio na maneraha, ki nungia, hanana vi naka hura i Jutea tenia na takesi, suria o Tiripone ki hanago ma tenira. 35Na maneraha o Temeterio ki agana ma ki sege bê aporo, ki vi:
36“Inê na maneraha o Temeterio, inê kê hagamauru koro tangago o Simone na mane ni vogasiha i teha ma ko tamata koro na maneraha, ma tangagamu na Siu hato ma na meraha iami. 37Garu bani tarahugami na golo na tarepuri ma na golo na ahana na nini, go kasirerua me. Igami kami nanê ma vigami katoa na suruheri ni marapeha henigamu, ma kami bonasira na mane tora takesi ka nakagamu hura tenia na takesi. 38Igami kami hagagatagatanigi akê nikâ na bani suruheri henigamu. Na hinua na para nganganihaga, mu bani tagarahigi, ka gâga vê tangagamu. 39Igami kami nakagamu vê tenigi na aharêngiani na suruheri mu bani katogi me mataro me i ngekê. Igamu kamu hura nikâ tenigi na harisi mu pe takesi surigi ma tenigi na ani getigi na takesi, ga tavogi i Jerusaleme mataro me i ngekê. 40Na anima na mane, i takusia vi i araria i hakunira na mane ni me ga anumasigami, ngaia ki girara ma. Hoi, ge oga igê na marapeha.”
41Hoi, igê na harisi 170 na hagamamasiaganiha iata na merongata ki hato tenira na Siu. 42Na enoni ka haganega ka naka so na tangiana igê na pepa na suruheri ma igê na ani getigi na pepa vigana, ka sege vikê: “Igê na harisi hagenago iana o Simone, na mane ni vogasiha i teha, na araha iata na mane ni me ma na Siu hato.”
O Simone ki taharia i Gesere
43Igê na matena ngekana o Simone henira na mane ni me iana ki taharia i Gesere ma ki ogarihia. Ngaia ki tagarahia na bea ni tahariha i guruguru ki arâ. Ngaia ki gurua râ tanga na para ni hinua, ki tahakurua na bebetehe igê ma ki henahuraua. 44Na mane ni me igê na bea ni tahariha ngekana ka asipage ka banu i rarona na hinua. Vikana na enoni i hinua ka tugupu ngavê. 45Na mane i hinua henira na gete iata ma na kareta ka tagere igê na para ni hinua, ka tarisigi na tuguni iata, suria ga bubununuga. Ngaira ka tamasi raha ka nungia o Simone renia na marapeha, ka vi: 46“Siana ko hagaitangigami ararigi na bagatauhamami. Gu takigami hete!” 47O Simone ki aganarira ma ki naka vê na hearihatana. Ngaia ki paira hura tenia na hinua, ki hagamatarotarogi na ruma, ga oga igê na nunuta na harasita na ai ni hinua. Hato vikana, ma ngaia ma na mane ni me iana ka banu i hinua, matena ga ki ka hagarahasia na Araha ma ka visia koro. 48Na ara ni marâ, ga pe râ surigi na ramata igê na rotu, ngaia ki hatungigi. Ngaia ki nakara i ngekana na enoni, ga marupegi maninga na ara ni ramata hato iana o Moise. Ngaia ki hagagatagatania kê nikâ na hinua. Ma tanga so ngaia marena ngaia ki torea na ruma igê.
O Simone ki têa na ruma na para nganganihaga i Jerusaleme
49Na mane ni me igê na ruma na para nganganihaga i Jerusaleme ki bara tangara, vige hura ke vuri se vige hagavuri. Tahema ngaira ka magê ngavê ma ka rako na hitangita ga bani mesi magêha. 50Ki rârâ ma ngaira ka nungia o Simone renia na marapeha. Ngaia ki agana ma ki paira hura tenia na ruma na para nganganihaga ma ki hagamatarotaroa tenigi na ara ni marâ ni ataro.
51Igê na tangahuruta gi rua matare oru na tangiana igê na ruata na hageha igê na harisi 171 na Siu ka banu igê na ruma na para nganganihaga. Ngaira ka ngerengere vagevage, ka karingenigi na ahani na nini ma ka kiki ka hagarahasia God ma ka visia koro, suria ga teharira na merongata ma ka bani paira hura tenia i Isiraele. 52O Simone ki naka na ramata tangara na Siu, viga hagarahasia na tangiana ngekana igê na ara ni harisi. Ngaia ki hagagatagatania akê nikâ na ruma na para nganganihaga igê na ruma ni rotu i na apanena bêrâ tanga na ruma na para nganganihaga i teha akê. O Simone ma na me iana ka râ ka ogasia. 53O Simone ki bâsia o Joane o karena i bani vora re na enoni raha. Tahema ngaia ki atea ki bêngenira na mane ni me hato. O Joane ki râ ki ogasia i Gesere.
Currently Selected:
1 MAKABEO 13: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific