1 JOANE 3

Ngaira na karena God

1Bâ, God Vaemana ki takuigia teha ngavê! God ki takuigia bâraha! Tahema ngaia ki visigia, vi na karena. Ma ki monari, igia ki na karena. Tahema na maveta ki pe giraragia, renia ngaia ki pe girara God nikâ. 2Goaku hetakui, igia ki na karena God, ma igia ka mamênga ge girara, vi igia ka page bâ manga i he. Ma igia ka girara na tarana ikê: bevoana o Kirisito ki page arâ me, igia ka page bâbâ manga ngaia, renia igia ka page bâsia, manga hanana i bâ o Kirisito. 3Na ara ni enoni, i tongesuria, vi God ki page katoa na tarana ngekana, ngaia ki mareha vi ge tasi, manga o Kirisito, i mareha ge tasi.

Na karena God ka mareha ge tasi

4Na enoni, i tasitasi, ngaia ki aharê igê na ramata iana God, renia na tasi ki na aharêngiana na ramata. 5Igamu kamu girara, o Kirisito ki bani râ me, hanana i hagamagahurugi na tasi iata na enoni, ma ngaia marena ki mareha vige tasi. Mareha vê! 6Manga ngekana, na ara ni enoni, ga obahaku henia o Kirisito, ngaira ka mareha ge tasi. Ma ki manga vi ta na enoni, ma ki ama ni tasitasi nga, ngaia ki mareha vige bâgirara, ma ki pe aitangisia.

7Kariaku hetakui, mu bâsigamu, hanana siana na enoni ka hagaparugamu! Na enoni, i paronga koro ma ki ototo, ngaia nga ka na enoni, i koro manga o Kirisito. 8Na enoni, ma ki ama tasitasi nga ngaia ki na kariana Satana, suria Satana ki tasi, i bani haganega me tenia na haganegana. Tahema o Karena God ki bani râ me noga, hanana i erasigi hagetage ngavê na tagaraniha iana Satana.

9Na karena God kani mareha vi ge tasitasi tare, suria na mêriha iana God ki oga i pasina. Ma renia ngaia ki na karena God, tahema ki asa iana, vi ge arâ tasi tare. 10Na karena God ma na karena Satana ka tara hegitigi monari. Na enoni, ma ki mareha vi ge paronga koro, se vi ge oto, ma ki mareha vi ge takuia na tamana, ngaia ki mareha vi na karena God.

Na karena God ka hetakuiheri

11Igamu kamu bani rongoa na tamasinga ikê, matena mu têa moramora igê na tongesuriha: i tuguhigia, vi ga hetakuiheri. 12Siana igia ka paronga manga o Kaini. Ngaia ki na kariana Satana, ma ki nahuia ki me o vesina. Ngaia ki nahuia suria na ta? Suria ngaia ki bagaparongana tare, ma o vesina hete kani paronga koro tare.

13Hoita, goaku igê na tongesuriha, siana kamu konekone, matena na enoni era i maveta ga merongasigamu. 14Igia ka bani girara, vi igia ka bani aharê tenia na mera tanga na mêriha. Igia ka girara, suria igia ka takuira na tamaka. Na enoni, i pe takuira na tamana, ngaia ki gâga mênga igê na mera. 15Na enoni, i merongasia na tamana, ngaia ki vora renia na manero. Megamu kamu bani girara, vi na manero ki pe nahunia na mêriha mora ma tarema i pasina. 16Igia ka aitangisia na hetakuiha, renia o Kirisito ki agana, ki me urusika. Tahema ki tuguhigia, viga agana, ka meme urusira na tamaka. 17Manga ta na enoni, ma ki ruruguha, ma ki girara, vi na tamana ki matareha, ma ngaia ki pe takuia na tamana, tanu hega kani girara vi ngaia ki takuia God? 18Kariaku hetakui, siana igia ka hetakuia igê na tamasinga iaka ma, se vi ga tamasi ma renia na hetakuiha. Ga hetakuiheri maninga, monari igê na tauhaka.

Na karena God kaniga pe magu i maana God

19Surigi na tarani ngegana igia ka girara, vi igia ka na kariana na God monari. Surigi na tarani ngegana igia ka hagêguri togo renia God. 20Matena na aitangihaka ka visigia vi igia ka pe koro igia ka girara, vi God ki teharigi na aitangihaka, ma ki giraragi na ara ni marâ hato. 21Tahema, goaku hetakui, manga vi na aitangihaka ma ka visigia vikana, igia ka pe magu i maana God. 22Ngaia ki vategia na anima na marâ, igia ga nungigi tenia, renia igia ka marupegi na ramata iana, ma ka paronga suria na obaniha iana. 23Na ramata iana God ngaia kani ikê: ka tongesuria o Jesu Kirisito, o Karena, ma ka hetakuiheri suria na ramata iana. 24Na enoni, i marupegi na ramata iana God, ngaia ki oga igê na obahahaku henia God, ma God ki oga igê na obahahaku henia nogana. Ma ki manga i he igia ka girara, vi God ki oga igê na obahahaku henigia? Igia ka girara, suria ngaia ki bani vategia na Higona Apu.

Currently Selected:

1 JOANE 3: KCB

Highlight

Copy

Compare