1 KORINTO 7

Na hagatenga renia na êragiha

1Hoi, ge bâsigi na marâ, mu bani sege renigi.

I koro tanga na mane, manga vi pe auragi. 2Ma suria i raha na gamogamoha, tahema i koro teha, vi na ara ni mane ki nahunia na gete iana marena, ma na ara ni gete ki nahunia na mane iana marena. 3Na mane ki tuguhia i mahatangenia na tarana, i oto tanga na gete iana. Ma na gete ki tuguhia i mahatangenia na tarana i oto tanga na mane iana hanana ngairerua heri karu takotako vê. 4Na gete ki pe nahunia marena na apena, ma na mane hete. I tagenana ma na mane, ki pe nahunia marena na apena, ma na gete hete. 5Siana igamu na enoni êragi kamu manimanigamu heri tenia na mêruha haku. Manga mu katokato vikana, hagenago kamu agana heri, ma kamu uhungia suria na kere matena, hanana mu takusia noga na nunginungiha igê na kere matena ngekana. Ma hemuri kamu kahu gâga aporo mangara na enoni êragi, hanana siana Satana ki hagatasigamu, manga mu pe girara, mu hagaotogamu maremi.

6Na marâ inê kê visigi tangagamu, inê kê pe bonasigamu renigi, ma igamu maremi. 7Ma tangê inê, manga mu hagateê, inê mareku kê obania, vi na enoni hato ka gâga manga inê. Ma na ara ni enoni ki nahunia getea na votovoto God i bani vatea renia. Tani na enoni ki nahunia na ani ngekê na votovoto, ma tani ki nahunia na ani getea râ na votovoto.

8Hoi, tangara na enoni, ga pe êragi, ma tangara na gete, ga nâ, inê kê vi vikê: Inê kê takusia, vi i koro tangagamu, mu gâga getegamu nga manga inê. 9Ma ki manga i bara tangagamu, vi gamu gatagata pusigi na teniha, ua, ki ararigamu ma, vigamu auragi, suria na êragiha ki koro teharigi na teniha, ga erasigamu.

10Tangara na enoni êragi be visia ta na ramata. Na ramata ngekê ki mareha vi teniê inê mareku. Ngaia ki na ramata i râ me hete tenia na Araha. Ngaia ki manga ikê: siana na gete êragi ki kasia na mane iana. 11Manga i katokato vikana ki tuguhia, i gâga getea nga, se manga i mareha, ngaia ki tuguhia, i hekorokoro aporo henia na mane iana. Ma na mane siana ki kasia na gete iana.

12Tangara na ani getera na enoni inê kê vi vikê, inê mareku, mareha vi na Araha: manga na mane, i tongesuri, ma ki bani torea na gete, i pe tongesuri, ma na gete ki agana, hanana vi gâga nga henia, siana na mane ki kasia. 13Ma ki manga na gete, i tongesuri, ma ki bani êragia na mane, i pe tongesuri, ma na mane ki agana, hanana vi gâga nga henia, siana na gete ki kasia. 14Renia na mane, i pe tongesuri, ki koro i maana God, suria ngaia ki oga haku henia na gete, i tongesuri. Ma na gete, i pe tongesuri, ki koro i maana God, suria ngaia ki oga haku nga henia na mane, i tongesuri. Manga i pe manga ngekana, na kareterua ka page ahuroto. Ma na kareterua ngaira ka koro hete i maana God. 15Hoi, manga vi na hitangiterua i pe tongesuri, ma ki obania, vi kasia na tamana, i tongesuri, i koro ma. Igê na tarana ngekê na tamana, i tongesuri, na mane se na gete, ngaia ki asitatara, renia God ki obanigamu, vi gamu marape heri. 16Hoi, igo na gete, go tongesuri, manga i he kanigo girara nga, vi igo ko page hagatahia na mane iamu, i pe tongesuria o Kirisito? Se vi igo na mane, go tongesuri, manga i he kanigo girara nga, vi igo ko page hagatahia na gete iamu, i pe tongesuri?

Mu mauri suria na obaniha iana God tangagamu

17Na ara ni enoni, i tongesuri, ki tuguhia, i ama ni mauri nga suria na obaniha iana na Araha tanga, ma ki arâ nga suria na tagaraha, i nahunia, matena God i atea moramora, ki tongesuri. Inê kê bonasira na ara ni haku na enoni, ga tongesuri, renia na tarana ngekê. 18Manga vi na mane, ga bani retea râ na gavona na varana, ma ki taua na tongesuriha, matena God i atea, siana ki uhungia, vi hagamagahurugi na oreni na agua, ga retegi. Manga vi na mane, ga pe retea râ na gavona na varana, ma ki taua na tongesuriha, matena God i atea, siana ki nungia na reteha. 19Suria na reteha, se na pe reteha, ki na marâ purua ma. Ma na marâ i raha hete, ngaia ki manga ikê: i tuguhigia, ga marupegi na ramata iana God. 20Na ara ni enoni ki tuguhia, i gâga nga manga bani hanana, matena i taua moramora igê na tongesuriha, bevoana God i atea. 21Manga vi igo ki na kare vurivuri, matena God i atego, henaka i manga ngekana, siana ko takotako renia. Ma ki manga igo, ma ko girara, vi go vora re na enoni aharupa, gu katoa. 22Renia na kare vurivuri, na Araha i bani atea, ngaia ki na kariana aharupa na Araha. I tagenana ma na enoni aharupa, o Kirisito i bani atea, ngaia ki na kare vurivuri iana. 23God ki bani vurigamu renia na mena raha. Tahema siana kamu voravora re vi na kare vurivuri iata na enoni. 24Goaku igê na tongesuriha, na ara ni enoni, i tongesuri, ki tuguhia, i gâga nga igê na obahahaku henia God manga bani hanana, matena God i atea moramora igê.

Na hagatenga renira na enoni ga pe êragi ma na gete ga nâ

25Hoi, na Araha ki pe vateê na ramata tangara na enoni, ga pe êragi. Ma na takotako iaku mareku ma, kani ikê. Ma suria na Araha ki takuiê, mu girara, mu hagêguritogo reniê.

26Matena gê bâsigi na mamasiaganiha i na matena i ngekê, inê kê takusia, vi na enoni ki araria, i gâga manga bani hanana. 27Manga vi igo, ma ko nahunia na gete, siana ko uhungia, vi go kasia. Manga vi igo, ma ko pe êragi, siana ko uhungia, vi go torea na gete. 28Ma ki manga vi igo, ma ko auragi, igo ki mareha vi gu tasi. Ma ki manga vi na gete, i tatara, ma ki auragi, ngaia ki mareha vige tasi. Inê kê obania ma, vi gê rêra pusigi tenigamu na mamasiaganiha, ga tarahura na enoni ngegana i na ara ni tangiana.

29Goaku igê na tongesuriha, na marâ, gê visia, ki manga ikê: i abubu noga na matena. Haganega tenia i ngekê, na mane êragi ki ararira, ga mauri mangara ga mauri mangara vi ga pe êragi. 30Na ani, ga angiangi, manga vi ga pe angiangi. Na ani, ga vagevage, manga vi ga pe vagevage. Na ani, ga vurivuri, manga vi ga pe nahunigi na marâ, ga bani vurigi. 31Na ani, ga aruma renigi na marâ ni maveta, manga vi ga pe aruma tare renigi, suria na maveta, na ani i ngekê, ki sugi magahuru.

32Inê kê pe obanigamu, vi gamu takotako bâraha renigi tani na marâ. Na mane tatara ki naka marena igê na tagaraha tanga na Araha, suria ngaia ki uhungia, vi hagakoro obana na Araha. 33Ma na mane êragi ki naka marena igê na marâ ni maveta, suria ngaia ki obania, vi hagakoro obana na gete iana. 34Manga ngekana ngaia ki têtê ruarua. Na gete, i pe êragi, se i tatara, ki naka marena igê na tagaraha tanga ma na Araha, renia ngaia ki obania, vi tototo suria na Araha renia na apena ma na atarona nikâ. Ma na gete êragi ngaia ki naka marena igê na marâ ni maveta, suria ngaia ki obania, vi hagakoro obana na mane iana.

35Inê kê vi vikê, suria gê obania, gê tamanigamu. Inê kê pe uhungia, hanana vi ve ramatenigamu. Inê kê obanigamu hete, vi gamu tanugi na marâ, ga oto ma ka koro, ma kamu nakagamu maremi ngavê igê na tagaraha tanga ma na Araha. Siana kamu têtê ruarua.

36Manga vi na arua garu heobani, ma karu atea, vi garu pe auragi, karu hega? Manga vi na mane, ma ki pe êragia, ma ki takusia, vi na tauhana ngekana ki pe koro tanga na gete taura; manga na teniha iana, ma ka gatagata tanga, ma ki takusia, vi i koro ma, vigaru auragi, hoi, i tuguhirerua, vigaru auragi, manga i obania. Na tarana ngekana ki mareha vi na tasi. 37Ma ki manga vi na mane, ngaia marena, ma ki bani takusia gatagata, vi pe auragi; ma ki manga vi ngaia marena, mareha vi ta na enoni, se vi ta na marâ, vi ge tuguria, ma ki bani takusia, ki uhu, hoi, ngaia ki kato koro, manga vi pe auragia na gete taura. 38Vikana na mane, i auragia na kere gete, i bani atengenia, ngaia ki katoa na tarana koro; ma ki manga i pe êragia, ngaia ki katoa na tarana i koro teha.

39Na gete êragi ki pe asitatara, matena na mane iana ki tahitahi mênga. Manga vi na mane iana, ma ki me, ngaia ki kahu asitatara, hanana i auragia na mane, ngaia marena i obania, ma ki araria, vi na mane kirisitiano, renia i tuguhia, vi arâ suria na obaniha iana na Araha. 40Ngaia ki babarisi ngavê, manga vi ngaia ma ki gâga getea. Na takotako iaku ngekê ma kê takusia, vi na Higona Apu iana God kani angariê nikâ.

Currently Selected:

1 KORINTO 7: KCB

Highlight

Copy

Compare