1 KORINTO 3

Na kariana God

1Goaku igê na tongesuriha, i monari, inê kê pe tamasi tangamu, manga gê tamasi tangara na enoni, i angarira na Higona Apu. Tahema inê kê bani tamasi tangagamu, manga vi igamu ka na enoni, mu pe ramo igê na tongesuriha, suria igê na tongesuriha kirisitiano igamu kamu mangara na kere kare. 2Tahema inê kê hagatonomigamu renia na susu, mareha vi renia na ngêra apeni, suria i mamênga ge ararigamu, vigamu ngaugi na ngêra apeni, ma ki henaka i ngekê, igamu kamu pe araria mênga, 3suria mu paronga mênga mangara na enoni, ga pe tongesuri. Mu hengari ma kamu hekorekore. Na tarani ngegana ka hagatanga monari renia na ta? Ga hagatanga monari renigamu, vi igamu ka na enoni mu pe tongesuri, ma kamu paronga surigi na tauhata na enoni, ga pe tongesuri. 4Tani na hitangimi ka vi, “Inê kê panepane henia o Paulo.” Ma tani ka vi, “Inê kê panepane henia o Apolo.” I hega? Mu takusia vari, vi igamu kamu pe kato mangara na enoni, ga pe tongesuri?

5A, o ti ka no Apolo? Mo ti ka no Paulo? Igamirua tagenamirua ka na kariana God. Igamirua kamuru tamanigamu, kamu tongesuria o Kirisito. Na ara ni hitangimirua ki tanua na tagaraha, na Araha i hagatora renia. 6Inê kê hasihasi, mo Apolo ki vavavo, ma God ngaia ki katoa, ki akê bâkoro. 7Na ani, i hasihasi, ma na ani, i vavavo, siana kamu takusirerua ngairerua. Mu takusia hete God suria ngaia kani katoa ki akê. 8Na ani, i hasihasi, ma na ani, i vavavo, ngairerua karu tagenaterua ma. God ki page vuria na ara ni hitangiterua suria na tagaraha, i tanua. 9Suria igamirua kamuru tagara haku tanga God, ma igamu kamu manga na mu iana God.

Ma nikâ igamu ki na ruma iana God. 10Ma inê kê manga na mane, i girara bâkoro, i torea na ruma. Suria na giraraha, God i bani vateê renia, inê kê bani naka na angisiruma, ma ta na mane getea ki tagara hagahatungia na ruma. Ma na ara ni hitangika ki tuguhia, vi girara maninga, hanana i tagarahia. 11Renia God ki bani naka na ani gi tage togo ma na angisiruma, ma ki asa hagetage, vi ge urusia renia na ani getea. Ma na angisiruma, God i bani naka ngekana, ngaia ka no Jesu Kirisito. 12Ma igê na angisiruma ngekana tani na enoni ka torea na ruma igê renigi na golo, se na siliva, se renigi na hê ahe; ma tani renigi na apinige, se na ao, se na huru. 13Igê na tangiana, o Kirisito i page surira igê na enoni, ki page vagavaga me mave, vi i koro, se i pe koro na tagaraha iana na ara ni enoni. Renia na gi igê na tangiana ngekana ki page hagabângenigi na tagaraha iata na ara ni enoni. Na gi ki page uhungigi, hanana i hagabângenigi, vi ga koro, se ga pe koro. 14Manga vi na marâ, na mane i torea igê na angisiruma, ma ki pe makaka igê na gi, ngaia ki page nahunia na mena. 15Ma ki manga i makaka, ngaia ki asa vige page ravahia ta na marâ. Ma ki page tahitahi ngaia marena, manga vi ngaia, ma ki gavagavatenia na gi.

16Igamu kamu bani girara, vi igamu ka na ruma ni rotu iana God, ma na Higona Apu iana God ki gâga i pasimi. 17Tahema, manga vi ta na enoni, ma ki erasia na ruma ni rotu iana God, God ki page erasia nogana na enoni akana. Renia na ruma ni rotu iana God ki na ruma apuna, ma igamu maremi ki na ruma ni rotu iana.

18Siana kamu hagabekasigamu maremi! Manga vi ta na hitangimi, ma ki takusia, vi ngaia ki na enoni, i tako mataha i maata na enoni i maveta, ki tuguhia, vi voravora bekabeka, hanana i voravora renia na enoni, i takotako mataha maninga. 19Suria na marâ, na enoni i maveta ka takusia, vi na takoha mataha, ngaia ki na marâ bekabekaga ma i maana God. Renia na Buka Apuna ki vi,

“God ki paririgi bê aporo

na tamasinga iata na enoni,

ga tako mataha.”

20Ma na Buka Apuna ki vi nikâ,

“Na Araha ki girara,

vi na takoha iata na enoni,

ga tako mataha,

ngaia ki na takoha purua ma.”

21Manga ngekana, siana ta na enoni ki paroparo renigi na marâ, na enoni ga giraragi. Renia na ara ni marâ ki na animi. 22O Paulo, o Apolo, o Petero, na maveta ikê, na mauriha ma na mera, na matena i ngekê ma na matena i hemuri me, ngaira hato ka na animi. 23Ma igamu, o Kirisito ki nahunigamu, ma God ki nahunia o Kirisito.

Currently Selected:

1 KORINTO 3: KCB

Highlight

Copy

Compare