Salmos 88
88
Tasorentsi, ¿paita pojocantaquenari?
1Novincatsarite Tasorentsi, oavisaacotanari,
nocantani quitaiteripeequi aisati tsiteniripeequi naventimpi, pamitacotena.
2¡Pinquemero noquenquetsatacaimpiri,
pimpenaro nocoacotimpiri!
3Oshequi opomerentsitimotaquena, irotaintsi noncame,
4noncaratanteariri camayetaintsiri, te noshintsitanajeji;
5Yojoqueetaquena itimayetinta camincaripee;
noquempetacari camaintsiri imanata, aisati itijeetiri.
Noquempetacari peainchari, caari pojocaacoventi, aisati pipeacotanaqueri.
6Pojocaquena omoroqui jatatsiri tsompoinaqui tsitenishaatsiri.
7Piquisasanotaquena catsini, poashinoncaaquena
oquempetaca poaquena tsompoijaqui otavoncaarequi.
8Pishinetaqueri yora notsipavintsataniri yojocanaquena,
te iramavetacojeitajena.
Noquempetacari yominqueetiri caravosoqui,
caari matacha irishiaje.
9Irointi niraapinitaca, maviteajatanaquena.
¡Maaroni quitaiteripeequi naventimpi aisati novanquiro naco!
10¿Ariompa pimataquero pinijaayeteri camaintsiri caari ineapiniyeeti?
¿Ariompa irimatajero camaintsiri impasonquitempi?
11¿Ariompa inquenquetsatacotajero queariotatsiri aisati pinintanti
anta itijacanta camayetaintsiri?
12Anta otsitenitasanotinta, aitaque maaroni ipeacoyeetarori;
¿timatsimpa iotacotajerone picameetsati
aisati pantayetiri caari ineapiniyeeti?
13Iro cantaincha, Novincatsarite, naventimpi,
ariorica oquitaiteamani noquenquetsatacaimpi.
14Notasorentsite, ¿paita pojocantanari?
¿Paita pimanapitsatantanari?
15Ainiroquera nevancaritapaini, nashinoncaapinitaca,
irovetaincha noncameme.
Iro cantaincha namavetaquero covencayevetachari pitiancacoventaquenari,
meeca te nomatajero.
16Oshequi piquisasanotaca avishimotaquena covencatatsiri,
anaacotanaquena;
17picantani poashinoncaasanotaquena maaroni quitaiteripeequi,
oquempetacaro ovoncanaca nija anaanaquena.
18Pishinetaquena yojocanaquena noshanincapee aisati notsipavintsataniri,
irointi meeca notsipataca tsitenishaari.
Currently Selected:
Salmos 88: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
