Salmos 69
69
Yaventacari Tasorentsi opomerentsitimotacari
(Ivampoyeane David)
1Notasorentsite, poavisaacotena,
oquempetimotaquena irotaintsi nontsitiye.
2Irotaintsi oniyena sampovatsa, tecatsi naatiqueri,
aisati nareetacaro osaanajarequi nija,
aanaquena oshintsijare.
3Macotapaaquena sametsatanaquena nocajemapinitaque
catsitapaaquena notsanoqui;
aisati catsijaquitapaaquena noquiqui,
noyeacovetaquempi pamitacotena.
4Oshequi catsini quisajeitaquenari,
yanaacotiro oshequiti noishipee;
tecatsi nante iquisashitaquena, icoashitaca iroyena.
Icantapinitashitaquena noimpiajeneri caari nocoshiyevetari.
5Notasorentsite, piotaquena te aneeroji niotantari;
te nomateroji nomanapitsatempiro
caari cameetsatatsi nantayetiri.
6Novincatsarite Tasorentsi, mayetirori maaroni,
eiro pishinetiritsi shiretasanotimpiri oashiretacayeari caari cameetsatatsi nantaqueri.
Aviro, Itasorentsite Israel, intacantaquenaniri,
eiro pishinetiritsi aventasanojeitimpiri impashiventacaitenaro nantaqueri.
7Avirotaque namavetimentaqueri itseencanayeetaquena,
oshequi yoashiventayeetaquena.
8Yora noshanincapee iquempetacantaquena
pashinisati noni, caari ineapiniti.
9Nonintasanotaquero Pivanco, notsaneacotacaro,
irotaque icoantacari iroyena.
Iquisaquena yora cantimataquempiri avirori.
10Ariorica niraa aisati notita,
oshequi yantavintsanataquena.
11Ariorica ineana noquitsaataro maatsarantsi noashiretantari, ishirontimentajeitana.
12Yora atiripee icantimatana iquenayeti yovaayetiniri itsipapee,
aisati shinquijeitachari ipampoyeacoventana itseenquimatantanari.
13Iro cantaincha, Notasorentsite, naventimpi,
pamitacotena meeca; tempa pinintasanotana,
picavintsaasanotana, poavisaacotena.
14Eiro pishinetanatsi anayena sampovatsa
aisati nontsitiye nijaqui sanajari;
poavisaacotena oshequi quisajeitaquenari.
15¡Eiro pishinetanatsi aanaquena oshintsijare!
¡Eiro pishinetanatsi oimitsitiyena ovishoiricaare, oamaanacari!
16¡Notasorentsite, pamitacotena;
tempa Picameetsati, pinintasanotanti!
Picavintsantasanoti catsini,
pinquenqueshireacotena narori.
17¡Eiro pojocanatsi; tempa narotaque quemisantimpiri!
¡Pamitacotena intsipaite,
oshequi omapocaquena covencatatsiri!
18Pimpocashitena, poavisaacotena.
¡Pojocaacoventena quisajeitaquenari!
19Piotaquero icantimataquena yoashiventaaquena,
te impincatsatena;
aisati piotaqueri jaanica quisajeitaquenari.
20Oshequi ocantimonentasanotaquena icantimataquena.
¡Te nonquimoshiretajeji aisati te noshintsitaje!
Natsipetashitaca nocoayevetaca veshireacayenane, quenqueshireacotenaneri.
21Iconoaquenaro oanarontsiqui piantatsiri,
aisati nomirevetaca, irointi ipaquena ovaja cachojari.
22Ariorica irampatojeitempa iroajeitanteari iraacameetsatavacantajeiteari,
Poashiniyeneri iroashinoncavacanteari irisati.
23Pinquitapoajatacaajeiteri, eiro yamenantajatsi;
aisati incanteani impioncajeite ivoripeequi,
eiro ishintsitantajatsi.
24Pinquisasanojeiteri, pintsoncajeiteri maaroni,
oquempeta morecatsiri paamari.
25Oncaaraitetanaqueta inampini,
tecatsi savicajeitantajearone ivancopeeni.
26Yoijanataqueri yora poashinoncacantaqueri
aisati ishirontimentajeitacari yora piquemaatsicatacaacari.
27Poimpiyeneri caari cameetsatatsi yantaqueri;
eiro ineirotsi pimpeacoteneri.
28Pimpeajero ivajiro sanquenarentsiqui oaneantatsiri;
eiro pisanquenatacotiritsi incarajeitanteariri cameetsajeitatsiri.
29Naintiquea, Notasorentsite,
oshequi nomantsiataque aisati opomerentsitimotaquena,
pintecatsitajena, poavisaacotajena.
30Nompampoyeacoteri pampoyeantsiqui Tasorentsi; tempa icameetsati,
aisati noncantacoteri: Icameetsati, nompasonquiteri.
31Irotaque ineacameetsatasanotiri,
anaacotiri virantsipee nontaaveteanariri.
32Irineaquerorica oca, yora yoashinoncayeetiri inquimoshiretanaque;
aisati inquimoshirejeitanaje aventajeitimpiri irishitsishireajeitanaje.
33Tempa iquemisantiri Tasorentsi coiteaveetatsiri ariorica yaventari.
Te irojoqueriji yashijeitajari yoiminqueeyetiri caravosoqui.
34Maaroni timayetatsiri inquitequi, quipatsiqui aisati incajarequi,
pincantacoteri Tasorentsi: Icameetsati.
35-36Iroavisaacoteri Tasorentsi savicajeitatsiri nampitsiqui Sión,
irovetsicajeitajero nampitsipee iipatsitequi ishanincapeeni Judá.
Irotaque irisavicantajeari quemisantajeitiriri.
Aisati iraajeitajero irishanincajeitajeari
quipatsi icashiacaaqueriri.
Currently Selected:
Salmos 69: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
