Salmos 42
42
Ashiretasanoteari Tasorentsi.
1Iquempeta maniro miretatsiri icoayetiro nija,
Notasorentsite, aitaque noquempetari narori nocoasanotimpi.
2Nocoasanotiri Tasorentsi, aneasanotatsiri.
¿Jaoca oncarate nompianaje ivancoqui?
3Quitaiteriqui aisati tsiteniriqui irointi niraapinitaca;
niranaquero nojaqui.
Ineantapinitaquenari quisajeitanari, isampijeitana:
“¿Jaocame iriori Pitasorentsite?”
4Ariorica noquenqueshireacotiro ocapee,
oshequi ocantimoshiretasanotana.
Noquenqueshiretiro nocarajeitirini noshanincapee.
Nojivajeitirini ivancoqui Tasorentsi,
noquimoshiretini nocajemasanoti, aisati nopasonquitiri.
¡Oshequi noquimoshiretini cameetsa!
5¿Paitaquea noncantashiretanteari?
¿Paitaquea nonquenqueshireveetanteari?
Tempa irio Tasorentsi noyeacotaqueri,
irosati noncantea noncantacoteri: Icameetsati.
¡Iriotaque Notasorentsite oavisaacotanari!
6-7Notasorentsite, oshequi nocantashiretasanotaca.
Irotaque noquenqueshiretantimpiri.
Omapocaquena pomerentsitantsi;
tempa pishinetaquena noashiretasanotaca,
oquempetaca aanaquena omotoncane.
Notimaque opoimajatinta opariajatirica nija Jordán,
poneachari toncaariqui Hermón aisati Misar.
8Quitaiteriqui cavintsaaquena Tasorentsi,
aisati tsiteniriqui te noipacayero nopampoyeaventiri,
aisati noquenquetsatacairi Tasorentsiri oaneanari.
9Nocantiri Tasorentsi, jocaacoventanari.
“¿Paita pipeacotantaquenari?
¿Paita noashiretanteari iroashinoncayenarica quisajeitanari?”
10Ocatsitimotasanotaquena icantayetanari quisajeitanari.
Icantani quitaiteripeequi isampitana:
“¿Jaocame iriori Pitasorentsite?”
11¿Paitaquea noncantashiretanteari?
¿Paitaquea nonquenqueshireveetanteari?
Tempa irio Tasorentsi noyeacotaqueri,
irosati noncantea noncantacoteri: Icameetsati.
¡Iriotaque Notasorentsite oavisaacotanari!
Currently Selected:
Salmos 42: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
