Salmos 145
145
Ocameetsati incantacojeiteri atiripee: “¡Icameetsati Tasorentsi!”
(Ivampoyeane David)
1Notasorentsite, nonquenquetsatacotempi: Pipincatsaritasanoti,
noncanteani noncantacotempi: Picameetsati.
2Nompasonquitempi quitaiteripeequi,
noncanteani noncantacotempi: Picameetsati.
3Yora Tasorentsi imatasanoyetiro maaroni,
ocameetsati ancantacoteri: Icameetsati.
Eiro amatirotsi ayotacotasanoteri.
4Yora antearipee iroamejeiteri itomipee,
incantacojeitempi ocameetsataque povetsicayetaqueri;
inquenquetsatacojeitero pimatasanoyetaqueri pitasorencaqui.
5Inquenquetsatacojeitempi pipincatsaritasanoti catsini;
aisati narori nonquenquetsatacotero pimayetaqueri caari ineapiniyeeti.
6Inquenquetsatacojeitero pimatasanoyetaqueri pitasorencaqui, ipincatsatimenteetimpiri,
aisati narori nonquenquetsatacotero pimatasanoyetaqueri.
7Aisati inquenquetsatacoyeetero picameetsatasanotaque catsini,
aisati incajemasanoyeete, incante: “Aviro cameetsatasanotatsiri.”
8Yora Tasorentsi, icavintsantasanoti catsini,
te irishemanteaji inintasanotanti catsini.
9Yora Tasorentsi icameetsatimotaquee maaroni;
aisati yamenacoventiro yovetsicayetiri.
10¡Notasorentsite, ocameetsati onijantacotempi maaroni povetsicaqueri!
¡Incantacotempi quemisantajeitimpiri: Picameetsati!
11¡Inquenquetsatacojeitero pipincatsariventanti,
ocameetsatasanotaque!
¡Inquenquetsatacojeitero pimatasanoyetaqueri pitasorencaqui!
12¡Iriotacaajeiteri atiripee
pimatasanoyetaquero paitapeerica pitasorencaqui
aisati ocameetsatasanotaque pipincatsariventanti!
13Pincanteani Pimpincantsarite, pimpincatsariventajeiteri maaroni atiripee, pincantaitatiyempani.
14Yora Tasorentsi yamitacotiri yoashinonqueetiri,
aisati yoimoshirenquiri oashirejeitachari.
15Avirotaque yoyeacojeitiri atiripee,
pimpajeiteri iroajeiteari,
omoncaratearica pipapinitantariri.
16Aisati pinquempejeitiri iriori poshiniripee,
pimpasanojeiteri iroajeiteari, pinquemacaapinijeitari.
17Yora Tasorentsi, icameetsatasanotaque,
ocameetsataque maaroni yantayetiri.
18Yora Tasorentsi iquempejitari maaroni quenquetsatacaasanotiriri cameetsa.
19Imoncaratiniri pincatsajeitiriri icoajeitiri,
ariorica icantiri, iramitacoteri,
iquemiri aisati yoavisaacojeitiri.
20Yora Tasorentsi yojocaacoventiri nintajeitiriri;
irintiquea caari cameetsajeitatsi, itsoncajeitiri.
21¡Ocameetsati noncantacoteri Tasorentsi: Icameetsati!
¡Aisati inquempejeitea maaroni,
incantacoteri: Icameetsati Tasorentsi,
meeca aisati incantaitatiyempani!
Currently Selected:
Salmos 145: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
