Proverbios 19
19
1Ocameetsatasanoti eiro ashitaarantatsi irointiquea ancameetsate,
anaacoteri caari iotatsi aisati cantimatantatsiri.
2Te oncameetsateji antashitearo intsipaite paitapeerica, teerica anquenqueshiretasanoteaji;
ariorica ashintsiventero ari ancomitaquearo.
3Yora caari iotatsi eiro isaviquitsi cameetsa,
impoiji incante: “Irio Tasorentsi cantacaacarori.”
4Yora ashitaarantincari oshequi nintasanoyetiriri;
irintiquea coiteaveetatsiri, eiro icaratajiritsi aacameetsavetariri.
5Yora camantacotashitarori tseeyantsi, aitaque iroashinonqueetaqueri;
aisati tseeyari, eiro ineashiyeetaritsi.
6Yora pashitantachari aisati caari mashitsatatsiri,
oshequi icoacoayeetiri intsipavintsayeeteari.
7Yora caari ashitaarantacha te incoajeiteriji irirentipee;
aisati iriori itsipavintsavetaniri, eiro icarajeitajiritsi.
8Yora iotatsiri ineantaro iotaqueri,
irisati nintajancha aisati isaviqui cameetsa.
9Yora camantacotashitarori tseeyantsi, aitaque iroashinonqueetaqueri;
yora tseeyari oyeaqueri caamanentsi.
10Te oncameetsateji inquempetacoteari caari iotatsi ashitaarantincari;
aisati peranarontsi impincatsariventeri irioperoyetatsiri.
11Yora quenqueshireachari cameetsa, yamavetiro inquishea,
aisati yora cameetsatatsiri, te inquemisantero icantimayevetari,
12Ariorica iquisa pincatsari, iquempetacari antearite maniti amoroatsiri;
irompa iraacameetsatantearica, iquempetacaro cajashiiteatsiri saveshiqui.
13Yora caari iotatsi yoashiretacaari iriri;
ora tsinane quishincaro oquempetacaro ovitejantapinitari nija.
14Ora pancotsi aisati ovaararontsi irotaque ipeeri ashiteari;
irointiquea ijina quenqueshireachari, irio Tasorentsi paqueriri.
15Ora perantsi oimaasanotanti catsini,
yora peranti irineero intasheajeite.
16Yora moncaratirori icantacantiri Tasorentsi, incanteani iranee;
irintiquea tseenquirori oametantsi, incame.
17Pimpashitearirica coiteaveetatsiri, oquempetaca irio pipaqueri Tasorentsi,
iriotaque aisati oipiajempirone.
18Poametasanoteri pitomi ainiroquera ijananequiti,
iro cantaincha paamaventea poamairicari, ariorica pimpasateri.
19Yora tsimaasanotachari, ario iroashinonqueetaqueri;
eirorica yoashinonqueetiritsi, aiquero irijatatiye inquisasanotanaquea.
20Pinquemisantero icanteetimpiri, aisati pincoasanotero yoameyeetimpiri;
aitaque piotasanotanaque.
21Yora atiri oshequi iquenqueshirea paitapeerica irantayeteri;
iro cantaincha apatiro irantero icoacaacari Tasorentsi.
22Ora icoacayeetiriri atiri, incavintsaante,
aisati ocameetsati ancoiteaveeyevetea, irointiquea eiro amatavitantitsi.
23Ariorica ampincatsateri Tasorentsi,
ario aneanaje anquimoshirete,
aisati eiro aquemaatsicatarotsi paitapeerica.
24Yora peranti yajiricavetaro yoantari,
iro cantaincha eiro imatirotsi iroanquero iraco ivantequi.
25Ariorica iroashinonqueeteri cantimatantatsiri, ari iriotanaje iriori caari quenqueshireacha;
irintiquea iotatsiri, aparo iroameyeetaqueri, iriotanaque.
26Yora oashinoncairiri iriri aisati tiancanatirori iriniro,
oshequi ipashiventacotacari ashitariri,
aisati yantimotaqueri caari cameetsatatsi.
27Notomi, eirorica piquemisantirotsi nocantimentimpiri,
pimpeacotanaquearo icanteevetimpiri cameetsatatsiri.
28Yora camantacotashitarori tseeyantsi itseenquiro cameetsatatsiri;
yora caari cameetsatatsi ineanatantaro caari cameetsatatsi.
29Vetsicacaa inchaquii irineeri piatsajeitachari;
aisati iriori caari iojeitatsi, impasayeeteri itapiiqui.
Currently Selected:
Proverbios 19: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
