Números 7
7
Yamayetiri yoameetsatantacarori Inantari Tasorentsi
1Ari otsoncantanacari Inantari Tasorentsi yovetsicacantaqueri Moiseshi, isaitantacaro quejitsi yoameetsatantacarori. Aisati iquempetaquero iroori altar jero maaroni timayetatsineri. 2Impoiji iriori jivatacaayetiriri ishanincasanoripee, amitacotaqueriri isanquenatacotaqueri ishanincapee, 3yamajeitaqueneri Tasorentsi ipiriri: ocarataque 6 shiacomentotsi pashicacotachari. Icarayetaque jivatacantayetatsiri apite yamaque aparo shiacomentotsi. Jeri 12 vaca icashicaaqueri aparopeeni, yoimotapaaquero Inantari Tasorentsi.
4-5Ari icantiri Tasorentsi Moiseshi: “Paavaquero yamaqueri, pimperi ishanincapeeni Leví. Irotaque irantaveetantayeteari Pancotsiqui papatotimentantanari.”
6-7Ari yaaquero shiacomentotsi aisati vaca, ipayetaqueri ishanincapeeni Leví. Ipaqueri iriori ishanincapeeni Guersón apite shiacomentotsi aisati 4 vaca, irotaque irantaveetanteari. 8Impoiji ipaqueri iriori ishanincapeeni Merari 4 shiacomentotsi aisati 8 vaca, irotaque irantaveetanteari. Irio jivatacaajeitiriri Itamar itomi antaveetatsiri Aarón. 9Irintiquea ishanincapeeni Quehat, te imperiji. Tempa iriojeitaque icoacaaqueri anatacoterone cameetsayetatsiri inashitacaari.
10Yoameetsatantacarori altar, yora jivatacaayetiriri ishanincapee yamajeitaque ipiriri Tasorentsi, yoapaaquero altariqui. 11Ari icantiri Tasorentsi Moiseshi: “Yora jivatacaayetiriri ishanincasanoripee ocameetsati impoque aparoni quitaiteri iramaje impenari inashitacaaquerori altar. Iro pashiniqui impoque itsipa, aitaque incantajeiteari.”
12Aparo quitaiteri intanacaro Nahasón itomi Aminadab ishanincapeeni Judá, yaanaque imperiri Tasorentsi.
13Yaanaque aparoni vanteja vetsicachari plata tenatatsiri 1,430 gramo,
aisati aparoni tazón vetsicachari plata otenataque iroori 770 gramo (moncaratachari moncaramentotsiqui timatsiri Inantariqui),
aisati ojaacaro apiiteroqueti cameetsavanetatsiri tirico conoachari quejitsi.
14Aisati yaanaque aparo cucharón vetsicachari oro, otenataque iroori 110 gramo, ojaacaro casancavaneri.
15Aisati yaanaque aparo vaca, aparo ovisha, aparo ovishajaniqui, moncarataquerori aparoni irosarentsite. Iriotaque intaasanoteneriri Tasorentsi.
16-17Jeri aparoni chiivo iroimenterori caari cameetsatatsi yantayetiri.
Impoiji iroimenterori iraacameetsatantajeariri apite vaca shirampari, 5 chiivo, aisati 5 ovishajaniqui moncarataquerori aparoni irosarentsite.
Irotaque yaayetanaqueri Nahasón itomi Aminadab.
18-23Jero apitetapaintsiri quitaiteri yora Natanael itomi Suar, ishanincapeeni Isacar, iriotaque jivatacairiri ishanincasanoripee, yaanaque iriori icashiacaaqueriri Tasorentsi. Aisati oquempetacaro yaanaqueri Nahasón.
24-29Jero mavatapaintsiri quitaiteri yora Eliab itomi Helón ishanincapeeni Zabulón, iriotaque jivatacairiri ishanincasanoripee. Yaanaque iriori icashiacaaqueriri Tasorentsi, aisati oquempetacaro yaanaqueri ishanincapee.
30-35Jero caratapaintsiri 4 quitaiteri yora Elisur itomi Sedeúr ishanincapeeni Rubén, iriotaque jivatacairiri ishanincasanoripee. Yaanaque iriori icashiacaaqueriri Tasorentsi, aisati oquempetacaro yaajeitanaqueri ishanincapee.
36-41Jero caratapaintsiri 5 quitaiteri yora Selumiel itomi Surisadai ishanincapeeni Simeón, iriotaque jivatacairiri ishanincasanoripee. Yaanaque iriori icashiacaaqueriri Tasorentsi, aisati oquempetacaro yaajeitanaqueri ishanincapee.
42-47Jero caratapaintsiri 6 quitaiteri yora Eliasaf itomi Reuel ishanincapeeni Gad, iriotaque jivatacairiri ishanincasanoripee. Yaanaque iriori icashiacaaqueriri Tasorentsi, aisati oquempetacaro yaajeitanaqueri ishanincapee.
48-53Jero caratapaintsiri 7 quitaiteri yora Elisamá itomi Amihud ishanincapeeni Efraín, iriotaque jivatacairiri ishanincasanoripee. Yaanaque iriori icashiacaaqueriri Tasorentsi, aisati oquempetacaro yaajeitanaqueri ishanincapee.
54-59Jero caratapaintsiri 8 quitaiteri yora Gamaliel itomi Pedasur ishanincapeeni Manasés, iriotaque jivatacairiri ishanincasanoripee. Yaanaque iriori icashiacaaqueriri Tasorentsi, aisati oquempetacaro yaajeitanaqueri ishanincapee.
60-65Jero caratapaintsiri 9 quitaiteri yora Abidán itomi Guidoní ishanincapeeni Benjamín, iriotaque jivatacairiri ishanincasanoripee. Yaanaque iriori icashiacaaqueriri Tasorentsi, aisati oquempetacaro yaajeitanaqueri ishanincapee.
66-71Jero caratapaintsiri 10 quitaiteri yora Ahiézer itomi Amisadai ishanincapeeni Dan, iriotaque jivatacairiri ishanincasanoripee. Yaanaque iriori icashiacaaqueriri Tasorentsi, aisati oquempetacaro yaajeitanaqueri ishanincapee.
72-77Jero caratapaintsiri 11 quitaiteri yora Paguiel itomi Ocrán ishanincapeeni Aser, iriotaque jivatacairiri ishanincasanoripee. Yaanaque iriori icashiacaaqueriri Tasorentsi, aisati oquempetacaro yaajeitanaqueri ishanincapee.
78-83Jero caratapaintsiri 12 quitaiteri yora Ahirá itomi Enán ishanincapeeni Neftalí, iriotaque jivatacairiri ishanincasanoripee. Yaanaque iriori icashiacaaqueriri Tasorentsi, aisati oquempetacaro yaajeitanaqueri ishanincapee.
84Aitaque ocarataqueri yaayetanaqueri jivatacaajeitiriri ishanincasanoripee, icashiacaaquerori altar yoameetsatantacarori: ocarataque 12 vanteja vetsicachari plata, 12 tasón irosati vetsicachari plata jero 12 cucharón vetsicachari oro. 85Aparopeeni vanteja otenataque 1,430 gramo, aisati iroori aparopeeni tasón otenataque 770 gramo. Ari apatoanaca maaroni otenataque 26,400 gramo, imoncarataquero moncaramentotsiqui timatsiri Inantariqui Tasorentsi. 86Jero cucharón caratatsiri 12 vetsicachari oro, ojaacaro casancavaneri, otenataque aparopeeni iroori 110 gramo. Ocarati apatoanaca otenataque 1,320 gramo. Imoncarataquero iroori moncaramentotsiqui timatsiri Inantariqui Tasorentsi.
87Impoiji iriori virantsipee intaasanoteneriri Tasorentsi icarati 12 vacajaniqui, 12 ovisha anteari, 12 ovishajaniqui moncarataquerori aparoni irosarentsite jero iroori ivanquirepee jeri aisati 12 chiivo iroimenterori caari cameetsatatsi yantayetiri. 88Jeri pashini virantsipee iroimenterori iraacameetsatantajeariri icarataque 24 vacajaniqui, 60 ovisha anteari, 60 chiivo aisati 60 ovishajaniqui moncarataquerori aparo irosarentsite. Iriojeitaque icashiacaaqueriri Tasorentsi yoameetsatantacarori altar.
89Iqueantanacari Moiseshi Pancotsiqui yapatotimentantariri Tasorentsi inquenquetsatacanteariri. Ari iquemaqueri Tasorentsi ineanataque jenioquiji otataroqui Cajón onantari Icantacantiri Tasorentsi, itimaquenta ishiacantiri inampire Tasorentsi.
Currently Selected:
Números 7: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
